1 Ami opu mba zokutya kutja e he ya ku eṋe rukwao okuyekumupa oruhoze. 2 Orondu ami tji mbe mu pe oruhoze, owaṋi ngu me ndji nyandisa omutima? Owo mba porwe ami ku mba yandja oruhoze. 3 Ami opu mba zokutjanga orutuu ndwi ku eṋe. Hi vangere okuya ku eṋe nokuyekupewa oruhoze i ovandu, mbatjave ndji nyandisa omutima. Orondu mbi tjiwa nawa, tjiri, kutja ami tji mbi nenyando momutima, eṋe amuhe wina mamu kara nenyando. 4 Ami mba tjanga ku eṋe ambi nomerikendero omanene, nomutima mbwa ṱondjenda, nomahoze omengi. Nu hi mu tjangere okumupa oruhoze, nungwari mbe mu tjangera kutja mu tjiwe kutja mbe mu suvera tjinene amuhe.
Ondjesiro komutataize
5 Nu tji pena ngwa yandja oruhoze komundu, eye ka tjitire nao ku ami, nungwari wa tjiti ku eṋe amuhe poo tji mbi he ri posyo, okotjingi tjeṋu. 6 Komundu otja ingwi omberero ndja pewa i ovengi, ku ye ya yenena opuwo. 7 Nambano omundu otja ingwi mamu sokumuisira nokumupanḓiparisa, kokutja eye a ha ṱoruhoze tjinene nai nga tji me rihahiza okumanuka. 8 Ami opu me zu okuriyarikaṋa ku eṋe kutja, tjiri, mu raise orusuvero ku ye. 9 Tji mba tjanga orutuu ndo, mbe ru tjangera kutja mbi tjiwe kutja eṋe mwa ṱakama momarorero, nokutja eṋe mu nonḓuviro komaraerero wandje aehe. 10 Tji mwa isire omundu ihi tja tjiti, ami wina me isire omundu ngo. Tji pe notjiṋa ngamwa tji mbi sokuisira me tji isire motjimbe tjeṋu komurungu wa Kristus. 11 Satan ke nokusokutjita otjurutjutju ku eṱe. Eṱe ouripura we tu u i nawa.
Paulus mOtroas
12 Nami tji mbe ya mOtroas okuyekuzuvarisa Ombuze Ombwa ya Kristus, mba muna kutja Muhona we ndji ṱunina ondjira yokumuungurira. 13 Nungwari mba ri nongurunguse momutima, tjinga ambi ha mwine omukwetu Titus. Nu tji mba za nokuminika ovandu moṋa mo, arire tji mba i kOmakedonie.
Outoṋi mu Kristus
14 Ndjambi nga pewe ondangero! Eye aruhe u tu hongorera moutoṋi wa Kristus, tjinga atu ri vemwe na Kristus. Nu eye u handjaura ondjiviro ya Kristus mu eṱe akuhe otja ovyomoro omuwa. 15 Orondu eṱe tu ri otja ovyomoro omuwa mbi mavi twimisirwa Ndjambi i Kristus, nu mbi mavi handjaurwa mokati kaimba mbu mave yamwa, na mokati kaimba mbu mave pandjara. 16 Ku imba mbu mave pandjara ovyo omuṋuko wonḓiro mbu zepa; nungwari ku imba mbu mave yamwa ovyo omuṋuko omuwa mbu yandja omuinyo. Nu ngu ma yenene motjiungura hi, owaṋi? 17 Eṱe katu ri otja ovandu ovengi mbe muna otjimariva mokuzuvarisa embo ra Ndjambi. Nungwari Ndjambi tjinga e tu hinda, eṱe tu zuvarisa nongahukiro aihe komurungu we otja ovakarere va Kristus.
© Herero Revision Bible © Bible Society in Namibia, 2021.
