Onḓiro ya Johanes Omupapitise
(Mk 6:14-29Lk 9:7-9)1 Momayuva ngo Herodes, omunane wOrukondwa rwa Galilea, wa zuvire ohunga na Jesus, 2 na rire tja tja kovakarere ve: “Eye, tjiri, onguri Johanes Omupapitise! Eye wa penduka movakoke, nopa harere omasa nga okutjita ovihimise.”
3 Komurungu wanao Herodes wa rakizire kutja Johanes a kamburwe, a pandekwe, nu matuwe motjovakamburwa. Otjiṋa hi we tji tjitira Herodias, omukazendu womuangu we Filipus. 4 Orondu otjikando tjimwe Johanes Omupapitise wa raerere Herodes a tja: “Kakokuwa okukupa Herodias!” 5 Herodes opa vangera okuzepa Johanes, nungwari aa tira Ovajuda, owo tjinga aave vara Johanes otja omuprofete.
6 Meyuva rongwatero ya Herodes omukazona wa Herodias wa pundira momurungu wovandu avehe. Herodes wa yoroka tjinene nai, 7 nga tje mu kwizikira a tja: “Ami me yana kutja me ku pe ngamwa atjihe tji mo ningire!”
8 Notja komapopero waina ingwi omukazona we mu ningira a tja: “Ndji etera mba nambano nai ihi otjiuru tja Johanes Omupapitise motjiyaha!”
9 Ombara ya ṱoruhoze tjinene, nungwari mena romakwizikiro ngu ya tjitire momurungu wovaṋangwa vayo avehe, arire tji ya rakiza kutja omaningiriro waingwi omukazona ye yenenisiwe. 10 Nopa hindira omukarere umwe a kakonde Johanes otjiuru motjovakamburwa. 11 Nu ihi otjiuru tja etwa motjiyaha, atji yandjewa komukazona, neye e ketjiyandja ku ina. 12 Ovahongewa va Johanes ve ya ave toora orutu rwe nave kerupaka; okuzambo arire tji va i ave kahepura ku Jesus.
Jesus ma parura ovandu omayovi yetano
(Mk 6:30-44Lk 9:10-17Jhn 6:1-14)13 Jesus tja zuvire ihi tji tja tjitirwe ku Johanes arire tja zu po mbo mokayaha na i koṋa ka kakara erike. Novandu tji va zuvire kutja wa i, arire tji va zu mo movirongo vyawo nave mu kongorere pehi. 14 Jesus wa heruka mokayaha, nu tja muna otjimbumba otjinene tjovandu, omutima we arire tji wa ṱondjenda na wo, na verukisa imba mba verere.
15 Nongurova ndjo ovahongewa va Jesus ve ere ku ye nave tja: “Imwi omokuti mwi, neyuva ratoko. Raera ovandu kutja ve yaruke kovirongo ve kerirandere ovikurya.”
16 Jesus wa zira a tja: “Owo kave nokuhepa okuyenda, eṋe oveni ve pee oukurya ve rye!”
17 Owo va zirire ave tja: “Mbi tu na vyo mba ozomboroto ndano ozombomba nozohi mbari.”
18 Jesus arire tja tja: “Ze eteye nguno ku ami.” 19 Eye wa rakiza ovandu kutja ve kare pehi kombanda yehozu; okuzambo arire tja toora inḓa ozomboroto ndano ozombomba nozohi mbari, a tara keyuru, e ze sere ondaya. Eye wa koyora ozomboroto nu e ze yandja kovahongewa ve kutja ve ze haṋe movandu. 20 Novandu avehe va rya nave kuta. Tjazumba ovahongewa ave wongo outekero wozomboroto nowozohi mbwa hupire po nave urisa na wo ovimbamba omurongo na vivari. 21 Novarumendu, mba parurirwe novikurya mbi, va ri omayovi yetano nokuhinovakazendu novanatje.
Jesus ma ka wondja kombanda yomeva
(Mk 6:45-52Jhn 6:15-21)22 Jesus wa raerere kovahongewa ve kutja ve ronde mokayaha nu ve tenge po okuyenda munda mbwina yomuronga, eye ngunda ama hindi ovandu okuyaruka kozoyawo. 23 Nu tja zire nokuhinda ovandu ve yaruke, arire tja karonda kondundu erike okukakumba. Nu tja rira ongurova, Jesus tjandje eye erike mbo, 24 nu moruveze ndwi nai otjiyaha tja ri kokure nomukuro ama tji hara okuteyewa i ozongazona, ombepo tjinga aa i rivete mu tjo.
25 Nu omuhuka omunene wependukirwa pokati kondatu nohamboumwe, Jesus we ere kovahongewa ama wondjo kombanda yomeva. 26 Nowo tji ve mu muna ama wondjo kombanda yomeva va uruma nave tja: “Otjiruru!” Nu momburuma ave uru.
27 Jesus wa hungira ku wo tjimanga na tja: “Yanḓipareye! Owami! Amu tira!” 28 Petrus arire tja hungire a tja: “Muhona, tjinangara tjiri oove, ndji raera mbi ye kove ame wondjo kombanda yomeva.”
29 Jesus wa zirire a tja: “Indjo!” Petrus opa herukira mokayaha na ka wondja kombanda yomeva okuyenda ku Jesus. 30 Nungwari tja muna otjivepo otjinamasa, arire tja tira na utu okuṱomwina momeva; eye wa ravaera a tja: “Muhona ndji vatera!”
31 Tjimanga Jesus wa roporora okuoko kwe e mu kambura na tja: “Ove, munangamburiro okaṱiṱi, wa ivaivire tjike?”
32 Owo aveyevari va karonda mokayaha, nombepo arire tji ya u pehi. 33 Nu imba mba ri mokayaha ve rikotamena ku Jesus ave tja: “Tjiri, oove Omuna wa Ndjambi!”
Jesus ma verukisa ovavere mOgenesaret
(Mk 6:53-56)34 Owo va kondere munda mbwina womuronga ave ya mehi ra Genesaret, 35 nu ovandu va zemburuka Jesus. Opu va kapahera ovavere mehi arihe ndo nave ve eta ku Jesus. 36 Owo ve riyarikaṋa ku ye kutja a yandjere imba mba vera okuṱuna nangarire kotjikoro tjombanda ye; nu avehe mba ṱunine ku yo va verukire.
© Herero Revision Bible © Bible Society in Namibia, 2021.
