Hiskija ma rire ombara mOjuda
(2Ozo 18:1-3)1 Hiskija wa rira ombara mOjuda e notjiwondo tjozombura omirongo vivari nandano; neye wa honapara mOjerusalem oure wozombura omirongo vivari na muvyu. Ina wa ri Abija, omusuko wa Sakaria. 2 Hiskija wa tjita imbi mbyaa vi tjata ku Muhona, ama horere kotjikaro tjaihe mukururume ombara David.
Omakohororero wondjuwo ya Muhona
3 Momueze omutenga wombura ndji Hiskija tja za nokurira ombara, eye wa paturura omivero vyondjuwo ya Muhona rukwao ne vi ṱunisa. 4 Eye wa woronganisira ovapristeri nOvalevi morupanda rwokomuhuka rwondjuwo ya Muhona, 5 na hungire ku wo mbo, a tja: “Valevi oweṋe, purateneye! Riyapureye oveni nambano, nu kohororeye ondjuwo ya Muhona, Ndjambi wooiho mukururume. Iseye mo oviṋa avihe, mbi mavi zunḓa ondjuwo ya Muhona. 6 OoTate mukururume kava ṱakamene mu Muhona, Ndjambi, nu ave tjiti imbi mbi ha tjatere ku ye. Owo ve mu esa nave yandja omatambo wawo poṋa eye puye rikotamenenwa. 7 Owo va pata omivero vyondjuwo ya Muhona, ave zemisa omamunine, ave ha twimisire ovyomororo omuwa nave ha punguhire ozombunguhiro ozoningiririsiwa mondjuwo ya Ndjambi wa Israel. 8 Muhona opa pindikira Juda na Jerusalem, noviṋa mbya tjitwa ku wo vya kumisa navi urumisa omundu ngamwa auhe. Eṋe mamu tjiwa otjiṋa hi nawa. 9 Ootate va ṱa motjirwa, novakazendu novanatje vetu va twarewa otja ovahuurwa.
10 “Ami nambano mbe rimana okutjita omerikutiropamwe na Muhona, Ndjambi wa Israel, kokutja eye a ha pindikire eṱe rukwao. 11 Vazandu vandje, amu rire ovanavirweyo! Oweṋe mbu mwa toororwa i Muhona okumutwimisira ovyomoro omuwa nokuhongorera ovandu mokurikotamena ku ye.”
12 Ovalevi mbe rirongerera oviungura owo mba:
Monganda ya Kehat va ri Mahat, omuzandu wa Amasai, na Joel, omuzandu wa Asarja.
Monganda ya Merari va ri Kis, omuzandu wa Abdi, na Asarja, omuzandu wa Jehalelel.
Monganda ya Gerson va ri Joak, omuzandu wa Sima, na Eden, omuzandu wa Joak.
13 Monganda ya Elisafan va ri ooSimri na Jeiel.
Monganda ya Asaf va ri ooSakaria na Matanja.
14 Monganda ya Heman va ri ooJehiel na Simi.
Monganda ya Jedutun va ri ooSemaja na Usiel.
15 Owo va woronganisa Ovalevi ovakwao, navehe ve riyapura oveni. Tjazumba otji va uta okukohorora ondjuwo ya Muhona otja ketwako ra Muhona, ombara pu ye ve rakiza okutjita. 16 Ovapristeri va hita mondjuwo ya Muhona okukeikohorora, ave pitisa mo oviṋa avihe ovihakohoke nave vi twa morupanda rwayo. Okuza morupanda ndwi Ovalevi avehe ve vi twara pendje yotjihuro komukutu wa Kidron.
17 Owo va uta oviungura meyuva etenga romueze omutenga, nu meyuva oritjahambondatu romueze tjingewo otji va mana oviungura avihe na indi etuwo romahitiro wondjuwo ya Muhona. Tjazumba va kohorora ondjuwo ya Muhona nave mana omakohororero meyuva ndi oritjamurongo na hamboumwe romueze omutenga.
Ondjuwo ya Muhona mai yapurwa rukwao.
18 Ovalevi va tjivisa ombara Hiskija ave tja: “Eṱe twa mana omakohororero wondjuwo ya Muhona aihe puna otjipunguhiro tjozombunguhiro ozoningiririsiwa noviungurise vyatjo avihe, notjiriro tjozomboroto zOmaraisiro, noviungurise vyatjo avihe. 19 Wina twa kotora oviungurise avihe, ombara Ahas mbya twarere mozombura nḓena tje ha ri nouṱakame mu Ndjambi, nu twe vi yapura rukwao. Ovyo avihe vi ri komurungu wotjipunguhiro tja Muhona.”
20 Ombara Hiskija wa woronganisa ovanane avehe votjihuro nokuhinokuwomba nave i pamwe kondjuwo ya Muhona. 21 Owo va eta ozondwezu hambombari zozongombe, nozonḓu hambombari, nozondjona hambombari, ze rire ombunguhiro yokuisa ko omauvi weṱunḓu rouhona nowotjiwaṋa tja Juda, noyokukohorora ondjuwo ya Muhona. Ombara ya raera ovapristeri, ozondekurona za Aron, kutja ve punguhire ovinamuinyo mbi kotjipunguhiro tja Muhona. 22 Ovapristeri va zepa ozondwezu zozongombe rutenga, tjazumba ave zepa inḓa ozonḓu, tjazumba ave zepa ozondjona nave pemenene ombinḓu yovinamuinyo mbi avihe peke kotjipunguhiro. 23 Korusenina va eta ozongombo kombara na kombongo aihe, nowo va twa omake wawo ku zo. 24 Tjazumba ovapristeri va zepa ozongombo nḓa nave tirire ombinḓu yazo kotjipunguhiro i rire ombunguhiro yokuisa ko omauvi wotjiwaṋa atjihe, orondu ombara ya rakizire kutja ozombunguhiro ozoningiririsiwa nozomauvi ze punguhirwe Israel atjihe.
25 Ombara Hiskija wa yenenisa omaraerero Muhona nga yandjere kombara David notjinyo tja Gad, omumune wombara, notjomuprofete Natan, na kuramisa Ovalevi, mba ri noviharpe nozongoma zovitenda, mondjuwo ya Muhona. 26 Owo va kurama mbo novinangoma tjimuna imbi mbyaa vi nyandwa i ombara David, novapristeri va kurama mbena nozohiva zawo. 27 Hiskija wa rakiza kutja ombunguhiro oningiririsiwa i punguhwe; nombunguhiro tji ya utwa, otjiwaṋa tja tanga Muhona neimburiro, novanyande vovinangoma va uta okutona ozohiva novihumba avihe vyarwe. 28 Auhe ngwa ri mbo wa tjita omerikotameneno, novandu va kara pokuimbura nokunyanda ovihumba nga ozombunguhiro azehe tji za ningiririsiwa. 29 Tjazumba ombara nombongo aihe va wora ozongoro nave rikotamene ku Ndjambi. 30 Ombara Hiskija novanane votjiwaṋa va raera kOvalevi kutja ve imburire Muhona omaimburiro wondangero, nga tjangerwe i David nomuprofete Asaf. Owo otji va imbura nondjoroka onene, ngunda ava woro ozongoro nave rikotamene ku Ndjambi.
31 Hiskija wa raera kotjiwaṋa a tja: “Nambano tjinga amwa yapurirwa Muhona, mu punguhireye ozombunguhiro zokutja okuhepa.” Owo va kara nonḓuviro, nu tjiva vawo wina va eta ovinamuinyo nombango yawo oveni vi punguhwe okurira ozombunguhiro ozoningiririsiwa. 32 Owo va eta ozondwezu zozongombe omirongo hambombari na inḓa zozonḓu esere rimwe nozondjona omasere yevari ze rire ozombunguhiro ozoningiririsiwa ku Muhona. 33 Owo wina va eta ozongombe omasere hamboumwe, nozonḓu 3,000 kutja ze punguhwe. 34 Tjinga ape ha ri ovapristeri mba yenena okuzepa ovinamuinyo avihe mbi, Ovalevi otji ve ve vatera nga oviungura tji vya manuka, novapristeri ovengi otji ve rikohorora. Ovalevi va karere nonḓero tjinene okuyenenisa omerikohororero wawo povapristeri. 35 Mokuweza kozombunguhiro ozengi nḓaa ze ningiririsiwa ovapristeri va ri notjiungura tjokuningirisia ozonḓura nḓaa ze punguhwa okuza mozombunguhiro nḓaa ze riwa i otjiwaṋa, notjokutirira omavinu ngaa e yandjewa puna ozombunguhiro ozoningiririsiwa.
Komuhingo mbwi omerikotameneno otji ya utwa rukwao mondjuwo ya Muhona. 36 Ombara Hiskija notjiwaṋa atjihe va kara nenyando mena rokutja Ndjambi we ve vatere okutjita oviṋa avihe mbi tjimanga nai.
© Herero Revision Bible © Bible Society in Namibia, 2021.
