Esra 6 - Herero Revision Bible (HRR)

Omarakiza wa Kirus maye munika rukwao

1 Ombara Darius otja rakiza kutja ovandu ve konḓonone momatjangwa wouhona nga pwikirwe mObabilon. 2 Nungwari motjihuro tja Ekbarana morukondwa rwa Medie omu mwa munika embo emangwa, nu mu ro mwa ri omatjangwa nga:

3 “Mombura ondenga youhona wombara Kirus, eye omuini wa rakiza kutja ondjuwo ya Muhona i tungururwe, nu i rire moṋa mu mamu punguhirwa ozombunguhiro. Ondjuwo ya Muhona mai kara nozometa 27 koutonga na kouparanga. 4 Omakuma wayo maye tungwa noruteto rumwe rwomiti kombanda yotuteto tutatu peke twomawe. Omasutiro aehe maye zu mombwiko youhona. 5 Wina ovitjuma ovingoldo novisilveri mbya eterwe i ombara Nebukadnesar kObabilon okuza mondjuwo ya Muhona mOjerusalem, mavi yarurwa potuveze twavyo mondjuwo ya Muhona mOjerusalem.”

Darius ma rakiza kutja oviungura vi ryame komurungu

6 Darius wa hinda eziriro ndi: “Ku Tatenai, ongooneya yokongurova kwa Eufrat, na Setar-Bosnai, novahongore ovakweṋu mehi rokongurova kwa Eufrat.

“Kareye kokure nondjuwo ya Muhona! 7 Amu tjaere omatungiro wayo! Mu eseye indji ongooneya ya Juda novahongore vOvajuda ve tungurure ondjuwo ya Muhona poṋa pu ya ri rukuru. 8 Ami me mu rakiza kutja mu ve vatere okuitungurura. Ovimariva, mbi mave ungurisa, mavi zu mombwiko youhona wehi rokongurova kwa Eufrat; nu ngavi sutwe moruveze kutja imbi oviungura avi ha kurama. 9 Eyuva arihe peke nokuhinokukaerisa yandjeye kovapristeri mOjerusalem imbi mbi mave hepa, okutja ozondwiyona zozongombe, nozondwezu zozonḓu, nozondjona nḓu maze punguhirwa Ndjambi weyuru, ze rire ozombunguhiro ozoningiririsiwa, novikokotwa nomongwa nomavinu nomaze womiṋinga wina. 10 Ihi matji tjitwa kokutja ve punguhe ozombunguhiro nḓu maze tjata ku Ndjambi weyuru, nu ve kumbire ami novanatje vandje kutja Ndjambi e tu sere ondaya. 11 Ami me rakiza komurungu kutja auhe ngu hi nokukara nonḓuviro kondyero ndji, mondjuwo ye mamu homonwa otjiti, notjo matji upikwa kohonga natji tuvakanisiwa morutu rwe. Nondjuwo ye mai rire otjitambatundu. 12 Ndjambi ngwa toorora Jerusalem tji rire moṋa mu me rikotamenwa, nga nakaure ombara aihe poo omuhoko auhe mbu mau pengura omarakiza nga, nu mbu mau kondjo okuhaṋa ondjuwo ndji. Owami, Darius, ngu mba yandja omarakiza nga. Nowo ngaye yenenisiwe nawa.”

Ondjuwo ya Muhona mai yapurwa

13 Tatenai, ongooneya, na Setar-Bosnai novahongore ovakwao va tjita nawanawa otja ombara pu ye ve rakizire. 14 Ovahongore vOvajuda va ryamisa nawa oviungura vyokutungurura ondjuwo ya Muhona nave panḓiparisiwa i ovaprofete ooHagai na Sakaria. Owo va mana indji ondjuwo ya Muhona otja pu va rakizirwe i Ndjambi wa Israel, na Kirus na Darius na Artakerkes, inḓa ozombara za Persie. 15 Owo va mana ondjuwo ya Muhona meyuva oritjatatu komueze Adar mombura oitjahamboumwe youhona wombara Darius. 16 Otjiwaṋa tjOvaisrael; ovapristeri, Ovalevi, novakwao avehe mba kotokere okuza kouhuura, va yapura ondjuwo ya Muhona nondjoroka. 17 Owo va punguha ozondwezu zozongombe esere, nozozonḓu 200, nozongombo omurongo na mbari ze rire ombunguhiro yokuisapo ourunde, ongombo imwe komuhoko auhe peke wa Israel. 18 Owo wina va zika ovapristeri nOvalevi moviungura pekepeke vyondjuwo ya Muhona mOjerusalem otja komaraerero nga tjangwa mEmbo ra Moses .

Opaska

19 Ovandu mba kotokere okuza kouhuura va tjita Opaska meyuva oritjamurongo na yane komueze omutenga wombura ndja kongorera ndjo. 20 Ovapristeri nOvalevi avehe ve rikohororere nave rire ovakohoke kokutjita Opaska. Ovalevi va zepera otjiwaṋa atjihe tji tja kotokere, novapristeri na wo oveni wina ovinamuinyo vyozombunguhiro zOpaska. 21 Ozombunguhiro nḓa za riwa i Ovaisrael avehe mba kotokere okuza kouhuura, na imba avehe mba isire okukarera ovisenginina vyoviwaṋa vyarwe mbya turire mehi, nu mbe ere okurikotamena ku Muhona, Ndjambi wa Israel. 22 Oure womayuva hambombari va tjita omukandi wOzomboroto nḓe hi nosurise. Owo va yoroka tjinene, Muhona tjinga a tjita ombara ya Asirie i kare nohange na wo, kokutja i ve vatere motjiungura tjawo tjokutungurura ondjuwo ya Ndjambi wa Israel.