Hagar na Ismael
1 Sarai, omukazendu wa Abram, ke mu pandukirire ovanatje. Neye wa ri nomukarere omukazendu Omuengipte, ngwa rukirwe Hagar. 2 Nu Sarai wa tja ku Abram: “Nambano tara, Muhona we ndji pata okupanduka. Nu arikana kahite komukarere wandje omukazendu; ngahino eye me ndji etere orukwato.” Nu Abram wa zuva ku Sarai. 3 Sarai otja yandja Hagar, omukarere we omukazendu Omuengipte, ku Abram a rire omukazendu we. Ihi tja tjitwa, Abram tja za nokutura ozombura omurongo mOkanaan. 4 Abram wa rara pu Hagar, neye wa rira otjingundi. Hagar tja muna kutja wa rire otjingundi arire tje ritongamisa na nyengura Sarai.
5 Nu Sarai wa tja ku Abram: “Omena roye Hagar tji ma tjiti ouhasemba mbwi ku ami. Owami ngu mbe mu yandja mekoro roye; nambano tja munu kutja wa rire otjingundi me ndji nyengura. Muhona nga pangure pokati ketu na ove.”
6 Abram wa zira a tja: “Osemba, eye omukarere woye, nu u ri kehi youvara woye. Tjita otja pu movanga ku ye.” Nu Sarai we mu tatumisa, nu Hagar arire tja taura.
7 Nomuengeri wa Muhona wa muna Hagar poruharwi mokuti onguza, mondjira yokuyenda kOsur, 8 na pura nai: “Hagar, mukazendu omukarere wa Sarai, mo zu pi, nu mo i pi?”
Neye wa zira a tja: “Ami mba taurisiwa i omuhona wandje oserekaze Sarai.”
9 Nomuengeri wa Muhona wa tja ku ye: “Twende, yaruka komuhona woye, nu u kerisusuparise kehi youvara we.” 10 Tjazumba omuengeri wa Muhona arire tja tja: “Ami me ku pe ozondekurona ozengi, nga tji ze hi nokusora okuvarwa. 11 Tara, mo panduka omuzandu ngu mo ruku Ismael; orondu Muhona tja zuvira ondjuriro yoye mouzeu woye. 12 Nomuzandu woye ma hupu otja ongoro yokuti; ma rwisa ngamwa auhe, nu ngamwa auhe me mu pirukire. Neye ma tura mohaṋikiro nu ma nyengwa ovazamumwe ve.”
13 Nu Hagar wa isana ena ra Muhona ngwa hungira puna ye: “Ove oove Ndjambi, ngu u muna.” Orondu eye wa tja: “Ami, tjiri, mba munu ingwi umwe ngu me ndji munu.” 14 Owo opu va isanena ondjombo ndji: Ondjombo yOmunamuinyo ngu me ndji munu. Oyo ya ri pokati kooKades na Bered.
15 Nu Hagar wa pandukira Abram omuzandu; nu Abram we mu ruka Ismael. 16 Abram wa ri nozombura omirongo hambondatu na hamboumwe, Hagar tje mu pandukira Ismael.
© Herero Revision Bible © Bible Society in Namibia, 2021.
