Esekiel 48 - Herero Revision Bible (HRR)

Omahaṋeno wehi mokati komihoko

1-7 Omuruko wehi wokeyuva kokunene wa ya kuṱa komuhuka okuza kOmuronga Mediterania, au i kotjihuro Hetlon, na kOmakapitiro wa Hamat, na kotjihuro Enan nga komukuro pokati kouhona wa Damaskus nowa Hamat. Omuhoko auhe mau pewa orukondwa rumwe rwehi ndwa tandauka okuza komukuro wokomuhuka kuṱa kongurova nga kOmuronga Mediterania, momuhingo mbwa sana ngwi okuza keyuva kokunene nga keyuva kokumuho, okutja omuhoko wa Dan nowa Aser nowa Naftali nowa Manasse nowa Efraim nowa Ruben nowa Juda.

Orukondwa rwapeke rwomondivitivi yehi

8 Orukondwa ndu ri meṋe yomuruko wehi ra Juda maru tuwa peke okuungurira mo oviṋa oviyapuke. Orwo maru kara nozokirometa omurongo na mbari nohinga kouparanga okuza komukuma wokeyuva kokunene nga keyuva kokumuho, noure tjingewo okuza komuhuka nga kongurova otja otukondwa tu twa yandjewa komihoko ondjuwo ya Muhona mai kara morukondwa ndwi.

9 Mondivitivi yorukondwa ndwi mamu kara ehi, ndi nozokirometa omurongo na mbari nohinga koure nozokirometa omurongo kouparanga, ndi mari yapurirwa Muhona. 10 Ovapristeri mave pewa okarukondwa kemwe mehi eyapuke ndi. Okuza komukuma wokomuhuka nga komukuma wokongurova okarukondwa kawo make sanekwa ozokirometa omurongo na mbari nohinga, nokuza komukuma wokeyuva kokunene nga komukuma wokeyuva kokumuho ma rire ozokirometa ndano ondjuwo ya Muhona mai kara mondivitivi yehi ndi. 11 Ehi eyapuke ndi mari rire orovapristeri, inḓa ozondekurona za Sadok. Owo ve ndji karera nouṱakame, nu kave wana nOvaisrael avehe mokutjita ouvi otja ovakwao vomuhoko wa Levi tjaave tjiti. 12 Owo otji mave pewa ehi nda toororwa, ndji ri meṋe yehi rOvalevi, noro mari rire eyapukeyapuke pu aehe. 13 Ovalevi wina mave pewa ehi nda toororwa, ndi mari kara komukuma wokeyuva kokumuho kwaindi rovapristeri. Oro wina mari kara nozokirometa omurongo na mbari nohinga okuza komukuma wokomuhuka nga komukuma wokongurova, nozokirometa ndano okuza komukuma wokeyuva kokunene nga komukuma wokeyuva kokumuho.

14 Ehi nda yapurirwa Muhona oro orukondwa oruwaruwa rwomahi aehe, noro kari nokusokurandisiwa poo okupimbwa poo okurundururirwa komunda warwe. Oro eyapuke nu ora Muhona.

15 Orukondwa rwehi nda toororwa, ndwa sewa po, rwozokirometa omurongo na mbari nohinga koure nozokirometa mbari nohinga kouparanga, oro karuyapuke, nungwari orwokuungurisiwa uriri i ovandu. Owo mave yenene okutura mo nokuruungurisa. Otjihuro matji sokukara mondivitivi yarwo, 16 norwo maru kara nomikuma vine mbi ṱeki pamwe, ozometa 2,250 komukuma auhe. 17 Okukondoroka otjihuro komunda auhe mape kara oruveze orutandauke rwozometa 125 okutuvakaṋa. 18 Ehi nda hupu, otjihuro tji tja zu nokutungwa morukondwa rwehi ndu ri meṋe yehi eyapuke komukuma wokeyuva kokumuho, ozokirometa ndano koure nozokirometa mbari nohinga kouparanga nu komuhuka, nozokirometa ndano koure nu kongurova, mari ungurisiwa otja ehi romakunino i ovature votjihuro. 19 Auhe ngwa tura motjihuro, kape na ko na tja kutja wa za komuhoko uṋe, ma yenene okukuna mehi ndo.

20 Komuhingo mbwi ehi arihe kumwe, ndi ri mondivitivi yorukondwa ndwa toororwa, mari kara nomikuma vine mbi ṱeki pamwe, ozokirometa omurongo na mbari nohinga komukuma auhe, noro mari kara nokahi mu mamu tungwa ihi otjihuro.

21-22 Komukuma wokomuhuka na komukuma wokongurova kwehi mu mu nondjuwo ya Muhona nehi rovapristeri norOvalevi notjihuro, oku ku nehi romunane ohivirikwa. Oro ra tanaukira kuṱa komuhuka nga komukuro wokomuhuka, na kuṱa kongurova nga kOmuronga Mediterania; nomuruko waro wokeyuva kokunene wa ri keṋe yorukondwa rwehi ra Juda, nu imbwi wokeyuva kokumuho wa ri meṋe yorukondwa rwehi ra Benjamin.

Ehi romihoko omikwao

23-27 Komukuma wokeyuva kokumuho kworukondwa indwi orutoororwa, omuhoko auhe waimbi mbya sewa po mau pewa orukondwa rumwe rwehi, okuza komukuro wokomuhuka nokuyenda kuṱa kongurova nga kOmuronga Mediterania, momuhingo mbwa sana ngwi okuza komukuma wokeyuva kokunene nga ku imbwi wokeyuva kokumuho, okutja omuhoko wa Benjamin nowa Simeon nowa Isakar nowa Sebulon nowa Gad.

28 Komukuma wokeyuva kokumuho kworukondwa ndwa yandjwa komuhoko wa Gad, omuruko mau kayenda kuṱa keyuva kokumuho okuza kOtamar nokuyenda kOmeva wOzombata wa Kades, tjazumba au i komukuma wokeyuva kokunene meṋe yomuruko wa Engipte nga kOmuronga Mediterania.

29 Muhona Ndjambi wa tja nai: “Imbwi owo omuhingo ehi mu mari haṋewa motukondwa komihoko vya Israel ri rire ouini wavyo.”

Omivero vya Jerusalem

30-34 Otjihuro tja Jerusalem tji nomahitiro omurongo na yevari. Ekuma arihe rainga oyane worumbo ra ri nozometa 2,250, nu ra ri nomivero vitatu mu ro; omuvero auhe wa rukirwa omuhoko umwe waimbi omurongo na vivari. Omivero vyekuma rokeyuva kokunene vya rukirwa kooRuben na Juda na Levi; imbi vyekuma rokomuhuka vya rukirwa kooJosef na Benjamin na Dan; imbi vyekuma rokeyuva kokumuho vya rukirwa kooSimeon na Isakar na Sebulon; nu imbi vyekuma rokongurova vya rukirwa kooGad na Aser na Naftali. 35 Oure auhe kumwe womakuma aehe yane worumbo rwotjihuro wa ri ozometa 9,000. Ena rotjihuro okuzamba mari rire “Muhona uri mwi”.