Ombuze ya Natan nomeritanauriro wa David
1 Nu Muhona wa hinda omuprofete Natan ku David. Nu Natan tje ya ku ye, wa tja nai: “Pa ri ovarumendu vevari, mba turire motjihuro tjorive, umwe wa ri omutumbe, nomukwao wa ri omusyona. 2 Ingwi omutumbe wa ri nozonyanda nozongombe ozengi tjinene, 3 nungwari ingwi omusyona ka ri notjiṋa tjarwe posi yondjona imwe uriri ndja randere. Eye we i ṱakamisa, noyo ai kurire mondjuwo ye puna ovanatje ve; iyai ri ovikurya vye omuini, nokunwina motjitjuma tje, nu iyai kara pomatumbo we; oyo ya ri tjimuna omuatje we omukazona. 4 Eyuva rimwe otji kwe ya omuyenda konganda yaingwi omutumbe. Omutumbe ka vangere okuzepa otjinamuinyo tje tjimwe okumuṱunina omariro; moruveze rwanao eye wa kambura ondjona yaingwi omusyona, e i zepere omuyenda we ne mu ṱunine omariro.”
5 David wa ṱomazenge tjinene nomurumendu ngwi na tja ku Natan: “Tjimbe tja Muhona omunamuinyo, omundu ngwa tjiti nai wa pu pokuṱa. 6 Eye nga sute ondjona ndji povikando vine, tjinga a tjita otjiṋa otjivi tji tja sana ngwi, ne ha ṱire otjari.”
7 Natan arire tja tja ku David: “Oove ngu u ri omurumendu ngo! Nu Muhona, Ndjambi wa Israel, ma tja nai: ‘Ami mbe ku twirisa okurira ombara ya Israel, nu mbe ku yama momake wa Saul. 8 Ami mbe ku pa ondjuwo ya Saul youhona, novakazendu ve; mbe ku tjita ombara kombanda yOvaisrael nOvajuda. Imbi andakuzu kavi yenenene, etje ku wezira ko ovingi komurungu. 9 Okutjavi tji wa nyengura omatwako wandje? Okutjavi tji wa tjita otjiṋa otjivi otja ihi? Ove wa zepaisa Urija, Omuhetite, movita; wa tjita kutja Ovaamoni ve mu zepe, nu tjazumba arire tji wa katoora omukazendu we! 10 Nambano momuhoko woye auhe ozondekurona zoye tjiva maze ṱu onḓiro ombi, ove tjinga awe ndji nyengura no toora omukazendu wa Urija a rire omukazendu woye. 11 Ami me eta otjiwonga kombanda yoye, tji matji zire monganda yoye omuini, nu me isa po ovakazendu voye pove, ne ve yandja komurumendu warwe kutja a rare pu wo mutenya. 12 Orondu ove wa tura ondjo mongumumu; nungwari ami me yandjere kutja ihi tji tjitwe mutenya, kokutja Ovaisrael avehe ve mune.’ ”
13 David otja tja nai ku Natan: “Ami mba tjita ourunde komurungu wa Muhona.”
Natan arire tja ziri David a tja: “Muhona me ku isire, ko nokuṱa. 14 Nungwari tjinga awa yandja otjihorera tjondjambu kovanavita na Muhona mokutjita nai, omuatje woye ngu ma pandukwa i Batseba, ma koka.”
Onḓiro yomuzandu wa David
15 Tjazumba Natan wa yaruka koye. Nu Muhona wa tjita kutja okanatje komukazendu wa Urija ka pandukira David, kevere tjinene. 16 David wa kumbira okanatje ku Ndjambi kutja ke kare nawa. Neye we ritjaera kovikurya, nongurova aihe tji meya koye, aa hiti metuwo re na rara pehi ouṱuku auhe. 17 Novahongore vondjuwo ye ave i ku ye okukemupendura, neye aa panḓa, nu kaa ri otjiṋa puna wo. 18 Nu kombunda yomayuva hambombari okanatje otji ka koka, novahongore vondjuwo ya David ave keyakeya okumutjivisa onḓiro yokanatje. Owo ve ripura nai: “Okanatje ngunda ake nomuinyo, David kaa puratene ku eṱe tjiyatu hungire na ye. Nambano matu mu tjivisa vi kutja okanatje ke ka koka? Mape ya eye e ritjiti oumba ounene.”
19 David tja muna ovahongore vondjuwo ye amave hokora kumwe arire tja tjiza kutja okanatje ka koka; neye otje ve pura a tja: “Okanatje ka koka are?”
Nowo va zira ave tja: “Ii, ka koka.”
20 David wa sekama, e rikoho ne rivava, na zara ozombanda zarwe; tjazumba wa hita mondjuwo ya Muhona na kumbu nomutima we auhe. Nu tja yaruka koye, wa raa ovikurya, na ri. 21 Ovahongore vondjuwo ye arire tji va tja nai ku ye: “Ondjito yoye ongumise tjiri! Okanatje ngunda ake nomuinyo, ove iyo ritjaere kovikurya nu iyo riri, nungwari okanatje tji ka zu nokukoka, ove wa sekama no ri.”
22 David arire tja ziri a tja: “Okanatje ngunda ake nomuinyo, mbe ritjaera kovikurya ne riri, tjinga ambe ripura kutja ngahino Muhona me ndji tjariparere na hupisa okanatje. 23 Nungwari nambano tji ka koka nai, me ritjaerere tjike kovikurya? Me yenene okukekotora komuinyo are? Eyuva rimwe ami mee i ngo ku ke ri, nungwari oko kamaake kotoka ku ami.”
Ongwatero ya Salomo
24 Tjazumba David wa huhumiṋa omukazendu we Batseba. Eye wa rara pu ye, neye wa panduka omuzandu; nu David we mu ruka Salomo. Nu Muhona wa suverere omuzandu ngwi, 25 notja rakiza komuprofete Natan kutja e mu ruke Jedidija, okutja Omusuverwa wa Muhona.
David ma huura otjihuro Raba
(1Eku 20:1-3)26 Joab tjandje ingee u rwisa Raba, otjihuro ohongora tjombara yOvaamoni, nu wa ri pokutjihuura. 27 Eye otja hinda ovatumwa ku David, ve kemutjivise nai: “Ami mba rwisa Raba, nu mba huura onganda yomeva watjo. 28 Nambano woronganisa otjihupe tjovarwe voye wovita, u kovere otjihuro, a rire ove ngu mo tji huura, nungwari a ha rire ami kutja e ha tamuninwa tjo.” 29 David otja woronganisa ovarwe ve wovita na i kotjihuro Raba, e ketjirwisa ne tji huura. 30 Otjiserekarera tjotjisenginina Milkom tjotjihuro hi tja ri nekori rouhona rongoldo nda ri nondjinda yozokirograma mangara omirongo vitatu nandano, nu nḓa ri newe ehuze mu ro. David wa isa ko ekori ndi, ne ri twa kotjiuru tje omuini. Eye wina wa toora ovihuurwa ovingi motjihuro 31 novature vatjo e kevetwa moviungura vyokukonda omawe, novyovitenda ovise vyehi, novyomakuva, ne ve ungurisa ozohima. Neye wa tjita tjingetjo kovihuro avihe vyOvaamoni. Tjazumba David wa yaruka kOjerusalem puna ovarwe ve avehe wovita.
© Herero Revision Bible © Bible Society in Namibia, 2021.
