2 Ozombara 23 - Herero Revision Bible (HRR)

Josija ma isa mo oviserekarera vyovisenginina

1 Ombara Josija wa isana ovanane avehe va Juda nova Jerusalem, 2 nowo va ya pamwe kondjuwo ya Muhona, amave kongorerwa i ovapristeri novaprofete notjiwaṋa atjihe, ovatumbe novasyona. Ombara ya resera Embo rOmerikutiropamwe nda vazerwe mondjuwo ya Muhona, neraka enene momurungu wawo avehe. 3 Tjazumba ombara Josija wa kakurama meṋe yongunḓe youhona na tjiti omerikutiropamwe na Muhona kutja ma kara nonḓuviro ku ye, nokutja ma ṱakamisa omazikamisiro nomatwako we nomutima nomuinyo we auhe, nu ma yenenisa omambo womerikutiropamwe otja tji ya tjangwa mEmbo ndi. Ovandu avehe va kwizika kutja mave ṱakama momerikutiropamwe nga.

4 Josija wa rakiza Omupristeri Otjiuru Hilkija, novapristeri ovavatere ve, novatjevere vopomahitiro wondjuwo ya Muhona kutja ve pitise oviṋa avihe mu yo, mbyaa vi ungurisiwa mokukarera Baal, nomukuru wotjisenginina oserekaze Asera, nozonyose. Ombara ya ningiririsira oviṋa avihe mbi pendje yotjihuro, popezu nomukutu wa Kidron, nu tjazumba ya raera kutja omutwe u twarewe kObetel. 5 Eye wa isa mo ovapristeri mba moviungura mba twirisirwe i ozombara za Juda okupunguhira ozombunguhiro kovipunguhiro vyovisenginina movihuro vya Juda na movirongo vyopopezu na Jerusalem, okutja ovapristeri avehe mbaa ve punguha ozombunguhiro ku Baal, na keyuva na kozonyose ozonene nozonḓiṱi. 6 Ombara Josija wina wa isa mo otjihenḓe otjizere tji tja yapurirwa omukuru wotjisenginina oserekaze Asera mondjuwo ya Muhona, e tji pitisa motjihuro, e tji twara komukutu wa Kidron ne ketjiningiririsa, na ṱukuṱura oviningiriro vyatjo nga tji vya rire oruuma, ne ru rimbire momaendo wovandu vakauriri. 7 Eye wa nyona omatuwo wovakorondu, nga ri keṋe yondjuwo ya Muhona. Moṋa mo ovakazendu omaave tungire otupera tuya tuungurisiwa momerikotameneno ku Asera. 8 Eye wa eta ovapristeri, mba ri movihuro vya Juda, kOjerusalem, nu mehi arihe okuza mOgeba nga kOberseba wa yamburura ovipunguhiro kaave punguhire ozombunguhiro. Eye wina wa haṋa ovipunguhiro mbya yapurirwa oviserekarera vyozongombo nḓe nozombepo ozombi, mbya ri popezu nomuvero mbwa tungirwe i Josua, ongooneya yotjihuro, nu mbwa ri komukuma wokokumuho kwomuvero omunene, tji mo hiti motjihuro. 9 Ovapristeri mbo kaave yandjerwa okukarera mondjuwo ya Muhona, nungwari aave sora okurya omboroto, ndji hi nosurise, ndjaave pewa i ovapristeri ovakwao.

10 Ombara Josija wina wa yamburura oTofet, imba poṋa pomerikotameneno kovisenginina momukutu wa Hinom, kokutja ape ha ningi umwe ngu ma punguha omuatje we omuzandu poo omukazona okurira ombunguhiro oningiririsiwa komukuru wotjisenginina Molek. 11 Eye wina wa isa mo oukambe ozombara za Juda mbu za yapurire okurikotamena na wo keyuva, na ningiririsa omatemba wawo wovita nguyaze ungurisa momerikotameneno nga. Oukambe mbwi aa u ṱizirwa morupanda rwondjuwo ya Muhona, pomahitiro wayo, popezu netuwo ra Netan-Melek, omukarere ombondo wondjuwo youhona. 12 Ovipunguhiro mbya tungirwe i ozombara za Juda komututu wondjuwo youhona, kombanda yetuwo rombara Ahas, ombara Josija we vi haṋa puna ovipunguhiro mbya tungirwe i ombara Manasse motupanda twi tuvari twondjuwo ya Muhona; eye wa hahaura ovipunguhiro mbi ne vi imbirahi momukutu wa Kidron. 13 Josija wa yamburura ovipunguhiro mbya tungirwe i ombara Salomo, komukuma wokomuhuka wa Jerusalem, keyuva kokumuho kwOndundu yOmiṋinga okurikotamena koviserekarera oviyaukise, okutja ooAstarte, omukuru wotjisenginina oserekaze wa kOsidon, na Kemos, omukuru wotjisenginina wOvamoab, na Milkom, omukuru wotjisenginina wOvaamoni. 14 Ombara Josija wa hahaura ozongunḓe zomawe, na ke ovihenḓe ovizere mbya yapurirwa omukuru wotjisenginina oserekaze Asera; nu imba poṋa pu vya kuramene, we pe vandeka nomaṱupa wovandu.

15 Josija wina wa haṋa poṋa pomerikotameneno mObetel, pu pa tungirwe i ombara Jerobeam, omuzandu wa Nebat, ngwa turisa Ovaisrael ondjo. Josija wa haṋa otjipunguhiro hi na nyanyaura omawe watjo ne ye kweye nga tji ya rira oruuma; wina wa ningiririsa otjihenḓe tji tja yapurirwa okurikotamena komukuru wotjisenginina oserekaze Asera. 16 Josija wa yevayeva na munu omaendo tjiva kondunda; eye wa raera kutja omaṱupa ye isiwe mo nu ye ningiririsirwe kotjipunguhiro. Komuhingo mbwi otja yamburura otjipunguhiro hi ama tjiti otja omuprofete pa ukire rukuru, ombara Jerobeam ngunda a kurama potjipunguhiro meyuva romukandi. Ombara Josija wa yevayeva na munu eyendo romuprofete ingwi ngwa ukire nao. 17 Eye wa pura a tja: “Eyendo ndi orauṋe?”

Novandu va Betel va zira ave tja: “Oro eyendo romuprofete ngwa zire kOjuda nu ngwa ukire oviṋa mbi mbi wa tjiti kotjipunguhiro hi.”

18 Josija wa rakiza na tja: “Ri esa ri kare otja tji ri ri. Omaṱupa we kaye nokuisiwa mo.”

Omaṱupa we otji ye ha isirwe mo, nangarire omaṱupa nga womuprofete ngwa zire kOsamaria.

19 Motjihuro atjihe mOisrael ombara Josija wa haṋa poṋa apehe pomerikotameneno kovisenginina kozondunda, pu pa tungirwe i ozombara za Israel, mbi za pindikisa na vyo Muhona. Eye wa tjita kovipunguhiro mbi otja tja tjitire mObetel. 20 Eye wa zepera ovapristeri avehe vovisenginina kotjipunguhiro kaave karere, na ningiririsire ko omaṱupa wovandu kotjipunguhiro atjihe peke. Tjazumba arire tja yaruka kOjerusalem.

Josija ma tjitire Eyuva rOpaska Omukandi

(2Eku 35:1-19)

21 Ombara Josija wa rakiza kutja ovandu ve tjite Eyuva rOpaska kondjozikiro ya Muhona, Ndjambi wawo, otja tji pa tjangwa mEmbo rOmerikutiropamwe. 22 Kape na pu pa tjitirwe Eyuva rOpaska otja indi imwe yozombara za Israel poo za Juda, okuza koruveze ndwi ovapungure tjaave honaparere otjiwaṋa. 23 Nambano, mombura oitjamurongo na hambondatu youhona wa Josija, Eyuva ndi rOpaska otji ra tjitwa mOjerusalem.

Omarundururiro warwe nga tjitwa i Josija

24 Ombara Josija wa isa mo ozondjai nozombetere azehe, noomukuru avehe vomozondjuwo, novisenginina, noviṋa avihe vyarwe vyovisenginina vyokurikotamenwa mOjerusalem na mehi arihe ra Juda; komuhingo mbwi otja zeuparisa omazikamisiro womatwako, nga tjangwa mEmbo rOmerikutiropamwe nda vazewa i Omupristeri Otjiuru Hilkija mondjuwo ya Muhona. 25 Kape na pu pa ri ombara ndja ri otja ye komurungu we, ndja karera Muhona nomutima auhe nozondunge azehe nomasa aehe, mokukara nonḓuviro komatwako aehe wa Moses; wina kape na pu pa ri ombara ndja ri otja ye kombunda ye.

26 Nungwari Muhona wa ṱomazenge tjinene na Juda mena raimbi avihe ombara Manasse mbya tjitire, nu nga nai omazenge nga kayeya yanda. 27 Muhona wa tja nai: “Ami me tjiti kOjuda otja pu mba tjita kOisrael. Ami me zengisa otjiwaṋa tja Juda momeho wandje, nu me imbirahi Jerusalem, ihi otjihuro tji mba toorora, nondjuwo wina, ami ndji mba tja omu me rikotamenenwa.”

Ondjandero youhona wa Josija

(2Eku 35:20—36:1)

28 Oviṋa avihe vyarwe Josija mbya tjita vya tjangwa mEkuruhungi rOzombara za Juda. 29 Josija ngunda a ri ombara, Neko, ombara ya Engipte, wa hongorera otjimbumba tjovita konḓonḓu Eufrat okukavatera ombara ya Asirie. Ombara Josija wa kondja okutjaerera otjimbumba tjovita tjOvaengipte mOmegido, narire tja ṱu movita. 30 Ovahongore ve va twa orurova rwe metemba rovita nave ru yarura kOjerusalem, ku rwa kapakwa momaendo wouhona.

Otjiwaṋa tja Juda tja toorora Joahas, omuzandu wa Josija, nave mu twirisa okurira ombara.

Joahas ma rire ombara mOjuda

(2Eku 36:2-4)

31 Joahas wa ri notjiwondo tjozombura omirongo vivari nandatu tja rira ombara mOjuda, neye wa honapara oure womieze vitatu mOjerusalem. Ina wa ri Hamutal, omusuko wa Jirmeja, ngwa zire kotjihuro Libna. 32 Eye wa tura ondjo komurungu wa Muhona mokuhorera kotjikaro tjooihe mukururume. 33 Ouhona we wa yanda, indu tja huurwa i Neko, ombara ya Engipte, nu Neko we mu twara kOribla, mehi ra Hamat, otja omuhuurwa na ṋiṋikiza Ovajuda kutja ve sute osilveri yondjinda yozokirograma 3 400, nongoldo yondjinda yozokirograma omirongo vitatu na ine. 34 Ombara Neko wa zika Eljakim, omuzandu wa Josija, ombara ya Juda, a rire omupingene wa Josija, nu wa rundurura ena re okurira Jojakim. Joahas wa twarewa kOengipte i ombara Neko, na kakokera ngo.

35 Ombara Jojakim wa wonga otjisuta movandu otja komasorero wawo kokutja a wongere po ombuto, ndji mai sutu imbi mbyaa vi vangwa i ombara ya Engipte.

Jojakim ma rire ombara mOjuda

(2Eku 36:5-8)

36 Jojakim wa ri notjiwondo tjozombura omirongo vivari nandano tja rira ombara mOjuda; neye wa honapara oure wozombura omurongo na imwe mOjerusalem. Ina wa ri Sebuda, omusuko wa Pedaja, ngwa zire kotjihuro Ruma. 37 Jojakim wa tura ondjo komurungu wa Muhona mokuhorera kotjikaro tjooihe mukurume.