Esekiel 24 - Herero Revision Bible (HRR)

Omasanekero wonyungu ondereke

1 Meyuva oritjamurongo komueze outjamurongo wombura oitjamuvyu youhuura wetu Muhona otja hungira ku ami a tja: 2 “Muatje womundu, tjanga eyuva randinondi kutja oritjangapi, oro tjinga ari ri eyuva ombara ya Babilon mu mai utu omakoverero wa Jerusalem. 3 Raera otjiwaṋa tjandje otjipirukire omasanekero wokutja ami, ngu mbi ri Muhona Ndjambi, me tja nai ku tjo:

Twa onyungu momuriro

nu u i urise nomeva.

4 Twa mo onyama indji ombwa tjinene mu yo,

eyambi netumbo,

i urisa nomaṱupa inga omawamawa wina.

5 Toora onyama yonḓu indji ombwa tjinene;

twako ozonguṋe konyungu.

Omeva ngaye sume;

tereka omaṱupa nonyama wina.”

6 Muhona Ndjambi ma tja nai: “Owee kotjihuro tjovazepe! Otjo tji ri otja onyungu ndji nomureru, ndji ha roro okukohwa. Oundimbu pekepeke wonyama mau isiwa mo mu yo, nu kape na kemwe ku make sewa mo. 7 Mwa ri omazepero motjihuro, nungwari ombinḓu kai rimbarere mehi mu mai sokusiriwa i oruuma; oyo ya rimbara koruuwa ndu ri tjo. 8 Ami mba isa ombinḓu poṋa mbo pu i hi nokusora okusiriwa nu pu mai ningire omasutisiro omandandi.”

9 Muhona Ndjambi ma tja nai: “Owee kotjihuro tjovazepe! Ami omuini me tendeke ozonguṋe ozengi kumwe. 10 Eta ozonguṋe ozengi! Yakisa omuriro! Tereka onyama! Pwirisa omanyuṋe! Ningiririsa omaṱupa! 11 Nambano twa onyungu yongoporo ndji ri tjo pomakara; nu ngai pye i ruvaere. Onyungu mai rire ongohoke rukwao, omureru wayo tji wa zu ko. 12 Nungwari omureru auhe kamaau yandisiwa i otururumo. 13 Jerusalem, ozondjito zoye ozohakohoke ze ku yamburura. Nangarire kutja ami mba kondja okukukohorora, ove wa panḓera pouyamburuke. Komoo rire omukohoke rukwao ngandu ndi tji wa munu omasa aehe womazenge wandje. 14 Ami, ngu mbi ri Muhona Ndjambi, mba hungire. Omayuva ye ya ami mu me yenenisa omambo wandje. Ami me keve ko komauvi woye, nu hi nokukuṱira ondjenda nu hi nokukutjariparera. Ove mo pangurirwa ozondjito zoye.” Muhona Ndjambi ongwa hungire nai.

Onḓiro yomukazendu womuprofete

15 Muhona wa hungira ku ami a tja: 16 “Muatje womundu, ami me ku yeka omundu ngwi ngu wa suvera tjinene nonḓiro yatjimanga. Ove ko nokuunauna, nu ko nokurira poo okupupisa nangarire ehoze rimwe. 17 Omahekununino woye nga rire ngumumu. O kara uhungu poo huuna otja otjiraisiro tjoruhoze rwoye. O kutjire omurungu woye, nu o ri ovikurya mbi riwa i ovanaruhoze.”

18 Omuhuka omunene ami ee hungire kuna ovandu. Ongurova ndjo omukazendu wandje wa koka, neyuva nda kongorera ndo ami mba tjita otja pu mba raererwe. 19 Ovandu ve ndji pura ave tja: “Okutjita nai maku hee tjike?”

20 Ami otji mba zira nai ku wo: “Muhona wa hungira ku ami ne ndji raere 21 kutja mbi mu pe ombuze ndji, Vaisrael: Eṋe mu rihivira omasa wondjuwo ya Muhona Ndjambi; mu suvera okutara ku yo nokukeivarura, nungwari Muhona me i yamburura. Nu imbwi ouṋepo omitanda womaṱunḓu weṋu mbwa sewa mOjerusalem, mau ṱu movita. 22 Mamu tjiti imbi mbi mba tjita. Kamu nakukutjira omirungu vyeṋu, nu kamu nakurya ovikurya, mbi riwa i ovanaruhoze. 23 Kamu nakuyata huuna poo okukara uhungu, nu kamu nakukara moruhoze nokurira. Eṋe mamu sepunuka mena romauvi weṋu nu mamu kamburirasana mokutjema kweṋu. 24 Notji me rire otjiraisiro ku eṋe; mamu tjiti avihe mbi mbi mba tjita. Muhona ma hee kutja imbi tji vya tjitwa, otji mamu tjiwa kutja eye onguri Muhona Ndjambi.”

25 Muhona ma tja nai: “Muatje womundu, nambano me isapo ondjuwo yandje onamasa ndja ri omerihiviro wawo nondjoroka yawo, nu ndji va suverere okutara ko nokuivarura. Ami me twara ovanatje vawo ovazandu novakazona. 26 Meyuva mu me tjiti otjiṋa hi, umwe ngwa taurira omayandekero meya ne ku raere ombuze ndji. 27 Meyuva tjingero ndo ove mo kara nomirya, mbi wa pandjarisire, nu mo hungire nomundu ngwi. Komuhingo mbwi ove mo rire otjiraisiro kovandu, nowo mave tjiwa kutja owami ngu mbi ri Muhona.”