Omaukiro nga hungirirwa ovaprofete ovarumendu vakaseruseru
1 Muhona wa hungira ku ami a tja: 2 “Muatje womundu, hungira novaprofete va Israel mbe rityera omaukiro wawo oveni amo ve rondora. Ve raera kutja ve puratene kembo ra Muhona.”
3 Muhona Ndjambi ma tja nai: “Owee kovaprofete omayova! Owo ve kongorera ozombepo zawo oveni, nu ve ripahera ovirimunikise vyawo oveni. 4 Tjiwaṋa tja Israel, ovaprofete voye oviporoporo tjimuna ozombandje nḓa tura momatundu wotjihuro. 5 Owo kave tjevere poṋa apehe orumbo pu rwa wira, nu wina kave tungurura orumbo. Israel otji tji hi nokusora okuzikama, ovita tji mavi ya meyuva ra Muhona. 6 Ovirimunikise vyawo vi ri posyo, nomaukiro wawo omanavizeze. Owo ve tja ve hungira ombuze yandje, nungwari ami tjandje hi ve hindire. Nu, tjiri, ve undja kutja ami Ndjambi, mbi yenenise omambo wawo! 7 Ami mbi ve raera nai: Ovirimunikise mbi mbi mu muna vi ri posyo, nomaukiro ngu mu zuvarisa owo omanavizeze. Eṋe mu tja owo omambo wandje, nungwari ami hi na pu mba hungirire na eṋe!”
8 Muhona Ndjambi opu ma tjere nai ku wo: “Omambo weṋu oviporoporo, novirimunikise vyeṋu ovizeze. Ami opu me pirukirire eṋe. 9 Ami mbi ri pokuvera eṋe, vaprofete, mbu mu kara novirimunikise vyoposyo nu mbu mu zuvarisa omaukiro omapukise. Eṋe kamu nokukara po otjiwaṋa tjandje tji matji worongana okutya omeripuriro watjo, omana weṋu kaye nokutjangwa membo rotjiwaṋa tja Israel; kamaamu yaruka kehi reṋu ra Israel. Notji mamu tjiwa kutja owami ngu mbi ri Muhona Ndjambi.
10 “Ovaprofete ve pukisa otjiwaṋa tjandje mokutja avihe vi ri osemba, avihe, tjiri, ngunda avi he ri nawa. Otjiwaṋa tjandje tja zika orumbo rwomawe nge kurakura, tjazumba ovaprofete otji ve ya ave ru serura nomunoko omuvapa. 11 Raereye ovaprofete mba kutja orumbo maru wire pehi. Me hindi ombura onḓeu. Ozombawe zombura maze wire kombanda yarwo, notjivepo otjinamasa matji hingi okuriveta mu rwo. 12 Orumbo otji maru wire pehi, nu auhe me mu pura kutja omunoko omuvapa mbwi u nombatero yatjike.”
13 Nambano otjiṋa Muhona Ndjambi tji ma hungire otjo hi: “Momazenge wandje ami me hindi otjivepo otjinamasa nombura onḓeu nozombawe zombura okunyona orumbo. 14 Ami me vanga okuhaṋa orumbo ndu mwa serura nomunoko omuvapa nokuruhahaura, nu me isa omawe womazikameno uriri. Orwo maru u naru mu zepa amuhe. Ovandu avehe otji mave tjiwa kutja owami ngu mbi ri Muhona.
15 “Orumbo na imba mbe ru serura nomunoko omuvapa mave munu omasa womazenge wandje pu ye ṱeki. Ami otji me mu raere kutja orumbo rwa zengi, na wina imba mbe ru serura nomunoko omuvapa, 16 okutja ovaprofete mba mba kwizikira Jerusalem kutja avihe vi ri osemba, avihe ngunda avi he ri osemba!” Muhona Ndjambi ongwa hungire.
Omaukiro nga hungirirwa ovaprofete ovakazendu vakaseruseru
17 Muhona wa tja nai: “Nambano, muatje womundu, tara kovakazendu motjiwaṋa tjeṋu mbe rityera omaukiro wawo oveni. Ve vera 18 amo ve raere imbi Muhona Ndjambi mbi ma hungire nai ku wo:
“Owee ku eṋe, vakazendu! Eṋe mu ya tatera omundu ngamwa auhe ozongoze zozongoho zopomaoko zoundjai, nu amu ungurire ovandu avehe omawiwiri woundjai kutja ve twe koviuru kokutja ve kare nouvara kombanda yominyo vyovakwao. Mu vanga okukara nouvara womuinyo nowonḓiro kombanda yotjiwaṋa tjandje, nu mu vanga okuungurira ouindandu weṋu. 19 Eṋe mu ndji yambururira momurungu wotjiwaṋa tjandje kokutja mu pewe ovirya tjiva omake okuura noutekero tjiva wozomboroto. Mu zepa ovandu mbe ha pwire okuṱa, nu mu hupisa ovandu mbe ha sere okuhupisiwa. Eṋe otji mu korera otjiwaṋa tjandje ovizeze, notjo arire tji tja kambura mu eṋe.”
20 Nambano Muhona Ndjambi ma tja nai: “Ami mbi nyengwa ozongoze zozongoho zopomaoko nḓu mu ungurisa mongondjero yeṋu kutja mu pate ominyo vyovandu tjimuna ozonḓera. Ami me ze pora pomaoko weṋu ne kutura ovandu mbu mwa pata nozombate tjimuna ozonḓera. 21 Me nyondorora omawiwiri weṋu, nu e kutura otjiwaṋa tjandje komauvara weṋu nga aruhe. Notji mamu tjiwa kutja owami ngu mbi ri Muhona.
22 “Novizeze vyeṋu eṋe mwa hihamisa ovasemba ami mbu mbi ha vanga okuhihamisa. Eṋe mu yanḓiparisa ovanauvi kutja ave ha isa ouvi nokutja ve yame ominyo vyawo. 23 Nambano ovirimunikise vyeṋu vyoposyo nomaukiro weṋu omapukise vya yanda. Ami me yama otjiwaṋa tjandje komauvara weṋu kokutja mu tjiwe kutja owami ngu mbi ri Muhona.”
© Herero Revision Bible © Bible Society in Namibia, 2021.
