OTJIRIMUNIKISE TJONDJUWO ONDJAPUKE YA MUHONA OMBE
Esekiel ma twarewa kOjerusalem
1 Oro ra ri eyuva oritjamurongo rombura ombe, ndja ri ombura oitjamirongo vivari nandano, tji twa zire nokutwarewa kouhuura, nu wina ndja ri ombura oitjamurongo na ine Jerusalem tji tja zire nokuhaverwa. Meyuva ndo otji mba muna kutja omasa omanene wa Muhona ye ri mu ami; nowo ye ndji toora, 2 nu motjirimunikise Ndjambi we ndji twara kehi ra Israel ne kendjitwa kondundu onde tjinene. Ami mba muna ozondjuwo ozengi momurungu wandje nḓaa ze munika otja otjihuro otjinene. 3 Eye we ndji twara ngo, nami mba kamuna omurumendu ngwaa keṋakeṋa otja ongoporo. Eye wa ri nongoze yerapi osaneke nokati okasaneke meke re, nu wa kuramene momuvero.
4 Eye wa tja nai ku ami: “Tara, muatje womundu, puratena nawa nu u ṱakamise nawa oviṋa avihe mbi me ku raisire, orondu imbi ombi wa eterwa mba. Ove mo sokukaraera otjiwaṋa tja Israel oviṋa avihe mbi mo munu.”
Omuvero wokomuhuka
5 Imbi mbi mba muna ya ri ondjuwo ya Muhona, nu ya ri norumbo ndwe i kondoroka. Omurumendu ngwi wa toora okati ke okasaneke ku ka ri noure wozometa ndatu, nu a saneke na ko orumbo. Orwo rwa ri noutonga wozometa ndatu, noutindi wozometa ndatu. 6 Tjazumba arire tja i komuvero mbwa tara komuhuka. Eye wa ronda kozondondo na kasaneka omahitiro womuvero; owo ya ri noukoto wozometa ndatu. 7 Kongotwe yomahitiro nga pa ri oruhito ndwa ri nomatuwo yetatu wovatjevere komunda auhe. Etuwo arihe ra ri nomikuma vine mbi ṱeki pamwe, ozometa ndatu, nomakuma wopokati kawo ya ri noutindi wozometa mbari nohinga. Komaandero womatuwo nga wovatjevere kwa ri oruhito rwoure wozometa ndatu nduyaru i ketuwo enene nda tarere kOndjuwo ondjapuke ya Muhona. 8-9 Nomurumendu wa saneka etuwo ndi na munu kutja oro ra ri noukoto wozometa ine. Oro ra wana notjikoro tjomuvero mbwa ri popezu tjinene nondjuwo ya Muhona, notjikoro tjokokure omakuma ya ri noutindi wometa imwe. 10 Omatuwo nga wovatjevere, nga ri komunda auhe woruhito, ya ṱekire pamwe aehe, nomakuma nga ri pokati kawo, aehe ya ri noutindi mbu ṱeki pamwe.
11 Tjazumba omurumendu wa saneka ouparanga woruhito momuvero. Owo wa ri nozometa hamboumwe nohinga azehe kumwe, noruveze rwopokati komapaturukiro womuvero omunene rwa ri nozometa ndano. 12 Momurungu wetuwo arihe rovatjevere mwa ri ekuma esupi routonga wozosentimeta omirongo vitano noutindi wozosentimeta omirongo vitano. Omatuwo nga ya ri nozometa ndatu komikuma avihe. 13 Tjazumba eye wa saneka omukato okuza kekuma rokongotwe retuwo rimwe nga kekuma rokongotwe retuwo nda hungamasanene na ro komunda warwe woruhito; nomukato mbwi wa ri nozometa omurongo na mbari nohinga. 14 Etuwo rokotjikoro tjokokure ra vaza korupanda. Eye wa saneka etuwo ndo na munu kutja oro ri nozometa omurongo kouparanga.
15 Oure auhe kumwe womahitiro womuvero okuza kekuma ropendje romuvero nga komukuma wokokure wetuwo esenina wa ri nozometa omirongo vivari nandano. 16 Mwa ri outuiho momakuma wopendje womatuwo aehe, na momakuma womoukoto wopokati komatuwo. Mwa ri ovisanekero vyomavare mbya kororwa mekuma romoukoto nda tara koruhito.
Orupanda rwopendje
17 Ingwi omurumendu we ndji hitisa morupanda rwopendje. Mwa tungirwe omatuwo omirongo vitatu keṋe yekuma ropendje, nu momurungu womatuwo nga mwa ri nopoṋa pu pa yarerwe omawe; 18 nopo pa tandavara okukondoroka orupanda. Orupanda ndwi rwopendje rwa ri kehi pu indwi rwomoukoto.
19 Pa ri omuvero omukwao kondondo yokombanda mbuyau twara korupanda rwomoukoto. Omurumendu ngwi wa saneka omukato wopokati komivero, nowo wa ri nozometa omirongo vitano.
Omuvero wokeyuva kokunene
20 Omurumendu wa saneka omuvero wokomukuma wokeyuva kokunene mbuyau twara korupanda rwopendje. 21 Omatuwo yetatu wovatjevere komunda auhe woruhito, nomakuma pokati kawo, netuwo enene, aehe ya ri nomasanekero tjingewo tjimuna inga womuvero wokomuhuka. Oure auhe kumwe womuvero mbwi wa ri nozometa omirongo vivari nandano, nouparanga wawo wa ri nozometa omurongo na mbari nohinga. 22 Etuwo enene notuiho, novisanekero vyomavare mbya kororwa momakuma, avihe mbi vya ri tjimuna vyomuvero wokomuhuka. Pa ri ozondondo hambombari nḓaa ze twara komuvero, netuwo enene ra ri kotjikoro tji tja tarere korupanda. 23 Munda mbwina worupanda okuza pomuvero mbwi wokeyuva kokunene kwa ri omuvero omukwao mbuyau twara korupanda rwomoukoto tjimuna imbwi wokomuhuka. Ingwi omurumendu wa saneka omukato pokati komivero vivari mbi, nowo wa ri nozometa omirongo vitano.
Omuvero wokeyuva kokumuho
24 Tjazumba omurumendu ngwi arire tje ndji twara komukuma wokeyuva kokumuho, nu imbo twa kamuna ko omuvero omukwao warwe. Eye we u saneka, nowo wa ri otja imbwi omikwao. 25 Omatuwo womuvero mbwi wina ya ri notuiho tjimuna inga omakwao. Oure auhe kumwe womuvero mbwi wa ri nozometa omirongo vivari nandano, nouparanga wa ri nozometa omurongo na mbari nohinga. 26 Ozondondo hambombari aaze twara komuvero mbwi, netuwo rawo enene wina ra ri kotjikoro, nu ra tarere korupanda. Pa ri oviserekarera vyomavare mbya kororwa momakuma womoukoto, nga tarere koruhito. 27 Imba wina pa ri omuvero mbuyau twara korupanda rwomoukoto. Omurumendu ngwi wa saneka omukato nga komuvero mbwi outjavari, nowo wa ri nozombeta omirongo vitano.
Orupanda rwomoukoto: Omuvero wokeyuva kokumuho
28 Omurumendu ngwi we ndji tuurungisira momuvero wokeyuva kokumuho, ne ndji twara korupanda rwomoukoto. Eye wa saneka omuvero mbwi, nowo wa ṱekire pu imbi vyekuma ropendje. 29-30 Omatuwo wawo wovatjevere, netuwo rawo enene, nomakuma wawo womoukoto, ya ṱekire pamwe na inga womivero omikwao. Omatuwo womuvero mbwi ya ri notuiho. Oure auhe kumwe wa ri nozometa omirongo vivari nandano, nouparanga wa ri nozometa omurongo na mbari nohinga. 31 Etuwo rawo enene ra tarere korupanda ndwi rwopendje, novisanekero vyomavare vya kororwa momakuma womoukoto meṋe yoruhito. Ozondondo nḓaa ze rondo komuvero mbwi za ri hambondatu.
Orupanda rwomoukoto: Omuvero wokomuhuka
32 Omurumendu ngwi we ndji tuurungisira momuvero wokomuhuka ne ndji twara korupanda rwomoukoto. Eye wa saneka omuvero mbwi, nowo wa ṱekire pomikwao. 33 Omatuwo wawo wovatjevere, netuwo rawo enene, nomakuma wawo womoukoto ya sanekwa pu pe ṱeki pamwe otja inga nge ri momivero omikwao. Kwa ri otuiho okukondoroka, netuwo indi enene ra ri notuiho wina. Oure auhe kumwe wa ri nozometa omirongo vivari nandano, nouparanga wa ri nozometa omurongo na mbari nohinga.
34 Etuwo indi enene ra tarere korupanda rwopendje. Ovisanekero vyomavare vya kororerwe momakuma meṋe yoruhito. Ozondondo nḓaa ze twara komuvero mbwi za ri hambondatu.
Orupanda rwomoukoto: Omuvero wokeyuva kokunene
35 Omurumendu ngwi we ndji twara komuvero wokeyuva kokunene. Eye we u saneka nowo wa ṱekire pomivero omikwao. 36 Omuvero mbwi wina wa ri nomatuwo wovatjevere nomakuma nga harekwa moukoto netuwo enene notuiho kominda avihe. Oure wawo auhe kumwe wa ri nozometa omirongo vivari nandano, nouparanga wawo wa ri nozometa omurongo na mbari nohinga.
37 Indi etuwo enene ra tarere korupanda rwopendje. Oviserekarera vyomavare vya kororerwe momakuma meṋe yoruhito. Ozondondo nḓaa ze twara komuvero mbwi za ri hambondatu.
Ozondjuwo nda ri popezu nomuvero wokeyuva kokunene
38 Morupanda rwopendje mwa ri netuwo nda pamba komuvero womoukoto, komukuma wokeyuva kokunene. Oro ra ri nomuvero mbuyau paturukire metuwo enene nda tarere korupanda, nu mu ro omaave kohere onyama yombunguhiro oningiririsiwa. 39 Metuwo indi enene mwa ri oviriro vine, vivari komunda auhe wetuwo. Koviriro mbi okuyave zepere ovinamuinyo vyombunguhiro oningiririsiwa noyomauvi noyokusuta ondjo. 40 Pendje yetuwo pa ri oviriro vine ohamukwao na imbi, vivari komunda auhe womahitiro womuvero wokeyuva kokunene. 41 Avihe kumwe vya ri oviriro hambondatu kuya ku ṱire ovinamuinyo vyombunguhiro, okutja oviriro vine moukoto wetuwo, na vine pendje morupanda. 42 Oviriro vine metuwo roposyo kuyaku ṱuninwa ozombunguhiro ozoningiririsiwa vya ri ovyomawe nga hongwa. Ovyo vya ri noutonga wozosentimeta omirongo vitano, nu kombanda ovyo vya ri nozosentimeta omirongo hambombari nandano komikuma avihe. Oviungurise avihe mbyaa vi ungurisiwa kokuzepa ovinamuinyo vyozombunguhiro aavi ṱizirwa koviriro mbi. 43 Otungora twoupapi nozomirimeta omirongo hambombari nandano twa kondoroka omikuro vyoviriro. Ozonyama azehe nḓaa ze punguhirwa ozombunguhiro aaze tuwa koviriro mbi.
44 Tjazumba eye we ndji hitisa morupanda rwomoukoto. Imo mwa ri omatuwo yevari, nga ri nomivero mbyaa vi paturukire morupanda rwomoukoto, rimwe ra tarere komukuma wokeyuva kokumuho meṋe yomuvero wokomukuma wokeyuva kokunene, nekwao ra tarere komukuma wokeyuva kokunene meṋe yomuvero wokomukuma wokeyuva kokumuho. 45 Omurumendu ngwi we ndji raera kutja etuwo ndi nda tarere komukuma wokeyuva kokumuho ra ri orovapristeri mbaa ve karere Muhona mondjuwo, 46 netuwo ndi nda tarere komukuma wokeyuva kokunene ra ri orovapristeri mbaa ve karere Muhona potjipunguhiro. Ovapristeri avehe va ri ozondekurona za Sadok; owo va ri ovomuhoko wa Levi, nu aveyerike omba ri nousemba wokuhita komurungu wa Muhona okumukarera.
Orupanda rwomoukoto nondjuwo ya Muhona
47 Omurumendu ngwi wa saneka orupanda ndwi rwomoukoto, norwo rwa ri nozometa omirongo vitano komikuma avihe vine. Ondjuwo ya Muhona ya ri komukuma wokongurova, nu momurungu wayo mwa ri otjipunguhiro. 48 Neye arire tje ndji hitisa metuwo romahitiro wondjuwo ya Muhona. Eye wa saneka omahitiro, nowo ya ri noukoto wozometa mbari nohinga, nouparanga wozometa hambombari; wina ya ri nomakuma, nga ri noutindi wometa imwe nohinga kominda aviyevari. 49 Pa ri ozondondo omurongo nḓaa ze twara ketuwo romahitiro nda ri nouparanga wozometa omurongo, noukoto wozometa hamboumwe. Wina pa ri ozongunḓe mbari, imwe komunda auhe womahitiro.
© Herero Revision Bible © Bible Society in Namibia, 2021.
