2 Ekuruhungi 13 - Herero Revision Bible (HRR)

Ovita vya Abija kuna Jerobeam

1 Mombura oitjamurongo na hambondatu youhona wa Jerobeam, ombara ya Israel, Abija otja rira ombara ya Juda. 2 Neye wa honapara oure wozombura ndatu mOjerusalem. Ina wa ri Mikaja, omusuko wa Uriel, ngwa zire kotjihuro Gibea.

Nu pa kara ovita pokati ka Abija na Jerobeam. 3 Abija wa uta ovita notjimbumba tjovarwe ozombangaṋe 400,000, nu Jerobeam we mu rwisa notjimbumba tjovarwe ozombangaṋe 800,000.

4 Ovimbumba mbi vyovita vya hakaenena mehi rozondundu ra Efraim. Ombara Abija wa karonda kondundu ya Semarajim na karavaera ku Jerobeam na kOvaisrael a tja: “Purateneye ku ami! 5 Kamu nokutjiwa kutja Muhona, Ndjambi wa Israel, wa tjita omerikutiropamwe na David omahateyewa na yandja ouhona ku ye na kozondekurona ze kutja ze honaparere Israel nga aruhe are? 6 Jerobeam, omuzandu wa Nebat, wa pirukira ombara ye Salomo. 7 Kombunda eye wa woronganisa otjira tjovandu oviporoporo, nowo va ṋiṋikiza Rehabeam, omuzandu wa Salomo, ngwa ri omutanda tjinene, nu ngwa ri nomutima omupupu, okutjita ombango yawo, nga tjaa ha yenene okupanḓa ku wo. 8 Nambano eṋe mwe rimana okurwisa ouhona Muhona mbwa yandja kozondekurona za David, eṋe tjinga amu ri otjimbumba otjinene tjovita, nu tjinga amu nozondwezu zozongombe zongoldo Jerobeam nḓa ungura okurira oomukuru veṋu vovisenginina. 9 Eṋe mwa ramba ovapristeri va Muhona, ozondekurona za Aron, nu mwa ramba Ovalevi wina. Moruveze rwawo mwa zika ovapristeri varwe otja oviwaṋa vyarwe pu vi tjita. Auhe ngu meya nondwezu yongombe poo nozondwezu hambombari zozonḓu ma pu pokuyakurwa otja omupristeri woomukuru veṋu vovisenginina.

10 “Nungwari eṱe ingee tu karera Muhona, Ndjambi wetu, nu katuye mu esa. Ovapristeri, imba ozondekurona za Aron, ve ungura oviungura vyawo, nOvalevi ve ve vatera. 11 Omuhuka nongurova aihe owo ve mu twimisira ovyomoro omuwa, nu ve mu punguhira ozombunguhiro ozoningiririsiwa. Owo ve eta ozomboroto zomaraisiro kotjiriro otjikohoke, nongurova aihe ve yakisa omamunine wotjikurameno tjongoldo. Eṱe tu tjita imbi Muhona mbya rakiza, nungwari eṋe mwe mu esa. 12 Ndjambi omuini eye omuhongore wetu, novapristeri ve owo mba nozohiva; va rongere okuzetona nokutuisana kotjirwa tjetu kuna eṋe. Vaisrael, amu rwisa Muhona, Ndjambi wooiho mukururume! Kamaamu toṋa!”

13 Jerobeam tjandje wa hinda ovandu tjiva votjimbumba tje tjovita okukarwisira ihi tjOvajuda okuza kongotwe, ngunda ihi otjikwao ama tji ve rwisire okuza komurungu. 14 Ovajuda va yevayeva nave munu kutja va koverwa. Owo va kwa ombatero ku Muhona, novapristeri va tona ozohiva. 15 Ovajuda va ravaera nomasa, nowo va rwa amave hongorerwa i Abija. Ndjambi wa havera Jerobeam notjimbumba tjOvaisrael tjovita. 16 Ovaisrael va taura kOvajuda, nu Ndjambi wa tjita kutja Ovajuda ve ve havere. 17 Abija notjimbumba tje tjovita va havera Ovaisrael tjinene; pa ṱa ovarwe vOvaisrael wovita ozombangaṋe mangara 500,000. 18 Ovajuda va havera Ovaisrael mena rokutja va kara nouṱakame mu Muhona, Ndjambi wooihe mukururume.

19 Abija wa tezera otjimbumba tja Jerobeam tjovita na huura ovihuro vye tjiva mbi: Betel na Jesana na Efron, novirongo mbya kondoroka ovihuro mbi, atjihe peke. 20 Jerobeam ke na pa kazikamisa ouhona we rukwao, Abija ngunda a ri ombara. Korusenina Muhona we mu zepa tjimanga.

21 Nungwari Abija wa ririra ko omunamasa mouhona. Eye wa ri novakazendu omurongo na vane, nu wa kwata ovanatje ovazandu omirongo vivari na vevari, novakazona omurongo na hamboumwe. 22 Ekuruhungi ekwao ra Abija, oviṋa mbya hungira na mbya tjita, vya tjangwa mEkuruhungi romuprofete Ido.