1 Okuza ku Petrus, omuapostele wa Jesus Kristus.
Ami me tjanga kovatoororwa va Ndjambi mba tura otja ovandu wozonganda mba rimbara mehi ra Pontus nora Galatie nora Kapadosie nora Asie nora Bitinie. 2 Eṋe mwa toororwa otja kondyero ya Ndjambi Tate, nu mwa yapurwa i Ombepo ye okurira otjiwaṋa tje kutja mu kare nonḓuviro ku Jesus Kristus nokutja mu kohororwe i ombinḓu ye.
Otjari nohange ngavi rire ovyeṋu okuura!
Omaundjiro omanamuinyo
3 Ndjambi, Hiya Muhona wetu Jesus Kristus, nga tangwe! Nu motjari tje otjinene eye we tu pa omuinyo omupe mokupendura Jesus Kristus movakoke. Nambano tu nomaundjiro omanamuinyo, 4 kokutja tu rumate imbi mbi ha woro nu mbi ha zunḓaka, nu mbi ha kukuta, nu wina mbya turikirwa eṋe meyuru. 5 Neṋe tjinga amu nongamburiro mamu ṱakamisiwa nawa i omasa wa Ndjambi kutja mu kamune ondjamo ndja ṱuninwa okuraisiwa momayuva omasenina.
6 Yorokereye otjiṋa hi, nandarire kutja ma rire ohepero eṋe okuṱoruhoze oruveze orusupi momarorero ngamwa aehe pekepeke mu mu ri. 7 Nomarorero nga maye raisa kutja ongamburiro yeṋu oyatjiri. Nangarire ongoldo ndji yanda i rorwa momuriro; komuhingo mbwi ongamburiro yeṋu ndji ri onanḓengu tjinene pongoldo wina otji mai sokurorwa kutja ondji ri yo, tjiri. Eṋe otji mamu pewa ondangero nondjingonekero nondjozikiro mEyuva Jesus Kristus ndi meya rukwao. 8 Eṋe mwe mu suvera, nandarire kutja kamuye mu muna; nu mwa kambura mu ye, nangarire kutja nai kamu nakumumuna nambano. Notji mamu yoroka nondjorokero onene nonamasa omundu ndje hi na maa yenene okutamuna, 9 eṋe tjinga amamu pewa ondjamo yominyo vyeṋu ndji ri omayenenisiro wongamburiro yeṋu mu ye.
10 Ovaprofete va tjitire omakonḓononeno omakukutu nga tjama nondjamo ndji, nu aave profete notjiyandjewa hi Ndjambi tji ma vanga okuyandja ku eṋe. 11 Ombepo ya Kristus ndja ri mu wo ya zuvarisire rukuru kutja Kristus maa hihamisiwa nu tjazumba a yozikwa, nowo va kondjere okukonḓonona kutja indwi oruveze nomuhingo mavi kara vi Ombepo mbi ya heya. 12 Ndjambi wa vandururira ovaprofete mba kutja imbi mbyaa ve ungura ka vya ri ovyawo, nungwari vya ri ovyo vakambure. Nambano imba mbe mu zuvarisira indji Ombuze Ombwa, ve mu tjivisa omaprofetero nga mOmbepo Ondjapuke ngwa hindwa okuza keyuru. Moviṋa mbi ovaengeri wina ve vanga okukara nondjiviro mu vyo.
Omaningiriro kongarero ondjapuke
13 Opu mamu sokukareka ozondunge zeṋu katumba nu mu kare nomuungutima! Zikamiseye omaundjiro weṋu nokuhinokuivaiva motjari tji mamu pewa, indu Jesus Kristus tji meya rukwao. 14 Kareye nonḓuviro ku Ndjambi nu amu riyandjere kutja mu honaparerwe i ozonḓuma ndu mwa ri na zo mokuhatjiwa kweṋu. 15 Rireye ovayapuke mu avihe mbi mamu tjiti, Ndjambi ngwe mu isana tjinga e ri omuyapuke. 16 Omatjangwa maye tja: “Rireye ovayapuke, ami tjinga ambi ri omuyapuke.”
17 Tji mamu kumbu ku Ndjambi, eṋe mu mu tja Tate. Eye u pangura ovandu avehe nokuhinambangu otja kotjiungura tjaauhe. Otji mamu sokukara nondira ku ye momayuva wouyenda weṋu kombanda yehi. 18 Orondu eṋe mamu tjiwa indji ondjambi, ndji mwa sutwa na yo okukuturwa kongarero yomungandjo ndji mwa rumata kooiho mukururume. Oyo kaya ri ondjambi, ndji nyonoka uriri tjimuna osilveri nongoldo. 19 Eṋe mwa kuturwa nombinḓu onḓeu ya Kristus ngwa ri otja ondjona, ndji hi notjipo nu ndji hi nomaṋi. 20 Eye wa toororwa i Ndjambi ouye ngunda au hiya utwa, nu motjimbe tjeṋu eye wa munikisiwa momayuva omasenina nga. 21 Mu ye eṋe omu mwa kambura mu Ndjambi ngwe mu pendura movakoke nu ngwe mu pa ondjingonekero yeyuru. Ongamburiro yeṋu nomaundjiro weṋu opu vya zokukara mu Ndjambi.
22 Nambano mokukara nonḓuviro kouatjiri eṋe mwe rikohorora oveni, nu mwa suvera ovakweṋu nokuhinotjavivi, eṋe wina otjinga amamu sokusuverasana tjiri nomutima auhe. 23 Nu membo ra Ndjambi enamuinyo nekarerere eṋe mwa kwatwa rukwao otja ovanatje va Ihe ingwi umwe ngu ha koka. 24 Nomatjangwa maye tja:
“Omundu wa sana nehozu,
nouwa we auhe womuhapo wa sana nongara yokuti;
ehozu ri kukuta, nongara i pukumukira pehi,
25 nungwari indi embo ra Muhona ri karerera nga aruhe.”
Embo ndi ondi ri Ombuze ndji Ombwa ndji mwa zuvarisirwa.
© Herero Revision Bible © Bible Society in Namibia, 2021.
