Israel otjo ondjerera yoviwaṋa
1 Purateneye ku ami, viwaṋa vyokokure,
vandu mbu mwa tura kokure!
Ngunda ambi hiya kwatwa,
Muhona tjandje we ndji toorora,
nu we ndji zika okurira omukarere we.
2 Eye wa tjita kutja omambo wandje
ye rire omatwe okusana kengaruvyo,
we ndji tjizikiza neke re omuini.
Eye we ndji sanisa kotjiku otjitwe,
nu e ndji horeke momunguma woviku vye.
3 Eye wa tja nai ku ami: “Israel,
oove omukarere wandje;
ovandu mave ndji tangere ove.”
4 Ami mbe ripura nai:
“Mba kondja, nungwari a ri omungandjo.
Ami mba ungurisa omasa wandje aehe
ambi hi na tji mba yenenisa.”
Nu ingee ousemba wandje u ri pu Muhona;
eye me ndji pe ondjambi
mena raimbi mbi mbi ungura.
5 Ngunda ambi hiya kwatwa,
Muhona tjandje we ndji isana;
eye we ndji isa po omukarere we
kutja mbi kotore otjiwaṋa tje,
nokutja mbi wonge otjiwaṋa tja Israel tji tja rimbara.
Muhona me ndji pe ondjozikiro,
eye omburo yomasa wandje.
6 Muhona wa tja nai ku ami:
“Ami mbi notjiungura otjinene kove
pu ihi otjitenga mukarere wandje.
Kakutja okuyarura koupe ounene wotjiwaṋa
tja Israel tji tja hupa po porwako,
nungwari ami wina me ku
tjiti u rire ondjerera yoviwaṋa,
kokutja ouye auhe u yamwe.”
7 Omuyapuke, Omukuture wa Israel, ma tja nai;
ku ingwi ngwa nyengwa tjinene,
nu ngwa tondwa i oviwaṋa,
nu ngu ri omukarere wovanane ovindandi:
“Ozombara maze ku munu awa kuturwa,
nu maze sekama okukupa ondengero yazo;
ovaingona wina mave munu onguturiro ndji,
nu mave ripete okukuyozika.”
Ihi matji tjitwa, Muhona tjinga a toorora omukarere we,
nu Omuyapuke wa Israel tjinga ama ṱakamisa omakwizikiro we.
Jerusalem matji yarurwa koupe
8 Muhona ma tja nai kotjiwaṋa tje:
“Oruveze tji rweya kutja mbi ku yame,
ami me ku raisire ondjingonekero,
nu e zuvire ondjuriro yoye yokuningira ombatero.
Me ku tjevere nokukuyama,
nu mena roye ami me tjiti
omerikutiropamwe noviwaṋa avihe.
Me ku esa u ture mehi reṋu rukwao
nda rira ongaango nambano.
9 Ami me tja nai kovahuurwa:
‘Ryangeye moukutuke!’
Nu ku imba mbe ri monḓorera me tja:
‘Indjeye kondjerera!’
Owo mave sana nozonḓu nḓu maze
munu omaryo wazo mozondunda;
10 owo kave nokuṱa i ondjara nonyota.
Eyuva nombepo youpyu wokuti onguza
kavi nokuvehihamisa,
tjinga amave hongorerwa i ingwi ngu ve ṱira ondjenda.
Eye meve twara kotuharwi twomeva omatarareke.
11 “Ami me ungura ondjira ombaranga,
ndji mai tuurunga mokati kozondundu,
nu me ṱunine otjiwaṋa tjandje
ondjira mu matji ryanga.
12 Otjiwaṋa tjandje matji zu kokure
komukuma wokeyuva kokunene nowokongurova,
na kOasuan komukuma wokeyuva kokumuho.”
13 Nyandeye, mayuru! Ravaereye nondjoroka, mahi!
Ozondundu ngaze imbure!
Orondu Muhona ma huhumiṋa otjiwaṋa tje,
eye ma tjariparere imba mba ningisa ondjenda.
14 Nungwari ovature va Jerusalem va tja nai:
“Muhona we tu esa;
eye we tu zemba!”
15 Muhona otja zira a tja:
“Omukazendu omukwate ma sora
okuzemba okanatje ke omuini
na ha suvere inga okanatje ka panduka are?
Omukazendu omukwate nanda zembi omuatje we,
ami himee mu zembi ko!
16 Jerusalem, ami mba tjanga ena roye
momangaha womake wandje.
Orumbo rwoye ru ri momeho wandje aruhe.
17 “Imba mbu mave ku tungurura mave ya tjimanga,
nu imba mbe ku yandeka nokukunyona mave i.
18 Yevayeva u tare imbi mavi tjitwa!
Ovature voye mave wongara,
owo mave kotoka kove.
Tjiri, otja tjinga ambi ri Ndjambi omunamuinyo,
ove mo rihivire ovandu voye
tjimuna omuvarekwa tjinga
e riserira oviwerawere vye.
19 “Ehi roye ra ri otjitambatundu nu ra ri ongaango,
nungwari nambano mari rire okaṱiṱi tjinene
ku imba mbu mave ya okutura mu ro.
Nu imba mbe ku esa momatundu
mave humbururwa kokure na ove.
20 Ovanatje voye mba kwaterwa motjihuuriro,
eyuva rimwe mave tja nai kove:
‘Ehi ndi okaṱiṱi,
tu pao oruveze oruparanga okutura mo!’
21 Mo rihungirire no tja:
‘Owaṋi ngwe ndji pandukira ovanatje mba avehe?
Ami mba zepaisa ovanatje vandje,
notji mbi ha karere na wo rukwao.
Mba ri mouhuura, nu mba hingirwa kwarwe;
owaṋi ngwe ndji kurisira ovanatje mba?
Ami mba isiwa erike.
Novanatje mba va za pi?’ ”
22 Muhona Ndjambi ma tja nai kotjiwaṋa tje:
“Ami me ṋanga oviwaṋa nomake wandje
nu me yerere omihoko erapi rotjihako tjandje,
novyo mavi toora ovanatje voye momaoko
na koviṱuve navi ve kotora konganda.
23 Ozombara maze mu zara otja ooiho;
ozombara ozoserekaze maze mu zara otja oonyoko.
Ozo maze ripete komurungu woye naze ku yozike;
maze risusuparisa naze ku pe ondengero.
Otji mo tjiwa kutja owami ngu mbi ri Muhona;
nu kape na ngu ma ṱisiwa ohoṋi
tji ma undju ombatero ku ami.”
24 Mo sora okuyeka omurwe wovita
ombangaṋe ovipunda are?
Mo sora okukutura omupandekwa
kouvara womunane otjindandi are?
25 Muhona ma ziri a tja:
“Imbi ombinga amavi tjitwa.
Ovapandekwa vomunane
otjindandi mave kuturwa,
nomurwe wovita ombangaṋe
ma yekwa ovipunda vye.
Ami omuini me ru kuna
ngamwa ngu me ku rwisa,
nu me yama ovanatje voye.
26 Ami me twa ovekuṋiṋikize
kumwe kutja ve zepasana;
owo mave purukisiwa i okuzepa nomazenge.
Ovandu avehe otji mave tjiwa kutja
owami ngu mbi ri Muhona,
ngu me ku yama, nu ngu me ku kutura.
Owo mave tjiwa kutja
owami ngu mbi ri Ndjambi
omunamasa wa Israel.”
© Herero Revision Bible © Bible Society in Namibia, 2021.
