Omerizirira kovakambure
1 O vete omambo omakukutu momundu omunene, nungwari mu tjinda nondengero aayo eye oiho; tjinda ovarumendu omitanda aayo owo ovangu woye, 2 novakurukaze aayo owo oonyoko, novakazendu omitanda aayo owo ovaṱena kwoye, nondengero aihe.
Ovahepundu
3 Yozika ovahepundu mbe ri ovahepundu tjiri. 4 Nungwari omuhepundu tje novanatje poo ovanatje wovanatje ve, ovanatje mba rutenga ve sokurihonga okutjita imbi mbi ve sokutjita mozonganda zawo oveni, nu komuhingo mbwi ve yarure ouwa kovanene na kovakurundu vawo. Orondu ihi otji tji tjata ku Ndjambi. 5 Nomuhepundu, ngu ri omuhepundu tjiri, nu ngu hi nomundu okumuṱakamisa, eye we rihonga okutwa omaundjiro we mu Ndjambi, nu ma panḓere pokukumba nokuningira ombatero ku ye, ouṱuku nomutenya. 6 Nungwari omuhepundu ngwe ritwa mevyaro wa ṱa ngunda e nomuinyo. 7 Ve raera nawa omahongero nga kutja ape ha ningi umwe wawo ngu ma kara notjikaro otjihazendu. 8 Nungwari omundu ngamwa tje hi nokuṱakamisa ovazamumwe na ye, nu tjinene imba ovonganda ye omuini, eye wa pataṋa ongamburiro youkriste, neye omuvi tjinene okukapita omuhakambura.
9 Omuhepundu u sokutjangwa momatjangero wovahepundu, indu tje notjiwondo tjo kombanda yozombura omirongo hamboumwe, nu tja kupirwe rumwe uriri. 10 Eye ma sokutjiukwa otja omukazendu woviungura oviwa: Omukazendu ngwe kurisa ovanatje ve nawa, nu ngwaa sekirisa ovayenda moye, nu ngwaa ungura oviungura vyomerisusuparisiro kovakambure ovakwao, nu ngwaa vatere ovandu, mba ri momauzeu, nu ngwaa panḓere potjiungura atjihe otjiwa.
11 Nungwari ovahepundu omitanda o ve yakura ko momatjangero nga. Orondu ozonḓuma zawo zonyama tji maze ve pe onḓero yokukupwa rukwao, owo ve isa Kristus, 12 notji ve rira ovanandjo mokuteya omakwizikiro ngu va tjitire ku ye rutenga. 13 Owo wina ve ri iririsa ongaro yotjirweyo nokuryanga pokati kozonganda; nu katjirweyo otjini porwe nungwari wina ve rihonga okukara motuyambo, nokuritwa moviṋa vyovandu varwe amave hungire oviṋa, mbi ve ha sere. 14 Ami opetje vangera kutja ovahepundu omitanda ve kupwe, ve kwate ovanatje, nu ve ṱakamise ozonganda zawo, kokutja ave ha roro okuyandjera ovanavita na eṱe okutuyamburura. 15 Orondu pe novahepundu tjiva mba isa Kristus nu mba kongorera Satan. 16 Nu tjinangara pe nomukazendu omukambure ngu novahepundu monganda ye, eye ma sokuveparura. Eye ke nokusokuyandja ouzeu mbwi kombongo, kokutja oyo i parure ovahepundu mba mbe hi nomuparure.
Ovanene wombongo
17 Ovanene wombongo mbe ungura otjiungura otjiwa otja ovanane va pwa okupewa ondjambi potuvari, tjinene imba mbe ungura nomasa tji mave zuvarisa nokuhonga. 18 Orondu omatjangwa maye tja: “O pata otjinyo tjonduwombe, ndji mai yata ovikokotwa”, nu rukwao: “Omuungure wa pwa pokupewa ondjambi ye.” 19 O puratene ko komakuminino ngu maye tjitwa komunene wombongo, ndoovazu kape novahongonone vevari poo vetatu. 20 Imba mbe kaenda komurungu okutjita ourunde, ve verera momurungu wovandu avehe, kokutja ve rire otjihorera kovakwao.
21 Me ku ningire komurungu wa Ndjambi na Kristus Jesus novaengeri ovatoororwa kutja u ṱakamise omahongero nga au hi na ngu mo ingonoke nau hi na ku mo karere. 22 O hakahana okuyambeka omake komundu tjapo ngoo kara norupa momaurunde wovakweṋu; panḓera poukohoke.
23 O nu ko omeva porwe, nungwari nwaa omavinu ouṱiṱi okurivatera na wo pehuri, ove tjinga au ri omuverandu.
24 Ourunde wovandu tjiva u munika uriri poruhaera, nowo u ve hongorera kombanguriro; nungwari ourunde wovandu varwe u kahoroka kombunda uriri. 25 Nu momuhingo tjingewo mbwi wina oviungura oviwa vi munika poruhaera; nu nandarire imbi mbi ha munika nawa, kavi sora okuhorekwa.
© Herero Revision Bible © Bible Society in Namibia, 2021.
