Levitikus 7 - Herero Revision Bible (HRR)

Ombunguhiro yOmasutiro

1 “Inga ongeri omatwako wombunguhiro yomasutiro wondjo, nowo omayapukeyapuke. 2 Otjinamuinyo tjombunguhiro ndji ngatji ṱire poṋa pu pe ṱira ovinamuinyo vyombunguhiro oningiririsiwa komanene wotjipunguhiro. Ombinḓu yatjo ngai pemenenwe kovikoro aviyaine vyotjipunguhiro. 3 Ozonḓura zatjo azehe nga ze punguhwe kotjipunguhiro: Okutja ozonḓura zomutjira, nozonḓura azehe nḓe ri koviṋa vyopehuri, 4 ozosyoti puna ozonḓura nḓe ri ku zo na inḓa nḓe ri komavango, noruamba ndu ri kehuri. 5 Nomupristeri nga ningiririsire ozonḓura nḓa kotjipunguhiro otja ombunguhiro yovikurya ku Muhona. Oyo ondji ri ombunguhiro yomasutiro wondjo. 6 Ovavena avehe momaṱunḓu wovapristeri mave pu okuirya, nungwari oyo ngai rirwe popayapuke, orondu oyo ondjapukeyapuke.

7 “Pena etwako rimwe ndi ungura kuna ozombunguhiro azeyembari: Okutja ombunguhiro yokuisapo ourunde nombunguhiro yomasutiro wondjo. Onyama ndji mai rire oyomupristeri ngwi ngu ma punguha ombunguhiro ndji. 8 Omukova wotjinamuinyo tji tja yandjewa kutja tji rire ombunguhiro oningiririsiwa, ngau rire owomupristeri ngwi ngwa tjiti ombunguhiro. 9 Nombunguhiro yovikurya aihe ndja terekwa mezuko na imbi avihe mbya terekwa monyungu poo motjiterekero otjipapi, ngavi rire ovyomupristeri ngwi ngwe vi punguhire Ndjambi. 10 Nungwari ombunguhiro yovikurya aihe kutja ya rungwa nomaze womiṋinga poo ihi otjikukutu, ngatji rire otjovazandu va Aron avehe, nu ngave haṋasane pu pe ṱeki pamwe.

Ombunguhiro yOhange

11 “Etwako rombunguhiro yohange, ndji mai punguhirwa Muhona, oro ndi: 12 Tji pe nomundu ngu ma punguha ombunguhiro yohange i rire ombunguhiro yokutja okuhepa ku Ndjambi, nga ete omavanda nge hi nosurise nu nga rungwa nomaze womiṋinga puna otjinamuinyo tji matji punguhwa. 13 Nu weze ko omavanda nga terekwa noruhere ndu nosurise. 14 Eye nga yandje ko evanda rimwe otja otjiyandjewa tjapeke ku Muhona; notjo matji rire otjomupristeri ngu ma pemenene ombinḓu yotjinamuinyo tjombunguhiro yohange keṋe yotjipunguhiro. 15 Nonyama yotjinamuinyo tjombunguhiro ngai riwe meyuva indi ndi tja punguhwa; ape sewa okaṋa ku make hupu nga komuhuka wependukirwa raindo.

16 “Nomundu tji ma eta otjiyandjewa tjombunguhiro mena romakwizikiro nga tjita poo tji me tji eta tji rire ombunguhiro yombango ye omuini, ngatji riwe meyuva ndi ndi tja punguhwa; nu ihi tji tja hupu, ngatji riwe meyuva rokombunda yaindo. 17 Nungwari onyama aihe ndja hupu nga keyuva oritjatatu, ngai ningiririsiwe. 18 Omundu tja ri konyama ombunguhiro yohange meyuva oritjatatu, Ndjambi ke nakumuyakurira yo nohange; nu wina ombunguhiro ndji kai nokutjangwa kena re; nonyama ndji mai varwa ohakohoke, nu auhe ngu ma ri ku yo ma tura ondjo. 19 Nonyama ndji tji ya ṱunu kotjiṋa otjihakohoke, ai riwa ko, nungwari ngai ningiririsiwe.

“Auhe ngu ri omukohoke ma yenene okurya onyama yombunguhiro, 20 nungwari ngamwa auhe ngu ri omuhakohoke tji ma ri konyama yombunguhiro yohange ndja punguhirwa Muhona, eye kena ku varwa rukwao otja owotjiwaṋa tja Ndjambi. 21 Nu tjinangara pena umwe ngwa ṱunu kotjiṋa otjihakohoke, kutja okomundu omuhakohoke poo okotjipuka otjihakohoke poo okotjiyaukise otjihakohoke ngamwa atjihe, nu tjazumba a ri konyama yombunguhiro yohange ndja punguhirwa Muhona, eye kena ku varwa rukwao otja owotjiwaṋa tja Ndjambi.”

Etwako, ndi tjaera okurya ozonḓura nombinḓu

22 Norukwao Muhona wa yandja omatwako nga ku Moses a tja: 23 “Raera kOvaisrael nu itja: ‘Amu ri ko ozonḓura zongombe poo zonḓu poo zongombo. 24 Ozonḓura zotjinamuinyo tji tja koka poo zaihi tji tja ṱu i ovipuka vyokuti, amu ri ko; ngaze ungurisiwe koviṋa ngamwa avihe. 25 Ngamwa auhe ngu ma ri ozonḓura zotjinamuinyo tji matji punguhirwa Muhona otja ombunguhiro oningiririsiwa, eye kena ku varwa rukwao otja owotjiwaṋa tja Ndjambi. 26 Poṋa ngamwa apehe pu mamu ka tura, amu ri ko ombinḓu, kutja oyonḓera poo oyovinamuinyo ngamwa avihe otja ovikurya. 27 Ngamwa auhe ngu ma ri ombinḓu, eye kena ku varwa rukwao otja owotjiwaṋa tja Ndjambi.’ ”

28 Nu Muhona wa hungira ku Moses a tja: 29 “Raera kOvaisrael nu itja: ‘Auhe ngu ma punguhire Muhona ombunguhiro yohange, eye omuini nga etere Muhona orupa kotjiyandjewa tjombunguhiro yohange. 30 Eye nge ru ete nomake we omuini ru rire ombunguhiro oningiririsiwa ku Muhona. Neye nga ete ozonḓura zotjinamuinyo norukoro nu nge ru yandje otja otjiyandjewa tjapeke ku Muhona. 31 Omupristeri nga ningiririsire ozonḓura kotjipunguhiro, nungwari orukoro ngaru rire orwoo Aron novazandu ve. 32 Okurama kwokunene nga ku yandjewe otja otjiyandjewa tjapeke, 33 komupristeri ingwi ngu ma punguha ombinḓu nozonḓura ze rire ombunguhiro yohange, ku rire okwe erike. 34 Orukoro rotjinamuinyo otjiyandjewa tjapeke, nu okurama kwokunene omeripunguhiro wapeke Muhona nga kambura okuza kotjiwaṋa tjOvaisrael, nu tji tja yandjwa nu ami mbe vi yandja ku Aron, omupristeri, na kovazandu ve. Inga onge ri omazikamisiro omakarerere kOvaisrael.’”

35 Indwi ondu ri orupa kombunguhiro oningiririsiwa ndwa punguhirwa Muhona nu ndwa yandjerwe ku Aron novazandu ve okuza meyuva ndi va zikwa okurira ovapristeri. 36 Meyuva ndo, Muhona wa rakiza kOvaisrael kutja ve yandje orupa ndwi rwombunguhiro. Inga onge ri omazikamisiro omakarerere kozondekurona zawo azehe.

37 Inga onge ri omazikamisiro wozombunguhiro nḓa: Ombunguhiro oningiririsiwa, ombunguhiro yovikurya, ombunguhiro yokuisapo ourunde, ombunguhiro yomasutiro wondjo, ombunguhiro yomatwimisiro, nombunguhiro yohange. 38 Muhona wa yandja omatwako nga ku Moses kondundu Sinai, indu tja rakiza kOvaisrael mokuti onguza kutja ve punguhire Muhona ozombunguhiro zawo.