Eyendo ri ri tjo
(Mt 28:1-8Mk 16:1-8Lk 24:1-12)1 Osondaha rukuru muhuka, ngunda akwa zorere, Maria Magdalena waya keyendo na kamuna kutja ewe ra isiwa po potjinyo tjeyendo. 2 Neye otja tupuka ku Simon Petrus na komuhongewa omukwao ngwi ngwa suvererwe i Jesus na katja ku wo: “Owo va isa mo Muhona meyendo, nu katu nokutjiwa kutja ve mu twa pi!”
3 Petrus nomuhongewa omukwao arire tji va i keyendo. 4 Owo aveyevari va utire okutupuka, nungwari ingwi omuhongewa omukwao wa tupuka okusya po Petrus na katenga po okuvaza keyendo. 5 Eye wa natera mu ro na munu inga omarapi pehi, nungwari ka hitire imwi meyendo. 6 Nu Simon Petrus wina we ere kombunda ye na hiti tjimanga meyendo. Eye wa munine inga omarapi aye ri pehi mbo, 7 na indwi orupera ndwa kutirwe kotjiuru tja Jesus. Orwo karwa ri puna omarapi, nungwari rwa yangerwe peke ku rwo oruini. 8 Omuhongewa ingwi omukwao ngwa tengere po okuya peyendo arire tja hiti mu ro wina; eye wa muna na kambura. 9 Owo tjandje ingee kaveya zuva nawa inga omatjangwa nga tja eye ma sokupenduka movakoke. 10 Okuzambo ovahongewa arire tji va yaruka kozoyawo.
Jesus me riraisa ku Maria Magdalena
(Mt 28:9-10Mk 16:9-11)11 Nu Maria wa kuramene pendje peyendo ama riri. Nu ngunda ama riri nao arire tje ripete, a natere meyendo, 12 na munu mo ovaengeri vevari, mba zara ozombanda ozombapa nu mba haama poṋa pu pa ri orutu rwa Jesus, umwe pu pa ri otjiuru nomukwao pu pa ri ozombaze. 13 Ovaengeri mba ve mu purire ave tja: “Mwari, mo ririre tjike?”
Maria a ziri a tja: “Owo va toora oMuhona wandje ave twara, nu hi nokutjiwa kutja ve kemutwa pi!”
14 Ngunda Maria ama hungire nai, wa tanauka na munu Jesus a kurama mbo, nungwari eye ke mu zemburukire kutja oJesus. 15 Jesus arire tje mu pura a tja: “Muyozikwa, mo ririre tjike? Ove mo paha aṋi?”
Maria wa tjangovasi eye omutarere wotjikunino, nopa tjera ku ye: “Muhona, tje ri ove ngu we mu toora, ndji raera kutja we kemutwa pi, nami me kemueta.”
16 Nu Jesus wa tjere ku ye: “Maria!”
Nu Maria a tanaukire ku ye na tja mOtjiheberi: “Rabuni!” (Okutja “Muhonge”.)
17 Jesus e mu raere a tja: “O ndji ṱunu, tjinga ingee ambi hiya ronda ku Tate. Nungwari twende kovangu vandje u keveraere nai: ‘Ami me yaruka ku Tate, wina ngu ri Iho yeṋu, na ku Ndjambi wandje, wina ngu ri Ndjambi weṋu.’ ”
18 Maria Magdalena arire tja karaera ovahongewa kutja eye wa munu Muhona, ne ve serekarerere avihe eye mbye mu raere.
Jesus me riraisa kovahongewa ve
(Mt 28:16-20Mk 16:14-18Lk 24:36-49)19 Nu mongurova ya Sondaha tjingeyo ndjo ovahongewa va woronganene, nomivero vya paterwe owo tjinga aave tira ovanane vOvajuda. Nu Jesus we ere, a kurama mokati kawo na tja: “Ohange ngai kare na eṋe.” 20 Tja za nokuhungira omambo nga, arire tje ve raisire omake norupati rwe. Ovahongewa va nyanda omitima tjinene tji va muna Muhona. 21 Jesus wa tjere ku wo rukwao: “Ohange ngai kare na eṋe. Otja Tate tjinga e ndji hinda otjinga ame mu hindi.” 22 Okuzambo a suvire mu wo a tja: “Kambureye Ombepo Ondjapuke. 23 Imba mbu mamu isire ourunde, owo mave isirwa, nu tji mu hi nokuveisira, owo kave nokuisirwa ko.”
Jesus na Tomas
24 Nu Tomas, wina ngu ku za oDidimus, umwe wovahongewa mba omurongo na vevari, ka ri puna ovakwao indu Jesus tje ere. 25 Ovahongewa ovakwao otji ve mu raera ave tja: “Eṱe Muhona twe mu munu!”
Tomas arire tja tja ku wo: “Ami ngunda ambi hiya muna ovito vyozomboha momake we, nu ngunda ambi hiya twa omunwe wandje movito mbi, neke randje morupati rwe, himee kambura ko.”
26 Nu kombunda yotjiveke ovahongewa va woronganene rukwao moukoto wondjuwo, nu Tomas e ri puna wo. Omivero vya paterwe, nungwari Jesus we ere, a kurama mokati kawo na tja: “Ohange ngai kare na eṋe.” 27 Tjazumba a tja ku Tomas: “Eta omunwe woye nguno nu u tare omake wandje; roporora okuoko kwoye nu u twe mo eke roye morupati rwandje. Nu o kara nokuhakambura, nungwari kara nongamburiro!”
28 Tomas arire tje mu ziri a tja: “Muhona wandje na Ndjambi wandje!”
29 Jesus a tja ku ye: “Ove wa kambura motjimbe tjokutja we ndji munu are? Ovaṋingandu imba mba kambura ave hiye ndji muna!”
30 Jesus wa tjitire ovihimise ovikwao ovingi komurungu wovahongewa ve, mbi ha tjangerwe membo ndi. 31 Nungwari ovihimise mbi vya tjangerwa kutja eṋe mu kambure kutja Jesus onguri Omutwirisiwa, Omuna wa Ndjambi, nokutja mongamburiro yeṋu mu ye a rire mu mwa kara nomuinyo.
© Herero Revision Bible © Bible Society in Namibia, 2021.
