Ehi nda yandjewa komuhoko wa Simeon
1 Omayandjero oyetjavari ya yandjewa komaṱunḓu womuhoko wa Simeon. Orukondwa rwehi rawo rwa ri mokati kehi nda yandjerwe komuhoko wa Juda. 2 Mu ro mwa ri ovihuro mbi: OoBerseba na Seba na Molada, 3 na Hasar-Sual na Bala na Esem, 4 na Eltolad na Betul na Horma, 5 na Siklag na Bet-Markabot na Hasar-Susim, 6 na Bet-Lebaot na Saruhen. Avihe kumwe vya ri ovihuro omurongo na vitatu puna ovirongo vyavyo. 7 Wina pa ri Ajin na Rimon na Eter na Asan. Avihe kumwe vya ri ovihuro vine puna ovirongo vyavyo. 8 Mehi ndi wina mwa ri ovirongo vine mbya kondoroka ovihuro mbi nga kObaalat-Beer, tji tji ri Ramat-Negeb. Indi onda ri ehi romaṱunḓu womuhoko wa Simeon ndi va pewa ri rire ouini wawo. 9 Indi ehi ra Juda tjinga ara ri enene tjinene, orukondwa rumwe rwaro opu rwa yandjerwa komuhoko wa Simeon.
Ehi nda yandjewa komuhoko wa Sebulon
10 Omayandjero oyetjatatu ya yandjewa komaṱunḓu womuhoko wa Sebulon. Ehi, ndi va pewa ra tandavara nga kOsarid. 11 Imbwi omuruko wa ronda komukuma wokongurova nga kOmarala, nau ṱunu kOdabeset na komupupo kuṱa komuhuka wa Jokneam. 12 Nu munda mbwina na Sarid owo wa ya komuhuka komukuro wa Kislot-Tabor, nau ryama kOdaberat, au rondo kOjafia. 13 Nokuzambo owo wa ryama kuṱa komuhuka kOgat-Hefer na kOetKasin, nau tanaukire kOrimon amau i kOnea. 14 Nu kuṱa keyuva kokunene omuruko wa tanaukira kOhanaton au kayandera momukutu wa Jiftak-El. 15 Mehi ndo mwa ri ovihuro mbi: OoKatat na Nahalal na Simron na Jidala na Betlehem. Avihe kumwe vya ri ovihuro omurongo na vivari puna ovirongo vyavyo. 16 Ovihuro mbi novirongo vyavyo vya ri mehi nda yandjewa komaṱunḓu womuhoko wa Sebulon ri rire ouini wawo.
Ehi nda yandjewa komuhoko wa Isakar
17 Omayandjero oyetjaine ya yandjewa komaṱunḓu womuhoko wa Isakar. 18 Mehi rawo omu mwa ri ovihuro mbi: OoJesreel na Kesulot na Sunem, 19 na Hafarajim na Sion na Anahara, 20 na Rabit na Kisjon na Ebes, 21 na Remet na En-Ganim na En-Hada na Bet-Pases. 22 Nu imbwi omuruko wina wa ṱuna kondundu Tabor, na kovihuro Sahasajim na Bet-Semes au kayandera mOjordan. Nowo wa kondoroka ovihuro omurongo na hamboumwe puna ovirongo vyavyo. 23 Ovihuro mbi puna ovirongo vyavyo vya ri mehi nda yandjewa komaṱunḓu womuhoko wa Isakar ri rire ouini wawo.
Ehi nda yandjewa komuhoko wa Aser
24 Omayandjero oyetjatano ya yandjewa komaṱunḓu womuhoko wa Aser. 25 Mehi rawo omu mwa ri ovihuro mbi: OoHelkat na Hali na Beten na Aksaf, 26 na Alamelek na Amad na Misal; nu komukuma wokongurova oro ra ṱuna kondundu Karmel na komupupo wa Sihor-Libnat. 27 Nu imbwi omuruko tji wa vingurukira kuṱa komuhuka wa ya kObet-Dagon amau ṱunu kehi ra Sebulon na komukutu wa Jiftak-El amau i komukuma wokeyuva kokunene kObet-Emek na kOnegiel; nowo wa ryama kuṱa keyuva kokunene kOkabul, 28 na Abdon na Rehob na Hamon na Kana nga kOsidon-Otjinene. 29 Tjazumba omuruko wa vingurukira kOrama au vaza kOtirus, otjihuro tji tja zeuparisiwa; wa vingurukira kOhosa au kayandera mOmuronga Mediterania. Omuruko mbwi wa kondoroka ovihuro Mahaleb na Aksib, 30 na Uma na Afek na Rehob. Avihe kumwe vya ri ovihuro omirongo vivari na vivari puna ovirongo vyavyo. 31 Ovihuro mbi puna ovirongo vyavyo vya ri mehi nda yandjewa komaṱunḓu womuhoko wa Aser ri rire ouini wawo.
Ehi nda yandjewa komuhoko wa Naftali
32 Omayandjero oyetjahamboumwe ya yandjewa komaṱunḓu womuhoko wa Naftali. 33 Omuruko wehi ndi wa utira mOhelef nau ryama komumbonde mOsaananim, nau i kOadami-Nekeb na kOjabneel nga kOlakum au kayandera mOjordan. 34 Imbwi omuruko wa vingurukira kuṱa kongurova okuhungama Asnot-Tabor, okuzambo au i kOhukok amau kaṱuna kehi ra Sebulon kuṱa keyuva kokumuho, na kehi ra Aser komukuma wokongurova, na kOjordan komukuma wokomuhuka. 35 Ovihuro mbya zeuparisiwa vya ri ooSidim na Ser na Hamat na Rakat na Kineret, 36 na Adama na Rama na Hasor, 37 na Kedes na Edrei na En-Hasor, 38 na Jiron na Migdal-El na Horem na Bet-Anat na Bet-Semes. Avihe kumwe vya ri ovihuro omurongo na muvyu puna ovirongo vyavyo. 39 Ovihuro mbi puna ovirongo vyavyo vya ri mehi nda yandjewa komaṱunḓu womuhoko wa Naftali ri rire ouini wawo.
Ehi nda yandjewa komuhoko wa Dan
40 Omayandjero oyetjahambombari ya yandjewa komaṱunḓu womuhoko wa Dan. 41 Omuruko wawo wa kondoroka ovihuro mbi: OoSora na Estaol na Ir-Semes, 42 na Salbim na Ajalon na Jitla, 43 na Elon na Timna na Ekron, 44 na Elteke na Gibeton na Baalat, 45 na Jehud na Bene-Berak na Gat-Rimon, 46 na Me-Jarkon na Rakon, na indi ehi nda kambura otjihuro Jopa wina. 47 Imba ovandu va Dan tji va huurirwe ehi rawo, va ya kotjihuro Lesem nave ketjirwisa. Owo ve tji huura, ave zepa ovandu vatjo nave tji isa po otjawo. Owo va tura mu tjo nave rundurura ena rotjihuro Lesem okurira Dan amave tji rukire kena ra ihe mukururume Dan. 48 Ovihuro mbi puna ovirongo vyavyo vya ri mehi nda yandjewa komaṱunḓu womuhoko wa Dan ri rire ouini wawo.
Omayandjero omasenina wehi
49 Ovaisrael tji va mana okuhaṋa ehi motukondwa pekepeke va yandja orukondwa rumwe ku Josua, omuzandu wa Nun, mokati kawo ru rire ouini we. 50 Otja Muhona pa rakizire ve mu pa otjihuro tja ningirire tjena Timnat-Serak, mehi rozondundu ra Efraim. Neye wa tungurura otjihuro hi na tura mu tjo.
51 Omupristeri Eleasar na Josua, omuzandu wa Nun, na imba ovanane womaṱunḓu womihoko vyOvaisrael va haṋa otukondwa twehi ndi mokuumba ozohanga amave pura ku Muhona mOsilo pomahitiro wOndanda yOmahakaeneno. Komuhingo mbwi otji va mana okuhaṋa ehi ndi.
© Herero Revision Bible © Bible Society in Namibia, 2021.
