Deuteronomium 18 - Herero Revision Bible (HRR)

Ondjambi yovapristeri

1 “Ovapristeri Ovalevi, imbwi omuhoko wa Levi auhe, kave nokukara nehi rawo oveni notjirumatwa otja Ovaisrael ovakwao tji ve na tjo; ombaruriro yawo mave isa mozombunguhiro za Muhona zomuriro, na moviyandjewa, mbi eterwa ye. 2 Omuhoko mbwi kau nokukara notjirumatwa tjawo ouini mokati kovakwao; Muhona onguri otjirumatwa tjawo otja pe u kwizikira.

3 “Ku imba mbu mave eta ombunguhiro, kutja ongombe poo onyanda, ovapristeri ngave pewe eyambi, nozondjeo, netangara. 4 Omupristeri nga pewe ovitengakuhora vyovikokotwa novyomandjembere, novyomaze womiṋinga, novyomainya wozonyanda zoye. 5 Mokati komihoko vyeṋu avihe Muhona, Ndjambi woye, wa toorora omuhoko wa Levi kutja u mu karere otja ovapristeri nga aruhe.

6 “NOmulevi ngwa tura ngamwa apehe mu tjimwe tjovirongo vyeṋu mOisrael, tji ma vanga okuya poṋa Muhona pe ritoororera, 7 ma yenene okukarera mena ra Muhona, Ndjambi we, otja Ovalevi ovakwao avehe mbe karera Muhona mbo. 8 Eye ma munu ovikurya, mbi ṱeki povyovapristeri ovakwao, posi yaimbi mbye muna okuza kovazamumwe ve.

Omaronga otja kovisenginina

9 “Tji mo ya mehi Muhona, Ndjambi woye, ndi me ku pe, o horere ovitjitwa oviyaukise vyoviwaṋa ovinavisenginina mbiri mehi ndo. 10 Ape ningi umwe ngu ma punguha ovanatje ve kutja ve rire ombunguhiro; nu oyandjere ovandu woye okuuka, nokuvetera nokuserekarera noviraisiro noundjai 11 poo okusenga poo okuningira ombepo yovaṱi poo yomaukiro nokupura kovaṱi. 12 Orondu Muhona Ndjambi woye wa tondo ovandu mbe tjita oviṋa oviyaukise mbi, neye opu ma rambere oviwaṋa mbyo komurungu woye. 13 Ove kara nouṱakame tjinene ku Muhona, Ndjambi woye. 14 Orondu oviwaṋa mbi, mbiri mehi ndi me ku pe, vi puratena kozombetere, na kozombuke; nungwari Muhona, Ndjambi woye, keye ku yandjera okutjita nao.

Ndjambi ma pendura omuprofete omunene

15 “Muhona, Ndjambi woye, me ku pendurire omuprofete otja ami, mokati kovakweṋu votjiwaṋa tjoye; ku ye nga rire ku mwa puratene. 16 Meyuva, eṋe ndi mwa woronganena kondundu Sinai, ove we riyarikaṋa ku Muhona, Ndjambi woye, no tja: ‘Ami hi nokuuhara ame vanga okuzuva komurungu eraka ra Muhona, Ndjambi wandje, hi nokuyenena okumuna omuriro omunene mbwi rukwao, tjapo ngee koka.’ 17 Muhona arire tja tja nai ku ami: ‘Owo va hungire nawa. 18 Ami meve pendurire omuprofete otja ove mokati kovakwao votjiwaṋa tjawo, nu ami me mu raere imbi avihe, eye mbi meve raere. 19 Auhe ngu hi nakupuratena komambo wandje, omuprofete ngu ma hungire mena randje, ami omuini me mu vere. 20 Nungwari omuprofete ngu me ritjiti aayo ma hungire mena randje, imbi ami mbi mbi he mu rakizire poo ngu ma hungire mena roomukuru varwe, omuprofete ngwi nga ṱe.’

21 “Rumwe mo ripura nai momutima woye: ‘Embo, ndi ha hungirirwe i Muhona, matu ri tjiwa vi?’ 22 Omuprofete tji ma hungire mena ra Muhona, nu embo re ari ha yenenisiwa, nu ape ha tjitwa otjiṋa, embo ndi kari hungirirwe i Muhona. Omuprofete ngwi we rihungirire momeritongamisiro we. Ko nakuhepa okumutira.