Ongumbiro yokuyamwa
Komuimburise. Epsalme ra David.
1 Ndji yama kovanauvi, Muhona,
nu u ndji tjevere kovatjite voutwe.
2 Owo aruhe ve ripura okutjita ouvi,
nu eyuva arihe ve pendura oviposa.
3 Omaraka wawo ye nouzuwo
tjimuna owozonyoka,
omambo wawo ye ri tjimuna ouzuwo wesu.
4 Ndji yama kutja e ha wire
momake wovanauvi, Muhona;
nu ndji tjevera kovatjite voutwe
mbe rizemburuka okundjiputarisa.
5 Overitongamise ve ndji twira po ozombate,
owo ve ndji yarera
ozongwehe okundjikambura,
nu va pata otjitenda mondjira yandje.
6 Ami me tja nai ku Muhona:
“Oove Ndjambi wandje.”
Muhona, zuva eraka
romeriyarikaṋeno wandje!
7 Muhona, Ndjambi wandje,
oove ngu u ri omuvatere wandje omunamasa;
mo ndji yama motjirwa.
8 Muhona, o yandjere ovanauvi
okutjita ombango yawo;
o yandjere kutja omeripura wawo ye toṋe.
9 O yandjere ovanavita na ami kutja
ve ndji havere; omatandero wawo
ku ami ngaye yaruke mu wo oveni.
10 Omakara omapyu ngaye wire
kombanda yawo;
ve wisira motjitoto tjomunoko kutja
ave ha piti mu tjo rukwao.
11 Imba mbe kuminina ovakwao,
ave kara ko mehi;
oumba aruhe ngau ye kovatjite voutwe.
12 Ami me tjiwa kutja Muhona u
karera kovanandjenda motjiposa tjawo
novasyona mombanguriro yawo.
13 Tjiri, imba ovasemba mave tanga ena roye;
owo mave tura momurungu woye.
© Herero Revision Bible © Bible Society in Namibia, 2021.
