Ozombahu otja omaronga kEyuva ra Muhona
1 Toneye ohiva kOsion,
kondundu yandje ondjapuke!
Ovature vehi avehe ngave zezere,
orondu Eyuva ra Muhona ri ri pokuya.
2 Oro mari rire eyuva ronḓorera noromuzororema,
eyuva rovizorokamba ovizeu.
Otjimbumba otjinene notjinamasa tjozombahu
matji ya otja onḓorera kombanda yondundu.
Kapa ri otjimbumba otja ihi rutenga
nu kamaatji kakara po rukwao.
3 Notja omuriro omusesete
ozombahu nḓa otji maze ri ovihape.
Okuti ku ku ri komurungu watjo
kwa sana notjikunino tja Eden,
nu kombunda yatjo, tjiri, okuti onguza porwako;
nu kape notjiṋa tji matji sora okutaura.
4 Otjo matji munika otja oukambe
nu matji tupuka otja oukambe wovita.
5 Otja tji ma tji tukatuka kozondomba zozondundu,
ma tji pose otja omaporokotero womatemba wovita,
notja tji ma tji pumbura ehozu
otjo ma tji pose tjimuna omutetemo
womuriro mbu mau seseta omahozu.
Otjo tja kurama moruteto tjimuna otjimbumba
otjinene tjovita tji tje rirongerera ovita.
6 Notja tji matji ryama popezu,
oviwaṋa avihe tjandje mavi tira,
nomirungu avihe mavi tjituka.
7 Matji ru ovita otja omapenda;
nu matji rondo komakuma
worumbo otja ovarwe wovita,
auhe ama twara ondjira ye osemba
uriri nokuhinokuyepa.
8 Kape na ngu ma ṋee omukwao;
auhe ma i kombii ye omuini,
nu mave tuurunga mokati
kovirwise nokuhinotjitjaere.
9 Owo mave sekamene otjihuro,
mave rondo orumbo motjikara,
mave hiti mozondjuwo
nave tuurungire motuiho otja omarunga.
10 Ehi mari posisa omungunda komurungu wawo,
neyuru mari nyinganyinga;
eyuva nomueze mavi zorere,
nondjerera yozonyose mai ṱumbu.
11 Muhona ma yere eraka re kotjimbumba tje tjovita,
otjimbumba tji tji nonḓuviro ku ye,
otjinene notjinamasa.
Eyuva ra Muhona enene netirise!
Owaṋi ngu ma hupu mu ro?
Omaisaneno kokuritanaura
12 Muhona ma tja nai:
“Ritanaureye ku ami nomitima vyeṋu avihe,
amamu ritjaere kovikurya
namamu riri nu amwa ṱoruhoze.
13 Omitima vyeṋu mbya nyaika ngavi ningise ondjenda;
okutaura ozombanda zeṋu kapukwo.”
Ritanaureye ku Muhona, Ndjambi weṋu.
Eye omunatjari nomunaunyaṋutima,
u nomuretima nouwa ounene;
eye aruhe u nombango okuisira,
nokuhina ku vera ovandu aruhe.
14 Muhona, Ndjambi weṋu ngahino
ma vingurura omerizemburukiro we,
ne mu sere ondaya mokumupa omakondero omengi
kutja mu yenene okumupunguhira ovikokotwa nomavinu.
15 Toneneye ohiva kondundu Sion,
zikamiseye eyuva romeritjaerero kovikurya,
nu mu raere kutja ngape tjitwe eyuva rongumbiro!
16 Woronganiseye otjiwaṋa mu yapure ombongo;
woronganiseye ovakurundu
novanatje novanyame wina;
ovandu, mba kupasana nambano,
ngave pite mondjuwo yawo yondjova nu ve ye.
17 Ovapristeri mbe karera Muhona mondjuwo ye
ngave ririre pokati komahitiro wayo notjipunguhiro,
nu ve kumbe nai:
“Muhona, yama otjiwaṋa tjoye,
nu o tji ṱisa ohoṋi kutja ovanavisenginina
ave he ketjinyekerera amave tja:
‘Ndjambi weṋu u ri pi?’ ”
Ndjambi ma yarura ehi romakunino koupe
18 Muhona we rikendera ehi re,
notja tjariparera otjiwaṋa tje.
19 Eye we tji zira a tja:
“Nambano ami me mu pe ovikokotwa
nomavinu nomaze womiṋinga
kutja vi mu kutise.
Imba mbe he ri Ovajuda kamaave
kemunyekerera rukwao.
20 Ami me isa mo otjimbumba tjozombahu
mokati keṋu tji tja zire keyuva kokunene
e tji rambere mokuti onguza.
Inḓa zokomurungu me ze rambere
mOmuronga wOmongwa,
nu inḓa zokombunda me ze rambere
mOmuronga Mediterania.
Otutu twazo matu tjiti omboru,
ndji mai ṋuka navi.
Me ze nyono motjimbe tja imbi mbi za tjita.
21 “Hi romakunino, o tira,
nungwari nyanda u yoroke,
orondu Muhona me ku
tjitire oviṋa ovinene!
22 Vipuka vyokuti, amu tira!
Omaryo mokuti maye nyomoka rukwao;
omiti mavi eta ovihape,
nomikuyu nomivite mavi
twako ovikurya ovingi.
23 “Nyandeye vanatje va Sion,
yorokereye imbi Muhona,
Ndjambi weṋu mbye mu tjitira!
Eye we mu pa ombura yondjoura,
nu we mu rokisire ombura ondemune
notjiseseta tjimuna indu rukuru.
24 Ovitondero mavi ura novikokotwa,
novikameno mavi tikatika nomavinu
nomaze womiṋinga.
25 Ami me mu kotorere omakondero
wovihape nga nyonenwe mozombura
nḓa kapita i ozombahu,
ihi otjimbumba tjandje tjovita otjinene
tji mba hindire ku eṋe.
26 Nambano eṋe mamu kara novingi
okurya nga tji mwe kuta.
Neṋe mamu tanga ena ra Muhona,
Ndjambi weṋu ngwe mu tjitira ovihimise.
Otjiwaṋa tjandje kamaatji nyekererwa
rukwao nga aruhe.
27 Neṋe otji mamu tjiwa kutja ami
mbi ri mokati kOvaisrael,
nokutja ami owami Muhona,
Ndjambi weṋu,
nu kape na warwe.
Otjiwaṋa tjandje kamaatji nyekererwa
rukwao nga aruhe.”
Omatiririro wOmbepo ya Muhona
28 “Kombunda yanao ami me tirire Ombepo
yandje kombanda yovandu avehe;
ovazandu novakazona veṋu mave
zuvarisa ombuze yandje,
ovakururume veṋu mave roto oturoto,
nomitanda vyeṋu mavi munu ovirimunikise.
29 Moruveze tjingero ndo ami me
tirire Ombepo yandje kombanda
yovakarere ovarumendu novakazendu.”
Eyuva ra Muhona
30 “Nu me twako oviraisiro ovihimise
keyuru na kombanda yehi:
Ombinḓu nomuriro novikamba vyomuise.
31 Eyuva mari zorerisiwa,
nomueze mau seraere,
Eyuva ra Muhona indi enene
netirise ngunda ari hiye ya.
32 Nu auhe ngu ma isana ena ra Muhona ma hupisiwa.
Otja Muhona pa hungirire kutja:
‘Tjiva mave taurire mOjerusalem,
nu imba Muhona mba toorora mave hupisiwa.’ ”
© Herero Revision Bible © Bible Society in Namibia, 2021.
