Jesaja 29 - Herero Revision Bible (HRR)

Oumba wa Jerusalem

1 Owee ku Ariel, ihi Otjipunguhiro tja Ndjambi, Jerusalem otjini, David ma tonene ondanda ye! Ombura imwe poo mbari ngaze ye nu ze kapite puna omikandi nomayuva wazo omanene, 2 Ndjambi otji ma eta ombamisiro kotjihuro tji tji isanewa “Otjipunguhiro tja Ndjambi.” Maku kara omaririro nomauriro, notjihuro atjihe matji sana notjipunguhiro tji tja vandekwa nombinḓu. 3 Ndjambi ma rwisa otjihuro, e tji kondorokisa notutatwa, ne tji kovere, 4 Jerusalem matji sana notjiruru tji matji kondjo okuhungirira mourekoto wehi, ombosiro yeraka emungire ndji mai zu moruuma.

5 Jerusalem, ovozonganda avehe mbu mave ku rwisa mave hingwa otja oruuma, novimbumba vyovekuṋiṋikize mavi pizuka otja oviyaya. Mokamanga, mombapaiziro yeho, 6 Muhona Omunamasaaehe me ku yama notuṱuṱumo otunamasa nomanyinganyingisiro wehi; eye ma hindi otjivepo, nomuriro mbwa handja. 7 Ovimbumba avihe vyovarwe wovita vyoviwaṋa, mbi mavi rwisa otjihuro “tjOtjipunguhiro tja Ndjambi”, novirwise vyawo avihe noviungurise vyawo, okutja oviṋa avihe, otji mavi zengi otja oruroto, otja otjirimunikise tjomouṱuku. 8 Oviwaṋa avihe mbya worongana okurwisa Jerusalem mavi sana nomundu ngwa ṱondjara nu ngu ma roto kutja ma ri na penduka e nondjara; poo mavi sana nomundu ngwa ṱonyota, nu ngu ma roto kutja ma nu, na penduka nomuriu mbwa kukuta.

Okuhinakonatja nomaronga

9 Rireye omayova, nu mu kumwe! Poṱupareye, amu ha nwine omavinu! Teratereye, amu ha nwine omanuwa omazeu! 10 Muhona we ku pa ombepo yokukoṱura, nove wa rara ozomboṱu ozonḓeu. Muhona wa poṱuparisa omeho weṋu, wa kutjira oviuru vyeṋu, okutja imba ovaprofete. 11 Komuhingo mbwi omaheero wotjirimunikise tjomaprofetero atjihe opu tja horekerwa ku eṋe; otjo matji sana nembo emangwa nda tuwa ko otjihako tjomapatero. Tji wa twara ro komundu ngu tjiwa okuresa, nomu ningire kutja e ku resere, eye ma tja: “Hi nokusora, orondu oro ra tuwa ko otjihako tjomapatero.” 12 Tji we ri yandja ku umwe ngu ha rese, nomu ningire kutja e ku resere, eye ma ziri a tja: “Hi nokutjiwa okuresa.”

13 Muhona wa tja nai: “Otjiwaṋa hi tji tja tji rikotamena ku ami, nungwari tji rikotamena ku ami nomambo womungandjo uriri, nomitima vyatjo avi ri kokure na ami. Omerikotameneno wawo ku ami, owo ya zikamena komihingo notuzo twovandu uriri. 14 Ami otji me tjiti oviṋa ovihimise kotjiwaṋa hi, me tji urumisa tjinene. Imba mbe nounongo mave rire omayova, nozondunge zawo azehe ma rire omungandjo uriri.”

Omaundjiro womoruveze ndu maru ya

15 Owee ku imba mbe kondja okuhoreka omeripuriro wawo ku Muhona! Owo ve tjita oviungura vyawo mongumumu amave tjangovasi kape na ngu meve munu poo ngu ma tjiwa imbi mbi mave tjiti. 16 Owo ve tungunyuna oviṋa avihe. Tji tji ri otjinanḓengu otjiṋe, omuungure wozonyungu poo omunoko? Pe notjiṋa tji tja ungurwa i omundu, tji matji tja nai ku ye: “Kaove ngu we ndji ungura”, poo onyungu ndji mai tja nai komuungure wayo: “Ove ko nokutjiwa imbi mbi mo tjiti, are?”

17 Otja tji ku za, moruveze okasupi okuti kwomahwa maku rire ehi romakunino, nehi romakunino a ririre ehwa.

18 Eyuva ndo tji re ya, omboro mai yenene okuzuva embo ndi mari resewa, nomupoṱu ngwaa kara monḓorera ma yenene okumuna. 19 Ovasyona noverisusuparise mave yoroka nave nyanda mu Muhona, Omuyapuke wa Israel. 20 Indji mai rire ondjandero yaimba mbe ṋiṋikiza ovakwao, nu mbe nyengura Ndjambi. Omurunde auhe ma yandekwa. 21 Ndjambi ma yandeke imba mbe yamburura ovakwao, imba mbe tjaera omberero kovatjite vouvi, na imba ovakore vovizeze mbe tjaera ousemba kovandu ovaṱakame.

22 Nambano Muhona, Ndjambi wa Israel, ngwa yama Abraham koumba, opu ma zu okutja nai: “Tjiwaṋa tjandje, ko nokuuhara amo yambururwa rukwao, nomurungu woye kau tji nokutjitukisiwa i ohoṋi rukwao. 23 Ove nozondekurona zoye tji mamu munu oviungura, mbi mba tjita mokati keṋu, otji mamu tjiwa kutja owami, ngu mbi ri Omuyapuke wa Israel. Eṋe mamu ndji yozike, nu mamu kurama nondira komurungu wandje. 24 Ovandu omayova mave rihongo okukara nondjiviro, nu imba mbe unauna aruhe mave yakura okuhongwa.”