Ongumbiro yomuhinandjo
Ongumbiro ya David.
1 Muhona, puratena komeriyarikaṋeno
wandje wousemba;
zuva ondjuriro yandje!
Puratena kongumbiro yandje,
ndji me kumbu nouatjiri.
2 Ove mo ndji pangura osemba,
tjinga au tjiwa ouatjiri auhe.
3 Ove u tjiwa omutima wandje.
Ove weya ku ami mouṱuku;
wa konḓonona omutima wandje,
no ha munu ouvi mu ami.
4 Ami hi hungire ouvi otja ovandu varwe tji ve tjita.
Mba kara nonḓuviro komarakiza woye,
nu hi kongorerere kozondjira zoutwe.
5 Aruhe mba ryanga mondjira yoye,
nu hi yepere mu yo.
6 Ami me kumbu kove, Ndjambi,
orondu ove u ndji zuvira;
peta okutwi kwoye u puratene komambo wandje.
7 Raisa orusuvero rwoye oruhimise, u ndji yame;
ove u ndjipa ondjamo
nondjitjevere kovanavita na ami.
8 Ndji ṱakamisa otja onḓoromwina meho roye;
ndji undika momuzire wovivava vyoye
9 kovanauvi mbe ndji rwisa.
Ovanavita ovazepe novindandi mbe ndji kovera;
10 owo kave nondjenda, nu ve rihiva.
11 Ngamwa akuhe ku me i owo ve ndji kovera,
amave kondjo okundjinata.
12 Owo ve ri otja ozongeyama,
nḓa rarere okundjinyondorora.
13 Indjo, Muhona! Pirukira ovanavita
na ami nu u ve havere!
Ndji yama kovanauvi nengaruvyo roye;
14 ndji yama kovandu mbe noviṋa
avihe mbi ve zera kombanda yehi.
Ve vera nomihihamo ove mbi we ve pwikira;
ngape kare mbya yenene kovanatje vawo
nu pe hupe tjiva kovanatje vovanatje vawo!
15 Nungwari ami me munu omurungu woye,
tjinga ambi ha tjitire ouvi;
nu tji mba penduka,
me kovisiwa i ombunikiro yoye.
© Herero Revision Bible © Bible Society in Namibia, 2021.
