Ondanda yOmahakaeneno
(Eks 36:8-38)1 “Nu inga omaturiro mo ye ungura nomarapi omurongo, nga tungwa nozosepa ozoheze; ovivara vyomarapi ngavi rire ovirovazu noviserarovazu noviserandu pyu; nu momarapi ngamu tungirwe oviserekarera vyovakerubi mbya tungwa nounongo. 2 Erapi arihe nga ri kare nozometa omurongo na mbari koure, nozometa mbari kouparanga. Omarapi aehe ngaye ṱekasane. 3 Omarapi yetano ngaye hondjerwe kumwe ye rire otjivangwa tjimwe, na inga yetano yarwe omuhingo tjingewo. 4 Ove twako omahuha werapi erovazu kotjikoro tjopendje tjotjivangwa atjihe. 5 Twa ko omahuha yotjivangwa ihi otjitenga, nomahuha omirongo vitano kerapi esenina rotjivangwa ihi otjitjavari. Omahuha nga ngaye hitasane. 6 Wina ungura oupate omirongo vitano wongoldo, nu u pate na wo kumwe imbi ovivangwa vivari kutja vi rire Ondanda yOmahakaeneno.
7 “Wina ungura omarapi omurongo na rimwe pomainya wozongombo ye rire otjikutjire kombanda yOndanda yOmahakaeneno. 8 Erapi arihe nga ri kare nozometa omurongo nandatu koure, nozometa mbari kouparanga. Inga omarapi aehe omurongo na rimwe ngaye ṱeke pamwe. 9 Omarapi yetano ye waneka kumwe peke, na wina inga hamboumwe yarwe peke. Nu erapi ndi oritjahamboumwe yanga kumwe komunda wokomurungu wondanda. 10 Nu ove twako omahuha omirongo vitano kotjikoro tjerapi ndi esenina rotjivangwa tjimwe, nomahuha omirongo vitano kotjikoro tjerapi rotjivangwa ihi otjikwao. 11 Nu ove ungura oupate omirongo vitano wongoporo, noupate mbwi hweka momahuha; nu waneka ovinganwa mbi vivari kumwe kutja vi rire otjiṋa tjimwe. 12 Orumbembera rwerapi ndi ndi mari rekareka kombanda yondanda ngaru rekarekisiwe kongotwe yOndanda yOmahakaeneno. 13 Nu indji ohinga yometa, ndji ri komikuma aviyevari vyoure womarapi yondanda, nga ri rekareke komikuma aviyevari vyOndanda yOmahakaeneno okuikutjira.
14 “Ove wina ungura otjikutjire tjOndanda yOmahakaeneno pomikova vyozondwezu zozonḓu mbya seraerisiwa, notjikutjire otjikwao pomikova vyozombwa zomeva, nu ihi otjikwao u yare kombanda yotjikutjire ihi otjitenga.
Otutapo twOndanda yOmahakaeneno
15 “Ove wina ungura otutapo twomue twOndanda yOmahakaeneno tu zikwe oseka. 16 Orutapo aruhe ngaru kare noure wozometa ine, nouparanga wozosentimeta omirongo hamboumwe na hamboumwe. 17 Nu orutapo aruhe ngaru kare nomatota yevari ngu maye tu hondjere kumwe. Tjita nao kotutapo atuhe twOndanda yOmahakaeneno. 18 Ungura otutapo omirongo vivari komukuma wokeyuva kokumuho, 19 nozombaze ozosilveri omirongo vine kehi yotutapo omirongo vivari, okutja ozombaze mbari kehi yorutapo aruhe peke, okuṱakamisa inga omatota warwo yevari. 20 Wina komukuma warwe wOndanda yOmahakaeneno, imbwi wokeyuva kokunene, ungura ko otutapo omirongo vivari, 21 nozombaze zatwo ozosilveri omirongo vine, ozombaze mbari kehi yorutapo aruhe peke. 22 Nu komukuma wokongotwe wOndanda yOmahakaeneno, kuṱa komunda wokongurova, ungura ko otutapo hamboumwe, 23 na wina otutapo tuvari twokovikoro vyOndanda yOmahakaeneno komukuma wokongotwe. 24 Otutapo twi twokovikoro matu wanisiwa kehi, natu pambwa kumwe nga kombanda pongoho ondenga. Itwi otutapo tuvari tu matu tjiti ovikoro vivari, ngatu ungurwe komuhingo tjingewo. 25 Notji mape kara otutapo hambondatu, nozombaze ozosilveri omurongo na hamboumwe, mbari kehi yorutapo aruhe peke.
26 “Ove wina ungura omiti omityakaṋa mbya ungurwa pomue, vitano vi rire ovyotutapo twi twomunda umwe wOndanda yOmahakaeneno, 27 nomiti omityakaṋa vitano vi rire ovyotutapo twomunda warwe wOndanda yOmahakaeneno, wina omiti omityakaṋa vitano vi rire ovyotutapo twomunda wokongotwe, komukuma wokongurova. 28 Nomuti omutyakaṋa womokati ngau tyakaṋe mokati kotutapo okuza kotjikoro nga kotjikoro. 29 Nu hamburira ko ongoldo ku itwi otutapo; nu twako ozongoho zongoldo ku two okuṱiza imbi omiti omityakaṋa ku maku hamburirwa ongoldo wina. 30 Nai otji mo tungu indji Ondanda yOmahakaeneno otja kotjisanekero tji wa raisirwa kondundu.
Erapi etjizikize
31 “Wina ungura erapi etjizikize rokomurungu pomarapi womavara omarovazu nomaserarovazu nomaserandu pyu, na porupera ndwa tungwa nozosepa ozoheze; ri ungura nounongo, nu u tungire mo oviserekarera vyovakerubi. 32 I rekarekisa kozongunḓe ine zomue, nḓa tuwa ko ongoldo, nu nḓa kurama kozombaze ine zosilveri. 33 Nu rekarekisa erapi etjizikize ndi kovipa, nu twa ihi Otjipwikiro tjOmerikutiropamwe kongotwe yerapi ndi etjizikize. Komuhingo mbwi indi erapi etjizikize ma rire otjihaṋe pokati kOtjouyapuke nOtjouyapukeyapuke. 34 Nu twako otjikamo kOtjipwikiro tjOmerikutiropamwe tji tji ri mOtjouyapukeyapuke. 35 Ihi otjiriro twa posi yerapi etjizikize; notjikurameno tjomamunine twa ouhunga notjiriro komukuma wokokumuho kweyuva kwOndanda yOmahakaeneno. Nungwari ihi otjiriro twa komukuma wokokunene kweyuva.
36 “Nove twa po erapi etjizikize pomahitiro wondanda wina, nda ungurwa pomarapi womavara omarovazu nomaserarovazu nomaserandu pyu, na porupera ndwa tungwa nozosepa ozoheze; ngai rire erapi romavara omengi. 37 Erapi ndi ri ungurira ozongunḓe ndano pomue, nu u twe ko ongoldo ku zo. Novipa vyazo wina ngavi rire ovingoldo; nu ze hamburira ozombaze ndano zongoporo.
© Herero Revision Bible © Bible Society in Namibia, 2021.
