Eziriro ra Muhona ku Habakuk
1 Ami me rondo koruhungu rwandje romatjeverero nu mbi ka undje imbi Muhona mbi me ndji tjivisa otja eziriro komaunaunino wandje.
2 Muhona we ndji pa eziriro ndi: “Tjanga nawa oukahu kovitjangero imbi oviṋa mbi me ku vandururire, kokutja ovyo vi sore okuresewa tjimanga. 3 Oviṋa mbi mo sokuvitjanga, orondu oruveze mu mavi sokuyenenisiwa karuye ya. Nungwari oruveze maru ya tjimanga, nu imbi ami mbi me ku raisire mavi yenenisiwa. Mape munika aayo ovyo mavi wombo okuya, nungwari vi undja uri; ovyo, tjiri, mavi yenenisiwa nu kavi nokuwombisiwa. 4 Nu ombuze oyo ndji: ‘Imba ovanauvi kave nokuhupa; nungwari imba ovasemba mave hupu motjimbe tjongamburiro mu Ndjambi.’ ”
Osengiro kovahasemba
5 Outumbe u wovisa. Overitongamise kave kowa. Mominenetima vya wo kave hirimana, kave kowa oparukaze tjimuna onḓiro oini, owo opu ve zokurihuurira omihoko avihe. 6 Ovahuurwa mave nyekerere ovevehuure amave ve tara nonyengo. Owo mave tja nai: “Eṋe mu kambura imbi mbi he ri ovyeṋu, nungwari eṋe mwa sengwa! Mamu kara pokutumba nai nga ruṋe mokuṋiṋikiza imba mbe nozondjo zeṋu kutja ve ze sute?”
7 Nungwari ngunda amu hiya tjiwa otjiṋa hi tjandje eṋe oveni mbu mwa huura ovakweṋu varwe mamu kara nozondjo, nu mamu ṋiṋikiziwa okusuta ovihohe. Ovanavita mave ya ave mu urumisa. Owo mave mu pundu oviṋa! 8 Eṋe mwa punda ovandu vomihoko omingi, nungwari nambano omihoko mbi mbya hupa mavi mu pundu mena romazepero ngu mwa tjita na mena rozondjito zeṋu zoutwe nḓu mwa tjita mouye na kovihuro na kovature vavyo.
9 Owee ku eṋe! Eṋe mwa tumbisa ovazamumwe veṋu noviṋa, mbi mwa kambura momasa, nu mwa kondja kutja ozonganda zeṋu aze ha munu ovipo nomaumba! 10 Nungwari ozondyero zeṋu za eta ohoṋi komaṱunḓu weṋu; mokuyandeka omihoko omingi eṋe mwe riyetera onyoneno porwayo. 11 Nandarire omawe womakuma wondjuwo maye mu pirukire, nomiti vyondjuwo vyokomututu mavi kara norupa momapirukiro nga.
12 Owee ku eṋe mbu mu tunga otjihuro nomatirahiro wombinḓu namu ryamene ko okutjitunga nozondjito zoutwe. 13 Omihoko mbi mwa huura vye ripungarisa ovini noviungura vyomungandjo, nu avihe mbya tungwa i omihoko mbi mavi pi momuriro. Muhona Omunamasaaehe ongwa tjita otjiṋa hi. 14 Tjiri, ehi mari ura nondjiviro younene wa Muhona tjimuna okuvare tji kwe ura nomeva.
15 Owee ku eṋe mbu mwa yamburura namu ṱisa ovararanganda veṋu ohoṋi, mwe ve ṋiṋikiza okupurukisiwa i omavinu kokutja mu mune omuzu wa wo. 16 Eṋe oveni mamu ṱohoṋi moruveze rwokumuna ondengero. Eṋe oveni mamu purukisiwa i omavinu namu teratera. Muhona me mu nwisa otjinwino tjomberero yeṋu oveni, nondengero yeṋu mai runduruka okurira ondjambu. 17 Eṋe mwa ka omahwa wa Libanon, nambano eṋe mamu kerwa pehi! Mwa zepa ovipuka vyomahwa nga, nambano ovipuka mbi mavi mu tirisa. Ihi matji tjitwa mena romazepero ngu mwa tjita na mena rozondjito zoutwe nḓu mwa tjita mouye na kovihuro na kovature vavyo.
18 Omukuru wotjisenginina u nohepero yatjike? Eye otjisenginina tji tja ungurwa i omundu, nu ke notjiṋa tje mu serekarera posi yovizeze porwavyo. Pe nohepero yatjike komuute we okuriyameka ku ye; eye omukuru uriri ngu ha sora nandarire okuhungira! 19 Owee ku eṋe mbu mu tja nai kotjitimbu tjomuti: “Penduka!” na kewe: “Sekama!” Omukuru wotjisenginina hapo u sora okumuvandururira otjiṋa ngamwa are? Tjiri, eye ma yenene okutuwa ko osilveri nongoldo, nungwari tjandje mu ye kamu nomuinyo.
20 Nungwari Muhona u ri mondjuwo ye ondjapuke; auhe mouye nga kare kumwi momurungu we.
© Herero Revision Bible © Bible Society in Namibia, 2021.
