Ovaengipte mave havererwa mOkarkemis
1 Muhona wa hungirira oviwaṋa ku ami, 2 ama utire potjiwaṋa tja Engipte. Eye wa tja nai indu tja hungirira otjimbumba tjovita tja Neko, ombara ya Engipte, tji tja havererwa mOkarkemis popezu nonḓonḓu Eufrat, i Nebukadnesar, ombara ya Babilon, mombura oitjaine youhona wa Jojakim, ombara ya Juda:
3 “Ovahongore va Engipte mave ravaere ave tja:
‘Tooreye otuvao tweṋu,
nu mu karwe ovita!
4 Kutireye oukambe weṋu, mu kavire, oweṋe vakavire!
Kurameye motuteto; tweye ko omakori weṋu wovita!
Upikeye omanga weṋu!
Zareye ozombanda zeṋu zovita!’ ”
5 Muhona ma pura nai:
“Ami hapo me munu tjike?
Owo mave yaruka ombunda amave tira.
Ozombanḓe zawo za rambwa movita naze yarurwa ombunda;
ozo maze tupuka nomasa otja pu maze sora,
aze nomburuma, nu aze hi nokutaviza kombunda.
6 Ovanatjikara kave nokukaseka;
ozombanḓe kaze nokutaura.
Komukuma wokokunene kweyuva ponḓonḓu Eufrat
owo mave putara nave u.
7 Owaṋi ngwi ngu ma sekama otja onḓonḓu Nil,
otja onḓonḓu ndji mai tanana ovikere vyayo?
8 Oro ehi ra Engipte, ndi mari surakana otja onḓonḓu Nil,
otja onḓonḓu ndji mai tanana ovikere vyayo.
Engipte mari tja nai: ‘Ami me surakana ne vandeke ouye;
me nyono ovihuro novandu, mba tura mu vyo.
9 Rakiza oukambe kutja u kumuke,
nomatemba wovita kutja ye kayende.
Ovarwe wovita ngave kumuke,
okutja ovarumendu mba zire
kOsudan na Libie mbe tjinda otuvao,
na wina ovayumbe vouta ozonongo, mba zire kOlidie.’ ”
10 Indi oro eyuva ra Muhona
Ndjambi Omunamasaaehe:
Ndino eye ma sutisa ovanavita;
ndino eye ma vere ovanavita na ye.
Engaruvyo re mari ve sasaura nga tji re kuta,
nu mari nu ombinḓu yawo nga tji ra kowa.
Ndino ingwi Muhona Ndjambi Omunamasaaehe
ma tjiti omukandi wombunguhiro
komukuma wokokunene kweyuva,
ponḓonḓu Eufrat.
11 Tjiwaṋa tja Engipte, twende kOgilead,
nu u kapahe omiti vyokupanga!
Omiti vyoye vyokupanga avihe oviporoporo!
Kape notjiṋa tji matji ku verukisa.
12 Oviwaṋa vya zuva ohoṋi yoye;
omundu auhe we ku zuva amo riri.
Ovarwe wovita va putara ave wire mumwe,
naveyevari ave wire pehi.
Omeero wa Nebukadnesar
13 Nebukadnesar, ombara ya Babilon, tje ya okurwisa Engipte, Muhona wa hungira ku ami, na tja:
14 “Zuvariseye nai mehi ra Engipte,
movihuro ooMigdol na Memfis na Takpanhes:
‘Rirongera okuriyeura omuini;
avihe mbi u na vyo mavi yandekwa movita.
15 Okutjavi omukuru woye omunamasa Apis tja vandwa pehi?
Muhona ongwe mu vanda pehi.
16 Ovarwe voye wovita va putara nave u;
owo mave verihungirire oveni ave tja:
Ngatu sekame, tu yaruke kotjiwaṋa tjetu, kehi retu,
tu kataure engaruvyo romunavita!’
17 “Rukeye ombara ya Engipte ena epe ndi:
‘Murokohe wa tjinene ngu nyona oruveze rwe’.
18 Ami, ngu mbi ri Muhona
Omunamasaaehe, owami Ombara.
Owami Ndjambi omunamuinyo.
Ondundu Tabor punga ai hiva ozondundu,
nondundu Karmel punga ai hiva okuvare tjinene,
opunga amape sana omasa waingwi ngu me ku rwisa.
19 Rirongereye okutwarewa otja ovahuurwa,
vature va Engipte!
Memfis matji rire okuti onguza nu matji rire
otjitambatundu mu mu ha tura omundu.
20 Engipte ri ri otja ongombe onḓenḓu eremba
ndji mai rumatwa i onḓe ondumate ndja
zire komukuma wokeyuva kokunene.
21 Nandarire ovarwe vawo ovayazema kave nombatero,
owo ve ri otja ozondana nḓa ṋunisiwa.
Kave kuramene nokurwa;
avehe va tanauka nave tupuka.
Eyuva rosengiro yawo reya,
indi eyuva romberero yawo.
22 Engipte mari tupuka okuyenda amari hekana
tjimuna onyoka ndji mai suvire,
otjimbumba tjovanavita tji matjiya.
Otjo matji rwisa ro nomakuva
tjimuna ovarumendu mbu mave ke omiti
23 nu mbu mave nyono otjihwa otjipote.
Ovarumendu vawo owo ovengi tjinene
nga tji ve hi nokusora okuvarwa;
ovarwe vawo wovita va kapita ehapu rozombahu.
24 Ovaengipte mave ṱisiwa ohoṋi;
owo mave haverwa i ovandu vokeyuva kokunene.
Ami, ngu mbi ri Muhona,
owami ngu mba hungire.”
25 Muhona Omunamasaaehe, Ndjambi wa Israel, ma tja nai: “Ami me vere Amon, omukuru wotjisenginina wa Tebes, pamwe nehi ra Engipte noomukuru varo nozombara zaro. Ami me kambura ombara ya Engipte na imba avehe mbe riyameka ku yo, 26 nu meve yandja momake wa imba mbu mave vanga okuvezepa, okutja oNebukadnesar, ombara ya Babilon, notjimbumba tje tjovita. Nungwari kombunda yanao ovandu mave tura mOengipte rukwao tjimuna indu tji va turire rukuru. Ami, ngu mbi ri Muhona, owami ngu mba hungire.”
Muhona ma yama otjiwaṋa tje
27 “Tjiwaṋa tjandje, o tira;
tjiwaṋa tja Israel, o mumapara.
Ami me ku yama mehi rokokure ndo,
mehi ove mu u ri omuhuurwa.
Mo kotoka konganda, no yekutura mohange;
mo kara nokuhinooma,
nu kape na ngu me ku urumisa.
28 O tira, tjiwaṋa tjandje!
Ami meya kove ne ku vatere.
Me yandeke oviwaṋa avihe mu mbe ku rimba;
nungwari ove himee ku yandeke.
Ami hi nokukuesa nokuhinakukuvera;
nungwari tji me ku vere, me ku vere osemba.
Ami, ngu mbi ri Muhona, owami ngu mba hungire.”
© Herero Revision Bible © Bible Society in Namibia, 2021.
