Ombuze ya Natan ku David
(2Sam 7:1-17)1 Ombara David nambano wa turire mondjuwo ye youhona. Eyuva rimwe wa tuma ovandu okukaisana omuprofete Natan, ne mu raere nai: “Tara, ami mba tura mondjuwo ndja tungwa notupapa, nungwari ihi Otjipwikiro tjOmerikutiropamwe wa Muhona tji ri mondanda.”
2 Natan wa zira nai kombara: “Osemba, tjita uri ngamwa pu we ripura, orondu Ndjambi u ri puna ove.”
3 Nungwari mouṱuku tjingewo mbo Ndjambi wa tja nai ku Natan: 4 “Twende u karaere omukarere wandje David kutja ami me tja nai ku ye: ‘Kaove ngu mo tungire ami ondjuwo ondjapuke kutja mbi ture mo. 5 Okuza koruveze ndu mba yama otjiwaṋa tja Israel kOvaengipte nga ku ndinondi hi na pu mba turire mondjuwo ondjapuke, nungwari mba turire mozondanda, ame tjindi okuzamba na mbena. 6 Momaryangero wandje aehe puna otjiwaṋa tja Israel hi na pu mba purire ku umwe wovanane mbu mba zikire kutja okutjavi tji ve he ndji tungire ondjuwo ondjapuke yotupapa.’
7 “Nambano raera omukarere wandje David kutja Ami, ngu mbi ri Muhona Omunamasaaehe, me tja nai ku ye: ‘Ami mbe kekuisa kouṱuta wozonḓu mokuti, nu mbe ku tjiti kutja u honaparere otjiwaṋa tjandje Israel. 8 Ami mba kara puna ove akuhe koo i, nu mba nyona ovanavita na ove avehe, ove tjoo ryama popezu na wo. Mbe ku tjiti kutja u rire omunane omunene povanane avehe mouye. 9 Ami mba toororera otjiwaṋa tjandje Israel poṋa pu matji tura nokuhinokukurungisiwa, novarunde kave nokutjiṋiṋikiza rukwao tjimuna rutenga. 10 Okuza koruveze ndo otjo tji tja za nokuhita mehi ndi tja rwisiwa i oviwaṋa ovindandi, nungwari ihi kamaatji tjitwa rukwao, ami me tjiti omakwizikiro kutja me ku suvisa kovanavita na ove avehe, nokutja me ku pe ozondekurona. 11 Tji wa koka no kapakwa kooiho mukururume, ami me ziki omuzandu woye umwe a rire ombara, nu me zeuparisa ouhona we. 12 Eye ongu me ndji tungire ondjuwo ondjapuke, nami me zikamisa ouhona we kutja u karerere nga aruhe. 13 Ami me rire ihe, neye ma rire omuatje wandje. Ami hi nokuisa ko ombatero yandje ku ye otja tji mba tjita ku Saul, ngu mba isa po kutja ove u rire ombara. 14 Ami me mu twa mokutjevera otjiwaṋa tjandje nouhona wandje nga aruhe. Nouhona we kamaau yanda ko.’ ”
15 Natan wa serekarerera David oviṋa avihe Ndjambi mbye mu vandururira.
Ongumbiro ya David yokutja okuhepa
(2Sam 7:18-29)16 Ombara David wa hita mOndanda yOmahakaeneno, a kara pehi na kumbu a tja: “Ami hi pwire ku imbi mbi wa tjita ku ami, Muhona Ndjambi, na keṱunḓu randje wina. 17 Nu ingee mo tjiti oviṋa ovingi komurungu; Ove wa tjitira ozondekurona zandje omakwizikiro mozombura ndu maze ya; nu ove, Muhona Ndjambi, ingee mo ndji vara otja omurumendu omunanḓengu. 18 Nami David me sora okuhungira tjike kove komurungu! Ove mo ndji tjiwa nawa, nu ingee u tjita ondjozikiro ku ami, omukarere woye. 19 Indji ya ri ombango nondyero yoye okutjita nai ku ami, nokundjiraisira ounene wandje mbu mau ya. 20 Muhona, kape na ngu ri otja ove; eṱe aruhe tu tjiwa kutja oove erike ngu u ri Ndjambi. 21 Kape notjiwaṋa tjarwe kombanda yehi tji tja sana kotjiwaṋa tjoye Israel tji wa yama mouhuura okutjitjita ovandu voye omuini. Oviṋa ovinene novihimise mbi we tji tjitira vya tandavarisa ondjiukiro yoye mouye auhe. Ove wa yama otjiwaṋa tjoye kOvaengipte, no ramba oviwaṋa vyarwe, ovandu voye tji ve ya. 22 Ove wa tjita Israel okurira otjiwaṋa tjoye omuini nga aruhe, nove, Muhona, wa rira Ndjambi watjo.
23 “Nambano Muhona, ma yenenisa omakwizikiro ngu wa tjita ku ami na kozondekurona zandje nga ko nga aruhe, nu tjita imbi mbi wa tja mo tjiti. 24 Ena roye mari rire enene, novandu aruhe mave tja: ‘Muhona Omunamasaaehe eye Ndjambi wa Israel.’ NOve mo ṱakamisa ouhona wandje nga ko nga aruhe. 25 Ami mbi nonḓero okukumba ongumbiro ndji kove, Ndjambi wandje, ove tjinga awa raisira ami, omukarere woye, oviṋa mbi, nawe ndji raera kutja mo tjiti ozondekurona zandje okurira ozombara. 26 Ove, Muhona, oove ngu u ri Ndjambi, nove wa tjita omakwizikiro omahimise nga ku ami. 27 Ami me ningire kove, u sere ondaya kozondekurona zandje kutja ze kare pokumuna ondjingonekero yoye. Ove, Muhona, we ze sera ondaya; ondaya yoye ngai kare kombanda yazo nga aruhe.”
© Herero Revision Bible © Bible Society in Namibia, 2021.
