Genesis 35 - Herero Revision Bible (HRR)

Ndjambi ma sere Jakob ondaya mObetel

1 Ndjambi wa tja ku Jakob: “Rirongera u yende kObetel nu u kature ngo; nu katungire ko Ndjambi otjipunguhiro, ngwe rimunikisire kove, ove tji wa taura kerumbi roye Esau.”

2 Tjazumba Jakob otja raera kovondjuwo ye na ku imba avehe mbu va ri pamwe, na tja: “Imbiraheye oviserekarera vyovisenginina mbi mu na vyo, nu rikohororeye nu zareye ozombanda ozongohoke. 3 Eṱe muno matu tjindi, nu matu i kObetel, nu me katungira Ndjambi otjipunguhiro koṋa ngo: Eye ongwe ndji vatera meyuva rombamisiro yandje, nongwa kara puna ami ngamwa akuhe ku mba ya.” 4 Nowo arire tji va yandja imbi oviserekarera vyovisenginina avihe, mbi va ri na vyo, ku Jakob, nozomburi nḓuyave zara momatwi wawo; neye we vi paka kehi yomumborombonga mbwa ri popezu na Sikem.

5 Nungwari Jakob novazandu ve tji va uta okukayenda, ondira onene okuza ku Ndjambi, ya wira kovihuro mbye ve kovera; novandu kave tezere ovazandu va Jakob. 6 Jakob novandu ve avehe va ya kOlus, ena rarwe oBetel, tji tja ri mehi ra Kanaan; 7 na katunga ko otjipunguhiro, nu poṋa mbo e pe ruku El Betel, okutja Ndjambi wa Betel, Ndjambi tjinga e rimunikisa ku ye mbo, eye tja taura komurungu werumbi re. 8 Debora, omuṱakamise wa Rebeka, arire tja koka; neye wa pakwa kehi yomumbonde komanene wa Betel. Nu imbwi omuti otji wa rukwa “Omumbonde wOruhoze”.

9 Nu Jakob tja kotoka kObetel okuza kOmesopotamie, Ndjambi we rimunikisa ku ye rukwao, ne mu sere ondaya. 10 Nu Ndjambi wa tja ku ye: “Ena roye oove Jakob; nungwari okuzamba oro mari rire Israel.” Eye otja rukwa Israel. 11 Ndjambi arire tja tja ku ye: “Owami Ndjambi Omunamasaaehe. Kara norukwato u takavare. Ove mo kara nozondekurona ozengi, nu mu zo mamu zu ozombara, nu maze rire omihoko omingi. 12 Ami me ku pe ehi ndi mba yandja kooAbraham na Isak. Noro me ri yandja kozondekurona zoye wina kombunda yoye.” 13 Nu Ndjambi arire tje mu esa poṋa mba pu ya hungirire na ye, narire tja rondo. 14 Jakob otja zika po ewe rotjizemburukiro poṋa mbo, Muhona pa hungira na ye, na tirire ko ombunguhiro yomavinu nomaze womiṋinga ku ro. 15 Nu poṋa mbo Jakob we pe ruka Betel.

Onḓiro ya Rahel

16 Nowo va tjinda okuza mObetel. Nu ngunda ve hiya kaseka okuvaza kOefrat, oruveze rwokupanduka kwa Rahel arire tji rwa yenene. Neye wa kara nouzeu ounene mombandukiro. 17 Nu ngunda e nouzeu nai mombandukiro, omukazendu omupandukise arire tja tja: “O tira, orondu okazandu rukwao.” Omuinyo we ngunda amau piti 18 tjinga a ri pokukoka, otje mu ruka Ben-Oni, okutja “Omuzandu woruhoze rwandje”. Nungwari ihe we mu ruka Benjamin, okutja “Omuzandu wOuṋingandu”.

19 Nu Rahel tja koka wa pakwa mondjira, ndji yenda kOefrat, tji tji ri Betlehem. 20 Jakob arire tja twako ewe rotjizemburukiro keyendo; nu indi oro ewe rotjizemburukiro tjeyendo ra Rahel nga ndinondi. 21 Nu Israel wa tjinda na katona ondanda ye munda mbwina ya Migdal-Eder.

Ovazandu va Jakob

(1Eku 2:1-2)

22 Nu Israel ngunda a ri mehi ndo, Ruben wa rara pu Bilha, omukazendu omumbanda wa ihe. Nu otjiṋa hi tja horoka ku Israel.

Jakob wa ri novazandu omurongo na vevari. 23 Imba ovazandu va Lea va ri Ruben, everi ra Jakob; tjazumba ooSimeon na Levi na Juda na Isakar na Sebulon. 24 Imba ovazandu va Rahel va ri ooJosef na Benjamin. 25 Imba ovazandu va Bilha, omukazendu omukarere wa Rahel, va ri ooDan na Naftali. 26 Novazandu va Silpa, omukazendu omukarere wa Lea, va ri ooGad na Aser. Imba ombe ri ovazandu va Jakob, mba kwaterwa mOmesopotamie.

Onḓiro ya Isak

27 Jakob weya ku ihe Isak kOmamre, popezu notjirongo Kirjat-Arba, tji tji ri Hebron, ku kwa turire ooAbraham na Isak otja ovozonganda. 28 Isak wa ri nozombura esere rimwe nomirongo hambondatu. 29 Neye wa koka a kurupa, nu wa pakwa i ovazandu ve ooEsau na Jakob.