Petrus ma serekarere kombongo mOjerusalem
1 Ovaapostele novakambure ovakwao varwe mehi arihe ra Judea va zuva kutja imba mbe he ri Ovajuda wina va yakura embo ra Ndjambi. 2 Petrus tje ya mOjerusalem, imba mbaa ve panḓere pokusukarisa imba mbe he ri Ovajuda arire tji ve mu posisa ave tja: 3 “Ove wa sekirire monganda ya imba mbe he ri Ovajuda novahasukara no ri puna wo!” 4 Petrus otje ve serekarerera nawa avihe mbya tjitwa okuza kombutiro a tja:
5 “Ami mba ri motjihuro Jopa ame kumbu, narire tji mba munu otjirimunikise. Mba muna otjiṋa tji matji raurirwa pehi nu tjaa tji munika otja erapi enene nda ṱiziwa kovikoro vyayo vine nu ndi ma ri herurwa keyuru, noro ari yekukurama meṋe yandje. 6 Mba tara nawa moukoto ne munu mo ovipuka ovinavikoti vine, novikokozoke, nozonḓera zokuti. 7 Tjazumba e zuu eraka ndi mari tja nai ku ami: ‘Sekama, Petrus, zepa u rye!’ 8 Nungwari ami e ziri e tja: ‘Kako, Muhona! Ami hi na indu mba twire otjiṋa otjihakohoke poo tji tja tjaerwa motjinyo tjandje.’ 9 Eraka ra tja nai rukwao okuza meyuru: ‘Imbi Ndjambi mbya vara otja ovikohoke o vi vara ko otja ovihakohoke.’ 10 Notjiṋa hi tja tjitwa tutatu, nerapi arire tji ra yarurwa rukwao keyuru. 11 Nu tjimanga moiri tjingeyo ndjo ovarumendu vetatu mba mba hindirwe ku ami okuza kOsesarea, arire tji ve ya pondjuwo ami mu mba ri. 12 Ombepo ye ndji raera kutja mbi yende puna wo nokuhinokuivaiva. Ovakambure ovakwetu hamboumwe mba mba zire kOjope ve ndji kongorera okuyenda kOsesarea, nu atuhe twa kahita mondjuwo ya Kornelius. 13 Eye we tu serekarerera kutja wa muna omuengeri ngwa kuramene mondjuwo ye, nu ngwa tja nai ku ye: ‘Hinda omundu kOjopa a kaete omurumendu wena Simon Petrus. 14 Eye ma hungire omambo kove ngu maye ku yama puna eṱunḓu roye arihe.’ 15 Nami tji mba uta okuhungira, Ombepo Ondjapuke arire tji ye ya kombanda yawo otja tjinga aye ere kombanda yetu kombutiro. 16 Tjazumba otji mba zemburuka imbi Muhona mbya hungirire indu tja tjere: ‘Johanes wa papitisa nomeva, nungwari eṋe mamu papitisiwa nOmbepo Ondjapuke.’ 17 Ongahukiro kutja Ndjambi wa yandja ku imba mbe he ri Ovajuda otjiyandjewa tjingetjo hi eye tja yandjere ku eṱe indu tji twa kambura mu Muhona Jesus Kristus; nowami aṋi kutja mba sere okutjaera Ndjambi!”
18 Ovakambure ovakwao mOjerusalem tji va zuva omambo nga, arire tji va kara nohange nave tanga Ndjambi ave tja: “Nangwari Ndjambi wa yandja ku imba mbe he ri Ovajuda wina ondanaukiro yomutima kokutja ve kare nomuinyo!”
Ombongo mOantiokie
19 Ovakambure tjiva mba rimbirwe i ondatumisire ndja kara po kombunda yonḓiro ya Stefanus va ya nga kOfenisie na Siprus na Antiokie amave zuvarisa indji ombuze ya Jesus kOvajuda porwe. 20 Nungwari ovakambure ovakwao, ovarumendu mba zire kOsiprus na Kirene, va ya kOantiokie ave kazuvarisa Ombuze Ombwa ku imba mbe he ri Ovajuda yokutja Jesus onguri Muhona. 21 Omasa wa Muhona ya ri puna wo, notjivaro otjingi tjovandu tja kambura natji ritanaurire ku Muhona.
22 Ombongo mOjerusalem ya zuva imbi mbya tjitwa mOantiokie, notji ya hinda Barnabas ngo. 23 Neye tje ya ngo na munu imbi Ndjambi motjari tje mbya tjita mokati kovandu, arire tja nyanda tjinene ne ve zeuparisa kutja ve panḓere pu Muhona nomitima vyawo avihe. 24 Barnabas wa ri omurumendu omusemba ngwe urire nOmbepo Ondjapuke nongamburiro onḓeu, nu pe riweza ovandu ovengi tjinene pu Muhona.
25 Nu Barnabas wa ya kOtarsus okukapaha Saulus. 26 Nu tje mu muna we mu eta kOantiokie, noure wombura aihe owo aveyevari va ungura pamwe mombongo ndji nave hongo otjimbumba otjinene tjovandu. MOantiokie ovakambure omu va isanenwa porutenga kutja ovakriste.
27 Moruveze mangara tjingero ndo ovaprofete tjiva va zire kOjerusalem ave i kOantiokie. 28 Nu umwe wawo wena Agabus wa sekama, nu momasa wOmbepo Ondjapuke arire tja uku kutja mehi arihe mamu ya ondjara onene. Noyo ye ya momayuva nga Klaudius tja ri ombara. 29 Ovahongewa va tya kutja auhe wawo ma yenene okuhinda po otjiṋa otja puma sora okuvatera ovakambure ovakwao mba tura mehi ra Judea. 30 Nowo otjinga ava tjita nave hindi ovimariva puna Barnabas na Saulus kovanene wombongo mOjerusalem.