Numeri 25 - Herero Revision Bible (HRR)

Ovaisrael mOsitim

1 NOvaisrael tji va kara mOsitim ovarumendu va vakirasana novakazendu Ovamoab. 2 Ovakazendu mba ve ve ṋanga komukandi wozombunguhiro koomukuru wOvamoab; nOvaisrael va rya ovikurya nave rikotamene koomukuru mbo, 3 wena Baal-Pegor; nu Muhona wa ṱomazenge tjinene na wo. 4 Muhona wa tja ku Moses: “Toora ovanane avehe vOvaisrael nu u ve turike komuti momeho waavehe; omazenge wandje otji maye zu ko kOvaisrael.” 5 Nu Moses wa tja nai kovapangure vOvaisrael: “Auhe weṋu nga zepe ovandu ve, imba mbe rikotamena ku Baal-Peor.”

6 Omurumendu Omuisrael wa eta omukazendu Omumidian keṱunḓu re, momurungu wa Moses nowombongarero aihe yOvaisrael, owo ngunda amave ririre pomahitiro wOndanda yOmahakaeneno. 7 Nu Pinhas, omuzandu wa Eleasar, ngu ri omuzandu womupristeri Aron, wa muna otjiṋa hi na sekama mombongarero na katoora enga. 8 Neye wa kongorera ingwi omurumendu Omuisrael nomukazendu mondanda na twere aveyevari nenga momazumo. Komuhingo mbwi otjiṱiro otji tja yandisiwa mokati kOvaisrael. 9 Notjivaro tjaimba mba ṱa tja ri 24,000.

10 Muhona wa hungira ku Moses a tja: 11 “Motjimbe tja ihi Pinhas tja tjiti, ami hi tjinokupindikira Ovaisrael rukwao. Eye tjinga a panḓa oomukuru varwe okukarerwa posi yandje. Ami opu mbi ha zire okuvenyona momazenge wandje. 12 Mu tjivisa nai: ‘Ami me tjiti omerikutiropamwe wandje wohange na ye, ngu maye karerere nga aruhe; 13 eye nozondekurona ze va zikwa kutja ve rire ovapristeri ovakarere, eye tjinga a panḓa oomukuru varwe okukarerwa posi yandje, na tjitire Ovaisrael ombunguhiro yomakohororero.’ ”

14 Ena romurumendu ngwi Omuisrael ngwa ṱa puna ingwi omukazendu Omumidian ra ri Simri, omuzandu wa Salu; eye wa ri omunene weṱunḓu rimwe romuhoko wa Simeon. 15 Nena romukazendu ngwi ra ri Kosbi, omusuko wa Sur, ngwa ri otjiuru tjonganda imwe yomuhoko wOvamidian.

16 Norukwao Muhona wa hungira ku Moses a tja: 17 “Karwise Ovamidian u kevenyone, 18 owo tjinga ava tjita ouvi ku eṋe, tji ve mu tikura mOpeor na mena ra Kosbi, omusuko womuhongore wa Midian, ngwa ṱa meyuva rotjiṱiro tja Peor.”