Deuteronomium 7 - Herero Revision Bible (HRR)

Ovaisrael otjiwaṋa tja Muhona omuini

1 “Muhona, Ndjambi woye, me ku hitisa mehi, ndi mo kakambura ri rire ouini woye, neye ma ramba oviwaṋa ovingi mu ro. Eye ma ramba oviwaṋa hambombari, ovinene novinamasa pove, okutja Ovahetite nOvagirgasi nOvaamori nOvakanaan nOvaperesi nOvahevi nOvajebusi. 2 Nu Muhona, Ndjambi woye, tja twa oviwaṋa mbi mouvara woye, no vi havere, vi zepa avihe. O rikutu kuna vyo, nu o kara notjari na vyo. 3 O kupasana novandu voviwaṋa mbyo, nu o yandjere ovanatje voye okukupasana na wo, 4 owo tjinga amave pora ovanatje voye ku Muhona kutja ve karere oomukuru varwe. Muhona ma ṱomazenge na eṋe, ne mu yandeke tjimanga. 5 Nungwari tjiteye nai ku wo: Haṋeye ovipunguhiro vyawo, teyeye ozongunḓe zawo zomawe ozonḓere, keye omiti vyawo omizere, nu nyoseye oviserekarera vyawo ovihongwa. 6 Orondu oove otjiwaṋa tji tja yapurirwa Muhona, Ndjambi woye; eye we ku toorora mokati koviwaṋa avihe, mbi ri kombanda yehi u rire otjiwaṋa tjouini we.

7 “Muhona ke mu suverere nokumutoorora mena rokutja mwa ri ovengi poviwaṋa avihe. 8 Nungwari Muhona we mu suvera, nu wa vanga okuṱakamisa omakwizikiro, nga tjita noruyano kooiho mukururume. Eye opa za okumuyama nokumukutura nomasa kouhuura na kouvara wa Farao, ombara ya Engipte. 9 Otji mo sokuzemburuka kutja Muhona, Ndjambi woye, eye Ndjambi watjiri, Ndjambi omuṱakame. Eye ma ṱakamisa omerikutiropamwe nu ma raisa orusuvero rwe nga kozondekurona ozetjayovi ku imba mbe mu suvera nave ṱakamisa omatwako we. 10 Nungwari eye ke nakuwomba okuvera imba mbe mu tonda. 11 Punao, kareye nonḓuviro komatwako nomazikamisiro nomaraerero aehe ngu me mu rakiza ndinondi.

Ozondaya nḓe za mokukara nOnḓuviro

(Deu 28:1-14)

12 “Nove tji mo puratene noṱakamisa nokuyenenisa omaraerero nga, Muhona, Ndjambi woye, otji me ku ṱakamisire omerikutiropamwe nounyaṋutima we mbwa yanene kooiho mukururume. 13 Eye me ku suvere ne ku sere ondaya ne ku takavarisa, ne ku pe ovanatje ovengi. Eye ma sere ondaya kovikunino vyoye kutja u mune ovikokotwa nomavinu nomaze womiṋinga; eye me ku sere ondaya nokukupa ozongombe nozonyanda ozengi. Ozonyanda nḓa azehe eye me ze yandja kove mehi nda kwizikira ooiho mukururume okuyandja ku eṋe ri rire ouini weṋu. 14 Mo serwa ondaya poviwaṋa avihe; mu eṋe kamu nokukara omurumendu ngu hi nokukwata poo omukazendu ongandji, nangarire movinamuinyo vyeṋu. 15 Nu Muhona me ku yepisa nomutjise ngamwa auhe, nomitjise avihe omizeu vya Engipte, mbi mo tjiwa, kena ku vi eta kove; nungwari me vi eta ku imba avehe mbe ku tonda. 16 Nove yandeka oviwaṋa avihe Muhona, Ndjambi woye, mbi ma yandja mouvara woye; o ṱotjari na vyo, nu o karere oomukuru vavyo vovisenginina, orondu ihi matji rire ombate kove.

17 “Ove tji we ripura nai momutima woye: ‘Oviwaṋa mbi ovingi pu ami, me yenene vi okuviramba’, 18 o vi tira! Rizemburuka aruhe na imbi Muhona, Ndjambi woye, mbya tjitire ku Farao na kOengipte arihe. 19 Rizemburuka noviraisiro ovinene, mbi wa munine nomeho woye omuini, novikumise novihimise, neke enamasa nokuoko okutandavare, Muhona, Ndjambi woye, mbye ku pitisa na vyo; Muhona, Ndjambi woye, opunga ama tjiti koviwaṋa avihe, mbi mo tira nambano. 20 Nu Muhona, Ndjambi woye, wina me vi mumaparisa nga imbi mbya hupa navi kaṱara, tji vya ṱu. 21 O tira oviwaṋa mbi, orondu Muhona, Ndjambi woye, u ri puna ove; eye onguri Ndjambi omunene, ngwa pu pokutiriwa. 22 Nu Muhona, Ndjambi woye, ma ramba oviwaṋa mbi kouṱiṱiṱiṱi komurungu woye; nove komoo yenene okuvinyona avihe tjimanga, orondu, tji ma tjiti nao, ovipuka ovinyondorore mavi rire ovingi, navi tjiti otjipo kove. 23 Nungwari Muhona, Ndjambi woye, ma yandja ovanavita na ove mouvara woye, ne ve pambaukisa tjinene nga tji va ṱu. 24 Wina eye ma yandja ozombara zawo mouvara woye; ove mo ze zepa, nu kamaaze zemburukwa rukwao. Nu kape na imwe yazo, ndji mai ku pirukire nga tji we ze yandeke azehe. 25 Oviserekarera ovihongwa vyoomukuru vawo vovisenginina vi ningiririseye momuriro; o nanukirwa i osilveri nongoldo mbi ri ku vyo, nu o zeri okuvikambura kutja o ha tura ondjo; orondu otjo otjiyaukise ku Muhona, Ndjambi woye. 26 O eta oviserekarera ngamwa vyovisenginina mbi mondjuwo yoye; orondu osengiro, ndji ri ku vyo mai ya kombanda yoye. Ove mo sokutonda nokunyengwa oviserekarera vyovisenginina mbi, orondu ovyo vya sengwa.