Jakob ma hakaene na Esau
1 Jakob tja muna Esau ngwa rauka novarumendu ve omasere yane, arire tja haṋa ovanatje kooLea na Rahel novakarere ovakazendu vevari vawo. 2 Neye wa twa imba ovakarere novanatje vawo komurungu, tjazumba ooLea novanatje ve kombunda yawo, tjazumba ooRahel na Josef kombundambunda. 3 Jakob omuini arire tje ve hongorere ne ripete pehi ovikando hambombari nga tja vaza kerumbi re. 4 Nungwari Esau wa utuka okumutjakanena ne mu pukata ne ripetere kosengo ye, narire tje mu hupite, nowo aveyevari ave riri. 5 Nu Esau tja yevayeva na munu ovakazendu wa pura a tja: “Ovandu veṋe mba, mbe ri puna ove?”
Jakob wa zira na tja ku ye: “Imba ovanatje Ndjambi mba yandja komukarere woye motjari tje.” 6 Nu imba ovakarere ovakazendu ve ya puna ovanatje vawo nave ripete. 7 Tjazumba Lea novanatje ve ve ya, nu korusenina ooJosef na Rahel ve ya nave ripete wina.
8 Esau arire tja pura na tja: “Otupanda tu mba hakaene na two ngwina matu hee tjike?”
Jakob wa zira nai: “Matu hee kutja mbi mune ondjingonekero move, muhona wandje.”
9 Nu Esau wa tja: “Kako, arikana! Ami mbi na vyo opuwo, muangu wandje. Imbi ovyoye, ṱokukara na vyo.”
10 Nu Jakob arire tja ziri nai: “Ayee, ami tji mba munu ondjingonekero move, kambura imbi oviyandjewa meke randje. Orondu okumuna omurungu woye ku ami tjimuna okumuna omurungu wa Ndjambi, kokutja ove wa kara nohange na ami nai. 11 Arikana, yakura ihi otjiyandjewa ami tji mbe ku etere. Ndjambi wa kara notjari na ami ne ndji pe avihe, mbi mba hepa.” Nu Jakob otje mu kondjisa nokuriheka, ngandu Esau tja ṱokukambura.
12 Esau opa tjera nai: “Ngatu rirongerere nu tu yende, ami me kayenda komurungu woye.”
13 Jakob wa zira na tja: “Muhona wandje, ove mo tjiwa kutja ovanatje vandje ingee ovingundi, nokutja mbi nozonḓu ozondaambe nozongombe ozondaambe, nu tji za hingwa tjinene nangarire oure weyuva rimwe, maze koka azehe. 14 Narikana, muhona wandje, kayende komurungu wandje, nami me kongorere kaṱiṱi ami kayenda otja pu me sora nozongombe novanatje, nga tji me kekuvaza mOseir.”
15 Esau arire tja tja: “Nu ndji esa mbi sye ovandu vandje tjiva puna ove mba.”
Nungwari Jakob wa zira a tja: “Imbo kahepero; tji me zeri porwatjo okongwi okumuna ondjingonekero move!” 16 Eyuva ndo Esau otja kayenda mondjira ye okuyaruka kOseir. 17 Nungwari Jakob wa ya kOsukot ne keritungira ondjuwo noviunda vyomaso vyovinamuinyo vye. Otjirongo ope tji rukira Sukot, okutja “Otumbo”.
18 Jakob wa vaza nawa kotjihuro Sikem mehi ra Kanaan mokukotoka kwe okuza kOmesopotamie; neye wa tona ozondanda ze komurungu wotjihuro. 19 Neye wa randa otjitamba pa zika ondanda ye kovazandu va Hamor, ihe ya Sikem, kovimariva ovisilveri esere rimwe. 20 Imbo wina wa tunga po otjipunguhiro, ne tji ruku “Ndjambi wa Israel eye Ndjambi”.
© Herero Revision Bible © Bible Society in Namibia, 2021.
