1 Nu Paulus wa siririka omeho we mOtjira tjOvajuda na tja: “Vaisrael ovakwetu! Omeritjiviro wandje womorukoro owo omakohoke tjiri momuhingo mbu mba kara na wo komurungu wa Ndjambi nga ku ndinondi.” 2 Omupristeri Otjiuru Ananias wa rakiza ovandu mba mba kuramene pu Paulus kutja ve mu tone kotjinyo. 3 Paulus a tja ku ye: “Ndjambi, tjiri, mee ku tono, ove kamunatjavivi! Ove wa haama mbo okundjipangura otja kOmatwako, nungwari ove mo katuka Omatwako indu tji motja nga tonwe!”
4 Ovarumendu, mba kuramene meṋe ya Paulus arire tji va tja ku ye: “Ove mo yamburura Omupristeri Otjiuru wa Ndjambi nao!”
5 Paulus a ziri a tja: “Vaisrael ovakwetu, ami hi tjivirwe kutja eye Omupristeri Otjiuru. Omatjangwa maye tja: ‘Ove ko nokusokuyamburura omunane wotjiwaṋa tjeṋu.’ ”
6 Paulus tja muna kutja ovandu tjiva motjira Ovasaduke nu tjiva Ovafarisei arire tja ravaere motjira a tja: “Vaisrael ovakwetu! Ami owami Omufarisei, omukwatwa wOvafarisei. Ami nai me pangurirwa omaundjiro ngu mbi na wo wokutja ovakoke mave pendurwa komuinyo!”
7 Tjimanga Paulus tja za nokuhungira omambo nga, Ovafarisei nOvasaduke ave utu okupatasana, notjira atji haṋika pevari. 8 Orondu Ovasaduke ve tja kape nombendukiro yovakoke, nokutja kape novaengeri nozombepo; nungwari imba Ovafarisei ve kambura moviṋa aviyetatu mbi. 9 Nu pa kara ondokohero onene, nozonongo zomambo tjiva vomukuma wOvafarisei va sekama nave patasana tjinene ave tja: “Eṱe katu nokumuna ondjo momurumendu ngwi! Ngahino ombepo poo omuengeri ngwa hungire na ye!”
10 Ozombata za ririra ko ozonḓeu tjinene nga omuhongore wovita tja tira kutja owo mave nyondorora Paulus. Eye opa rakizira ovarwe ve wovita kutja ve kahakane Paulus mokati kotjira nu ve mu tware komaturiro wawo.
11 Nu mouṱuku mbo Muhona wa kuramene pu Paulus na tja: “O tira! Ove we ndji hongonona muno mOjerusalem, nu wina katjite tjingetjo mOroma.”
Omerikutirokumwe wokuvanga okuzepa Paulus
12 Nomuhuka wependukirwa Ovajuda tjiva va woronganene nave ripura pamwe. Owo va yanasanena kutja kave nokurya nokunwa nga tji va zepa Paulus. 13 Ovarumendu mbe ripura pamwe otjiṋa hi va ri kombanda yomirongo vine. 14 Tjazumba arire tji va i kovapristeri oviuru novanene ave katja: “Eṱe twa yanasanena kutja kamaatu ri otjikurya nga tji twa zepa Paulus. 15 Nambano eṋe nOtjira tjOvajuda hindeye ombuze komuhongore wovita wa Roma yokutja a ete Paulus nguno ku eṱe, aayo tjimuna eṋe mamu vanga okutjiwa nawa komeho, tjiri, ongarero ye. Neṱe matu rirongerere okumuzepa ngunda e hiya vaza mba.”
16 Nungwari omusya wa Paulus wa zuvire omerikutirokumwe nga; neye opa ira komaturiro wovarwe wovita okukaraera Paulus. 17 Paulus arire tja isana omukarere umwe na tja ku ye: “Twara omuzandona ngwi komuhongore wovita; eye u nembo okukemuraera.” 18 Omukarere we mu toora e mu twara komuhongore wovita na tja: “Omupandekwa Paulus we ndji isana ne ndji ningire kutja mbi ete omuzandona ngwi kove, eye tjinga e nembo okuhungira kove.”
19 Omuhongore wovita arire tje mu kambura pokuoko e mu twara peke ne kemupura nai: “Otjikwatjike tji movanga okundjiraera?”
20 Eye wa tja: “Ovahona vOvajuda va itavere okukuningira muhuka kutja u tware Paulus kOtjira tjOvajuda rukwao, aayo ihi Otjira matji vanga okutjiwa nawa, tjiri, indji ongarero ye. 21 Nungwari o ha puratene ko ku wo, tjinga ape novarumendu mba kapita omirongo vine mbu mave mu rarere mondjira. Owo va yanasana kutja kamaave ri nokunwa nga tji va zepa Paulus. Nambano owo ve rirongerere okutjita tjingetjo nu mave undju kove u ve yandjere.”
22 Omuhongore wovita arire tja tja: “O raere omundu kutja ove we ndji tjivisa otjiṋa tji tja sana ngwi.” Tjazumba a hindi ingwi omuzandona kutja a yende.
Paulus ma hindwa komuhonapare Feliks
23 Omuhongore wovita wa isana ovanane vevari na tja: “Woronganiseye ovarwe wovita omasere yevari ve rirongerere okuyenda kOsesarea puna ovakavire voukambe omirongo hambombari novayumbe vouta omasere yevari momuvyu wouṱuku mbunombwi. 24 Yandjeye oukambe tjiva ku Paulus a kavire nu mu mu tware nokuhinooma kongooneya Feliks.” 25 Okuzambo omuhongore wovita arire tja tjanga orutuu rwomambo ngu maye tja nai:
26 “Ami ngu mbi ri Klaudius Lisias
me minike ongooneya
omutjuṋikwa tjinene Feliks.
27 Ovajuda va kambura omurumendu ngwi
nu ave hara okumuzepa.
Ami mba tjiukisiwa kutja eye omukwatera wa Roma,
notji mba ya puna ovarwe vandje wovita okukemuyama.
28 Ami mba vanga okutjiwa kutja owo mave mu pere tjike ondjo,
nopu mbe mu twarera kOtjira tjawo tjOvajuda.
29 Mba muna kutja eye ke notjiṋa tja tjita pa pwire okuṱa
poo okuyumbwa motjovakamburwa;
omakuminino ngu ve na wo na ye,
ye notjiṋa nomatwako wawo oveni.
30 Nu tji mba raerwa kutja pe nomerikutirokomwe nga tjama na ye,
tjimanga arire tji mbe ripura okumuhinda kove.
Ami mba raera ovemukuminine kutja
omarondororero ngu ve na wo na ye,
ngave yete komurungu woye.”
31 Ovarwe wovita va yenenisa omarakiza ngu va perwe. Owo va toora Paulus nu mouṱuku mbo ave mu twara nga kOantipatris. 32 Mependukirwa ovarwe wovita vopehi va yaruka komaturiro wawo nave esa ovakavire voukambe ve yende puna Paulus. 33 Owo ve mu twara kOsesarea, ave ka yandja indwi orutuu kongooneya nave kakuramisa Paulus komurungu we. 34 Ongooneya ya resa orutuu ndwi na pura Paulus kutja eye owehi riṋe. Nu tja tjiwa kutja Paulus owehi ra Silisie, 35 arire tja tja: “Ami me ku zuvire indu ovekukuminine tji ve ya.” Tjazumba a rakiza kutja Paulus a tjevererwe mondjuwo youhona ya Herodes.
© Herero Revision Bible © Bible Society in Namibia, 2021.
