2 Samuel 7 - Herero Revision Bible (HRR)

Ombuze ya Natan ku David

1 Nombara David wa katura mondjuwo ye youhona, nu Muhona we mu pa orusuvo kovanavita na ye kominda avihe. 2 David wa tja nai komuprofete Natan: “Tara, ami mba tura mondjuwo ndja tungwa notupapa, nungwari ihi Otjipwikiro tjOmerikutiropamwe wa Ndjambi tji ri mondanda!”

3 Natan wa zira nai kombara: “Osemba uri, tjita ngamwa pu we ripura; orondu Muhona u ri puna ove.” 4 Nungwari ouṱuku tjingewo mbo Muhona wa tja ku Natan: 5 “Twende u karaere komukarere wandje David kutja ami me tja nai ku ye: ‘Indu oove ngu mo ndji tungire ondjuwo i rire omaturiro wandje are? 6 Ami hi na pu mba tura mondjuwo okuza keyuva, ndi mba pitisa Ovaisrael mOengipte nga ku ndinondi; nungwari mba ryanga amba tura mondanda. 7 Akuhe ku mba ryanga puna Ovaisrael avehe, hi na pu mba hungira embo ku umwe wovanane mbu mba zikire okuṱakamisa otjiwaṋa tjandje kutja okutjavi eṋe tji mu hi nakundjitungira ondjuwo ondjapuke yotupapa.’

8 “Otji mo sokuraera omukarere wandje David kutja ami, ngu mbi ri Muhona Omunamasaaehe, me tja nai ku ye: ‘Ami mbe kekuisa kouṱuta wozonḓu mokuti, u yekuhonaparera otjiwaṋa tjandje Israel. 9 Mba kara puna ove akuhe koo i, nu mba nyona ovanavita na ove avehe, ove tjiyo ryama popezu na wo. Me ku tjiti kutja u rire omunane omunene povanane avehe mouye. 10 Ami mba toororera otjiwaṋa tjandje Israel poṋa pu matji tura nokuhinokukurungisiwa; novarunde kave nakutjiṋiṋikiza rukwao tjimuna rutenga. 11 Okuza koruveze ndo, otjo tji tja za nokuhita mehi ndi, tja rwisiwa i oviwaṋa ovindandi, nungwari ihi kamaatji tjitwa rukwao. Ami me tjiti omakwizikiro wokutja me ku suvisa kovanavita na ove avehe, nokutja me ku pe ozondekurona. 12 Tji wa koka no kapakwa kooiho mukururume, ami me ziki omuzandu woye umwe a rire ombara, nu me zeuparisa ouhona we. 13 Eye ongu me ndji tungire ondjuwo ondjapuke, nami me zikamisa ouhona we kutja u karerere nga aruhe. 14 Ami me rire ihe, neye ma rire omuatje wandje. Tja tataiza me mu vere otja ihe tje vera omuatje we. 15 Nungwari ami hi nokuisa ko ombatero yandje ku ye otja tji mba tjita ku Saul, ngu mba isa po kutja ove u rire ombara. 16 Ove aruhe mo kara nozondekurona; nami me zikamisa ouhona woye nga aruhe, nowo kamaau yanda ko.’ ”

17 Natan wa serekarerera David oviṋa avihe Ndjambi mbye mu vandururira.

Ongumbiro ya David yokutja okuhepa

(1Eku 17:16-27)

18 Ombara David wa hita mOndanda yOmahakaeneno, a kara pehi na kumbu a tja: “Muhona Ndjambi wandje, ami hi pwire ku imbi mbi wa tjita ku ami na keṱunḓu randje wina. 19 Nu ingee mo tjiti oviṋa ovingi komurungu, Muhona Ndjambi, ove wa tjitira ozondekurona zandje omakwizikiro mozombura nḓu maze ya. NOve wa tjita kutja omundu a mune otjiṋa hi, Muhona Ndjambi! 20 Nami David, me sora okuhungira tjike kove komurungu! Ove vari mo tjiwa ami, omukarere woye, Muhona Ndjambi! 21 Indji ya ri ombango nondyero yoye okutjita nai; Ove wa tjita oviṋa mbi avihe ovinene kokutja u ndji honge. 22 Ove tjiri, oove omunene, Muhona Ndjambi! Orondu kape na umwe ngwa sana kove; nu kape na Ndjambi warwe posi ya ove otja pu twa zuva oveni. 23 Kape notjiwaṋa tjarwe kombanda yehi tji tja sana kotjiwaṋa tjoye Israel. Otjo otji tji ri otjiwaṋa atjiyerike ove tji wa kutura okurira otjiwaṋa tjove omuini. Oviṋa ovinene novihimise mbi we tji tjitira vye ku etera ondangu mouye auhe. Ove wa ramba oviwaṋa noomukuru vavyo vovisenginina komurungu wotjiwaṋa tjoye hi tji wa kutura mOengipte, tji rire otjoye omuini. 24 Ove we rizikamisira otjiwaṋa tjoye Israel tji rire otjoye nga aruhe, nove, Muhona wa rira Ndjambi watjo.

25 “Nambano, Muhona, Ndjambi wandje, yenenisa omakwizikiro ngu wa tjitira omukarere woye nozondekurona ze nga ko nga aruhe, nu u tjite imbi mbi wa tja mo tjiti. 26 Ondangu yoye mai rire onene, novandu aruhe mave tja nai: ‘Muhona Omunamasaaehe eye Ndjambi wa Israel.’ Nouhona womukarere woye David mau zikama komurungu woye nga aruhe. 27 Muhona Omunamasaaehe, Ndjambi wa Israel! Ami mbi nonḓero okukumba ongumbiro ndji kove, ove tjinga awa raisira ami, omukarere woye, oviṋa mbi, nawe ndji raera kutja mo tjiti ozondekurona zandje okurira ozombara.

28 “Nambano Muhona Ndjambi wandje, oove Ndjambi, nomambo woye ouatjiri; Ove wa tjitira omukarere woye omakwizikiro omahimise nga. 29 Arikana, kara nohange, nu sera ozondekurona zomukarere woye ondaya kutja ze karerere momurungu woye; orondu ove, Muhona Ndjambi, wa kwizika nao, nondaya yoye ngai kare kozondekurona zomukarere woye nga aruhe.”