Ovanatje nozondekurona za Ruben
1 Inḓa ozo ozondekurona za Ruben, otjiveri tja Jakob. Nu Ruben tjinga a rarere pomukazendu umwe omumbanda wa ihe otja yekerwe ousemba wourumbi, nousemba mbwi wa yandjerwe ku Josef, omuzandu wa Jakob. 2 Omuhoko wa Juda ombwa rira omunamasa tjinene pu avihe, nu omu mwa za ombara yomihoko avihe, nungwari imbwi ousemba wourumbi wa rira owa Josef. 3 Ruben, otjiveri tja Jakob, wa ri novazandu vane: OoHenok na Palu na Hesron na Karmi.
4 Ozondekurona za Joel, okuza komuhoko nga komuhoko, ozo nḓa: OoSemaja na Gog na Simi 5 na Mika na Reaja na Baal 6 na Beera. Tiglat-Pileser, ombara ya Asirie, wa twara Beera, omunane womuhoko, mouhuura.
7 Membo romaṱunḓu mwa tjangwa oviuru vyozonganda zomuhoko wa Ruben nda: OoJeiel na Sakaria, 8 na Bela, omuzandu wa Asa, ngwa ri omuzandu wa Sema, ngwa ri omuzandu wa Joel. Onganda ya Joel ya turire mOaroer na morukondwa rwehi okuza komukuma wokeyuva kokunene nga kOnebo na Baal-Meon. 9 Owo va ri notupanda otuingi mehi ra Gilead, notji va kambura ehi, ndi ri komukuma wokomuhuka wokuti onguza, ku kwa ya nga konḓonḓu Eufrat.
10 Momayuva wombara Saul, omuhoko wa Ruben wa rwisa Ovahagari, au ve zepa movita, nau kambura ehi rawo arihe nda ri komukuma wokomuhuka wa Gilead.
Ozondekurona za Gad
11 Omuhoko wa Gad wa turire komukuma wokeyuva kokunene kwomuhoko wa Ruben, mehi ra Basan nga kOsalka. 12 Joel ongwa ri otjiuru tjonganda, nu Safam, ongwa ri otjiuru tjonganda oitjavari. Janai na Safat va ri ovahongore wozonganda zarwe mObasan. 13 Ovandu varwe vomuhoko va ri ovozonganda nḓa hambombari: OoMikael na Mesulam na Seba na Jorai na Jakan na Sia na Eber. 14 Owo va ri ozondekurona za Abihail, omuzandu wa Huri, nu ooihe mukururume va Huri va kongorerasana nai: OoAbihail na Huri na Jaroak na Gilead na Mikael na Jesisai na Jakdo na Bus. 15 Ahi, omuzandu wa Abdiel, omuzandu wa Guni, wa ri otjiuru tjozonganda nda. 16 Ozo za turire mehi ra Basan na mOgilead, na movirongo vyomahi nga, na momahi womaryo wa Saron. 17 Imba avehe va tjangwa momambo womihoko moruveze rwa Jotam, ombara ya Juda, na moruveze rwa Jerobeam, ombara ya Israel.
Ovimbumba vyovita vyomihoko vyokomuhuka
18 Momuhoko wa Ruben nowa Gad na morumbembera rwomuhoko wa Manasse mwa ri ovarwe wovita 44 760, mba hongerwe nawa okurwa notuvao nomangaruvyo nomauta. 19 Owo va ya kovita okukarwisa Ovahagari nOvajetur nOvanafis nOvanodab. 20 Owo ve riyameka ku Ndjambi nave kumbu ombatero ku ye; nu Ndjambi we ve zuvira ozongumbiro zawo ne ve tjiti kutja ve havere Ovahagari na imba overikutevakumwe na wo. 21 Nu va huura ozongamero 50,000, nozonyanda 250,000, nousino 2,000 kovanavita na wo. Wina va huura ovandu 100,000. 22 Nowo va zepa ovanavita ovengi, ovita mbi tjinga avya ri otja kombango ya Ndjambi. Owo va kara pokutura mehi ndo, ngandu indu tji va huura.
Ozondekurona zomuhoko wa Manasse wokomuhuka
23 Omuhoko wa Manasse wokomuhuka wa tura mehi ra Basan nga komukuma wokeyuva kokunene kwa Baal-Hermon na Senir na kondundu Hermon, novandu vawo va takavarera ko. 24 Oviuru vyozonganda zawo vya ri mbi: OoEfer na Isi na Eliel na Asriel na Jeremia na Hodawja na Jakdiel; owo va ri ovarwe ozombanḓe novanane wozonganda zawo ovatjiukwa.
Omihoko vyokomuhuka mavi pitisiwa
25 Nungwari ovandu kava ri nouṱakame mu Ndjambi wooihe mukururume, nu otji va poka ku ye nave karere oomukuru voviwaṋa Ndjambi mbya ramba mehi. 26 Ndjambi otja tjita Pul, ombara ya Asirie, wina ngu isanewa Tiglat-Pileser, kutja a rwise ehi rawo. Eye wa huura omuhoko wa Ruben nowa Gad nomuhoko wa Manasse wokomuhuka, ne ve turisa mehi ra Halak nora Habor nora Hara, na meṋe yonḓonḓu Gosan nga ku ndinondi.
© Herero Revision Bible © Bible Society in Namibia, 2021.
