Omayuva omazeu maye ya
1 Tjiwa nawa kutja momayuva omasenina mamu kara otuveze otuzeu. 2 Ovandu mave ripahere oveni ouwa, nu mave kara nomunenetima kovimariva, mave rihivi nokuritongamisa nokuyambururasana, nu mave kara nokuhinonḓuviro kovanene vawo nokuhinokutja okuhepa, nu kape na tji matji rire otjiyapuke ku wo; 3 owo mave rire ovehinarusuvero nu mbe ha hangana, ovayamburure vovakwawo, ovanautwe novindandi mba tonda ouwa; 4 owo mave rire ovahorore vomovineya, ovanakaṋa, noveriyere vatjinene; owo mave suvere oviṋa komeho yokusuvera Ndjambi; 5 owo kombanda ve munika aayo ovakambure, nungwari inga omasa wongamburiro ve ye nakaura. Kara kokure novandu mbe ri nai. 6 Tjiva vawo ve rivakera mozondjuwo nave tjendjereke ovakazendu ovitata mongamburiro, mbe ura nourunde nu mbe hingwa i ozonḓuma omihoko pekepeke; 7 ovakazendu mba aruhe ve kondja okurihonga, nungwari kamaave yenene okutjiwa ouatjiri. 8 Otja Janes na Jambres punga ava pirukirire Moses, ovandu mba wina opunga ava pirukira ouatjiri; ovandu mba ve nozondunge nḓe ha ungura, nowo oviṋa uriri oviporoporo mongamburiro. 9 Nungwari owo kamaave ryama komeho, ouyova wawo tjinga amau munika kovandu avehe. Ihi otji tja tjitwa ku Janes na Jambres.
Omaronga omasenina ku Timoteus
10 Nungwari ove we ndji kongorera momahongero na momeritjindiro wandje na monduri yongarero yandje; nu wa yandja ombakatwi kongamburiro yandje nomuretima wandje norusuvero rwandje nonḓaro orure yandje, 11 nondatumisire yandje, nomihihamo vyandje mbi mba hakaena na vyo mOantiokie na Ikonium na Listra. Ami, tjiri, mba tjindire ozondatumisire ozondirise! Nungwari Muhona we ndji yama mu zo azehe! 12 Nu avehe mbe vanga okukara mongamburiro mu Kristus Jesus mave tatumisiwa. 13 Nungwari ovandu ovarunde novanavineya mave ryamene ko mouvi amave pukisa ovakwao nokuripukisa oveni. 14 Nungwari ove panḓera mouatjiri mbu wa hongwa, nu mu wa zikamisa ongamburiro yoye. Ove vari mo tjiwa imba mbe ku hongere, 15 nu mo zemburuka kutja omatjangwa omayapuke ove we ye tjiwa okuza kouṱiṱi woye. Owo maye ku pe ounongo mbu mau ku hongorere kombwiro yomuinyo mongamburiro, ndji ri mu Kristus Jesus. 16 Omatjangwa aehe ya tjangwa nombatero yOmbepo ya Ndjambi, nowo otji ye nonḓengu onene yokuhonga ouatjiri nokupirukira omahongero woposyo, nokuvyura ozondataiziro, nokukuna ongarero osemba, 17 kokutja omundu ngu ri motjiungura tja Ndjambi a rire omupyuke tjinene nu e rirongerere okuungura otjiungura ngamwa atjihe otjiwa.
© Herero Revision Bible © Bible Society in Namibia, 2021.
