Omerikotameneno wombongo
1 Rutengatenga, ami me mu zeuparisa nomutima wandje auhe kutja mu ningire ku Ndjambi a yenenise ouhepe wovandu avehe, nu mu kumbire ovandu avehe, nu mu tje okuhepa ku Ndjambi ku imbi mbya tjita kovandu avehe. 2 Kumbireye ozombara novandu avehe mbe ri mounane, kokutja tu kare nongarero ombore noyohange, atu nondira ku Ndjambi nomeritjindiro omawa kovandu varwe. 3 Okukara nai otjiṋa otjiwa nu tji tjata ku Ndjambi, Omuyame wetu. 4 Eye u vanga kutja ovandu avehe ve yamwe nu ve kare nondjiviro youatjiri. 5 Orondu pena Ndjambi umwe uriri, nu pena umwe uriri wopokati ka Ndjambi novandu, okutja eye ngwi omundu Kristus Jesus. 6 Eye we riyandjera omuini okukutura ovandu avehe. Ihi tja ri otjiraisiro moruveze orusemba tjokutja Ndjambi u vanga kutja ovandu avehe ve yamwe. 7 Nopu mba zokuhindwa otja omuapostele notja omuhonge wa imba mbe ha ri Ovajuda okukazuvarisa ombuze yongamburiro noyouatjiri. Ami hi nokukora ovizeze, me hungire ouatjiri.
8 Poṋa apehe pomerikotameneno ami me vanga kutja ovarumendu a rire mba kumbu, okutja ovarumendu mbe hupa omuinyo mbu tjata ku Ndjambi, nu owo tji mave yere omake wawo okukumba, ngave yere nokuhinomazenge momitima nozombata. 9 Ami wina me vanga kutja ovakazendu momuzaro wawo ve rire ovahirona novapwe okuyenena. Owo ave ripata ko ozondjise zawo nokuzara oviwerawere ovingoldo nokutwa ko oundjendje oukeṋakeṋe, nokuzara ozombanda zovimariva ovingi. 10 Nungwari omeriharekero wawo ye sokurira owoviungura oviwa, otja tjinga apa pwira ovakazendu mbe tja ve nondira ku Ndjambi. 11 Ovakazendu ngave rihonge kumwi nu ve risusuparise. 12 Ami hi nokuyandjera ovakazendu kutja ve honge mombongo poo kutja ve honaparere ovarumendu. Owo ngave mwine. 13 Orondu Adam ongwa tengere po okumemwa, tjazumba a rire Eva. 14 Nu wina Adam kangwa pukisirwe, nungwari omukazendu ongwe riyandjera okupukisiwa na katuka etwako ra Ndjambi. 15 Nungwari Ndjambi ma yama omukazendu mombandukiro ye, tjinangara ma panḓere pongamburiro norusuvero kovandu varwe, na tji me ritjindi mouyapuke nomeritjaerero.
© Herero Revision Bible © Bible Society in Namibia, 2021.
