Jehu ma rire ombara mOisrael
1 Kombunda yanao omuprofete Elisa wa isana umwe wokambumba kovaprofete omitanda na tja ku ye: “Rirongera nu u yende kOramot mOgilead. Twaerera onya ndji yomaze womiṋinga; 2 nu tji wa kavaza ngo, kapahe Jehu, omuzandu wa Josafat, omuzandu wa Nimsi. Mu twara ketuwo peke ohumburuko novakwao; 3 tirira omaze womiṋinga nga kotjiuru tje, nu itja nai: ‘Muhona ma tja eye we ku twirisa u rire ombara ya Israel!’ Nu zapo tjimanga poṋa mbo.”
4 Ingwi umwe wokambumba kovaprofete otja ya kOramot mOgilead 5 ka kavaza ovahongore votjimbumba tjovita ava wongara pamwe. Eye wa tja nai: “Muhongore omunene, ami mbi nombuze yoye.”
Jehu wa pura nai: “Ove mo hungire na uṋe wetu?”
Eye wa zira a tja: “Me hungire na ove, muhona.” 6 Tjazumba aveyevari otji va hita mondjuwo, nomuprofete ingwi omutanda wa tirira omaze womiṋinga kotjiuru tja Jehu na tja ku ye: “Muhona, Ndjambi wa Israel, ma tja nai: ‘Ami me ku twirisa u rire ombara yotjiwaṋa tjandje Israel. 7 Ove mo zepa omuhona woye ombara, ingwi omuzandu wa Ahab, kokutja mbi vere Isebel mena raindu tja zepa ovaprofete vandje varwe. 8 Eṱunḓu arihe ra Ahab nozondekurona ze mave ṱu; ami me zepa omuvena auhe meṱunḓu re, omunene nokaṱiṱi. 9 Ami me tjiti keṱunḓu re otja pu mba tjitire keṱunḓu ra Jerobeam, ombara ya Israel, nora Basa, ombara ya Israel. 10 Isebel ke nakupakwa; nungwari orurova rwe maru riwa i ozombwa mokuti kwa Jesreel.’ ” Ingwi omuprofete omutanda tja za nokuhungira omambo nga otja pita metuwo na tupuka.
11 Jehu wa yaruka kovakarere ovakwao, nowo ve mu pura nave tja: “Oviṋa avihe vi ri nawa? Omundu ngo omunaviyoze aa vanga tjike na ove?”
Jehu wa zira a tja: “Mamu tjiwa omundu ngo nokuhungira kwe!”
12 Nowo va zira nave tja: “Ayee, kako, eṱe katu nokutjiwa. Tu raera kutja eye wa tja vi!”
Nu Jehu wa zira a tja: “Eye we ndji raere kutja Muhona wa tja nai: ‘Ami me ku twirisa u rire ombara ya Israel?’ ”
13 Mokamanga imba ovakarere vapuna Jehu va yara ozombanda zawo kozondondo kutja Jehu a kurame ko, ave posisa ozohiva nave ravaere nai: “Jehu eye ombara!”
Joram, ombara ya Israel, ma ṱu
14 Jehu we rikuta kuna ovakwao okusekamena Joram. 15 Ombara Joram wa ri mOjesreel ka ya okukaveruka ovito vye mbya tendwa movita tji va rwa na Hasael, ombara ya Sirie, mOramot-Gilead. Nu Jehu wa tja nai kovakarere vapuna ye: “Tji mamu kara puna ami, ape ningi umwe ngu ma hene mOramot okukaraera otjiwaṋa mOjesreel.” 16 Jehu wa ronda metemba re rovita na i kOjesreel. Joram ingee wa ri e hiya veruka, nu Ahasia, ombara ya Juda, wa ri ngo okumuvarura.
17 Omutjevere ngwa ri moruhungu romatjeverero mOjesreel wa muna Jehu novandu ve amave ya. Eye wa ravaera na tja: “Me munu otjimbumba tjovandu.”
Joram wa zira a tja: “Hinda omukavire a katjiwe kutja ovandu mbo ovanahange poo ovanavita.”
18 Nomukavire ngwi wa katjakanena Jehu ne mu raere nai: “ombara mai vanga okutjiwa kutja ove weya otja omunahange?”
Jehu wa zira na tja: “Ihi katjiṋa tjoye! Ndji kongorera!”
Omutjevere ngwi ngwa ri moruhungu wa hepura kutja omuhindwa wa vaza otjimbumba, nungwari ka kotokere. 19 Omuhindwa warwe wa tumwa na kapura Jehu epuriro tjingero. Jehu wa zira rukwao a tja: “Ihi katjiṋa tjoye! Ndji kongorera!”
20 Nomutjevere ngwa ri moruhungu romatjeverero wa hepura rukwao kutja omuhindwa wa vaza otjimbumba, nungwari ka kotokere, neye wa weza na tja: “Omuhongore wotjimbumba ma hingi etemba re rovita tjimuna omundu ngwa vera oviyoze otja Jehu tje hinga.”
21 Joram wa rakiza a tja: “Kutireye etemba randje rovita!” Nowo va tjita nao. Nu Joram, ombara ya Israel, na Ahasia, ombara ya Juda, va hinga auhe metemba re okukahakaena na Jehu. Owo va kahakaenena mehi rotjikunino tji tja ri otja Nabot, Omujesreel. 22 Joram wa pura Jehu na tja: “We ya mohange?”
Jehu wa zira na tja: “Mape kara vi ohange, ngunda atu noundjai auhe natu karera ovisenginina mbya utwa i nyoko Isebel?”
23 Joram ngunda ama tanaura etemba re rovita okutupuka wa ravaera na tja: “Ihi otjiwova, Ahasia!” 24 Jehu opa nanena outa we na yaha Joram pokati kozohongwe, notjiku tja tuvakaṋa omutima; neye wa wira metemba re na koka. 25 Nu Jehu wa tja nai komukarere we ohongora Bidkar: “Toora orurova rwe nu u keruyumbe mehi rotjikunino tji tja ri otja Nabot; rizemburuka kutja ami na ove tji twa kavirire ozombarakana kongotwe yombara Ahab, ihe ya Joram, Muhona otja hungira omambo nga ku Ahab: 26 ‘Tjiri, ami erero mba mwine omaṱiro wa Nabot nowovazandu ve. Nu ami mba kwizika kutja me ku verere mba mehi rotjikunino tjingetjo!’ ” Jehu wa rakiza komukarere we ohongora na tja: “Nambano toora orurova rwa Joram u ru yumbe mehi rotjikunino tji tja ri otja Nabot otja Muhona pa hungira kutja mape tjitwa nao.”
Ombara Ahasia ma ṱu
27 Ahasia, ombara ya Juda, wa muna imbi mbya tjitwa, notja tupuka metemba re rovita okuhungama otjihuro Bet-Gan, ama rambwa i Jehu wa rakiza kovarwe ve wovita na tja: “Eye wina mu zepeye!” Nowo ve mu tanda ngunda ama hingi etemba re rovita mondjira okuyenda kOgur, popezu notjihuro Jibleam. Nungwari eye wa kondja okukayenda nga tja kavaza kotjihuro Megido ka kakokera. 28 Ovakarere ve va yarura orurova rwe metemba re rovita kOjerusalem, nave kemupaka momaendo wouhona mOtjihuro tja David.
29 Ahasia wa rira ombara ya Juda mombura oitjamurongo na imwe youhona wa Joram, omuzandu wa Ahab.
Ombara oserekaze Isebel ma ṱu
30 Jehu wa vaza mOjesreel. Isebel tja za nokuzuva imbi mbya tjitwa, we rivava omuti momeho okuyezorerisa, a ṱunu ozondjise ze na kurama poruiho rwondjuwo youhona ama tara komuvanda. 31 Jehu tja hita momuvero worumbo, Isebel wa ravaera na tja: “Ove, Simri! Ove, muzepe womuhona woye! We ere tjike mba?”
32 Jehu wa yera omeho we na ravaere a tja: “Owaṋi ngu ri komukuma wandje?” Ovakarere vevari poo vetatu vondjuwo youhona ve mu mwina moruiho, 33 nu Jehu wa tja nai ku wo: “Yumbeye Isebel pehi!” Nowo va yumba Isebel pehi, nombinḓu ye ya rimbarera kekuma rondjuwo na koukambe. Jehu wa hingira oukambe netemba re rovita kombanda yorurova rwa Isebel. 34 Neye otja hita mondjuwo youhona na karya nokunwa. Tjazumba wa tja nai: “Tooreye omukazendu ngo ngwa sengwa mu kemupake, orundu eye omusuko wombara.” 35 Nungwari ovarumendu mba mbe kemupaka kave vazere po otjiṋa posi yotjikongo tjotjiuru tje, nomaṱupa womake nowozombaze ze. 36 Owo tji va serekarera otjiṋa hi ku Jehu, eye wa tja nai: “Imbi Muhona ombya hungira kutja mavi tjitwa, indu tja hungira notjinyo tjomukarere we Elia na tja: ‘Ozombwa maze ri orurova rwa Isebel mokuti kwa Jesreel. 37 Orurova rwe maru rimbarere mbo tjimuna ombumbi, nga tji pe hi nomundu ngu me ru zemburuka!’ ”
© Herero Revision Bible © Bible Society in Namibia, 2021.
