1 Nu David wa zire kotjihuro Gat na taurire kondimba ya Adulam. Nomarumbi we neṱunḓu re arihe tji va zuu otjiṋa hi, arire tji ve ya ku ye. 2 Ngamwa avehe mba ri mouzeu poo mba ri nozondjo poo mba ri nonyengo, va woronganena pu ye; neye wa rira omunane wawo. Avehe kumwe va ri ovarumendu mangara omasere yane.
3 Okuzambo David wa ya kOmispe kehi rOvamoab, na kaningira kombara yawo a tja: “Arikana, yandja oruveze kootate na mama okutura puna eṋe, nga tji mba tjiwa kutja Ndjambi me ndji tjiti vi.” 4 Nu David otje ve eta kombara ya Moab, nowo va kara mbo omayuva aehe David ngunda e ri mondimba.
5 Nomuprofete Gad weya ku David na tja ku ye: “O kara mondimba ndji, ṱokuyenda kehi rOvajuda!” David otja sekama na i kotjihwa tja Heret.
Saul ma zepa ovapristeri va Nob
6 Nu kwa zuvaka ombuze ku Saul yokutja David novandu ve va munika. Saul wa ri mOgibea a haama kehi yomingwati kondunda, e nenga meke, novahongore ve avehe ava kurama pu ye. 7 Saul wa tja nai kovahongore ve: “Purateneye, oweṋe Vabenjamin! Mamu tjangovasi David, omuzandu wa Isai, me mu pe amuhe omahi womakunino novikunino vyomivite poo me mu tjiti amuhe okurira ovahongore kombanda yomayovi poo kombanda yomasere are? 8 Amuhe opu mwa za okundjipirukira are? Kape na umwe weṋu ngwe ndji raera kutja omuzandu wandje wa tjita epango puna omuzandu wa Isai; nu kape na umwe weṋu ngwe rizemburuka na ami okundjitjivisa kutja omuzandu wandje wa sekamisa omukarere wandje David okundjipirukira, nambano ngu me ndji tjere okundjizepa.”
9 Nu Doeg, ingwi Omuedom, wa kurama povahongore va Saul na tja: “Ami mba muna David a meya ku Ahimelek, omuzandu wa Ahitub, kotjihuro Nob. 10 Nu Ahimelek we mu purira ku Muhona, ne mu pe onguta nengaruvyo rOmufilisti Goliat wina.”
11 Nombara Saul wa tuma omuhindwa komupristeri Ahimelek okukemuisana nonganda ye aihe. Navehe, mba ri ovapristeri mOnob, ve ya kombara. 12 Nu Saul wa tja nai ku Ahimelek: “Puratena, muzandu wa Ahitub!”
Nu Ahimelek wa zira a tja: “Owami ngwi, muhona!”
13 Saul we mu pura a tja: “Okutjavi ove na David tji mwe rikuta kumwe okundjisekamena? Ove we mu pa ovikurya nengaruvyo wina, nomu purire ku Ndjambi; nambano eye we ndji pirukire otja tji pe ri ndinondi.”
14 Ahimelek wa zira a tja: “Owaṋi mokati kovakarere voye ngu ri omuṱakame otja David? Neye wina omukwe wombara nu wina omuhongore wovatjevere vombara nomuhivirikwa mondjuwo yoye aihe. 15 Ihi otjikando otjitenga okumupurira ku Ndjambi are? Ayee kako, ka tjiperi! Ombara ai yandja ondjo komukarere wayo motjiṋa hi, nandarire konganda yandje aihe, omukarere woye tjinga e hi nokutjiwa okaṋa kemwe koviṋa mbi avihe!”
16 Ombara arire tji ya tja: “Ahimelek, ove nonganda yoye aihe, tjiri, mamu sokuṱa.” 17 Nombara ya tja nai kovatjevere, mba kuramene popezu na yo: “Indjeye mu zepe ovapristeri va Muhona mba, owo tjinga ave rikuta kuna David nandarire kutja ave tjiwa kutja eye omutaure kave ndji raerere.” Nungwari imba ovatjevere vombara va panḓa okuzepa ovapristeri va Muhona. 18 Nombara otji ya tja nai ku Doeg, Omuedom: “Ryama popezu u zepe ovapristeri!” Nu Doeg otja ryama popezu na zepa ovapristeri mba. Meyuva ndo eye wa zepa ovapristeri omirongo hambondatu na vetano mbaa ve zara ozombanda zokovituve. 19 Nu Saul wa rakiza kutja ovature varwe va Nob, otjihuro tjovapristeri, ve ṱe, okutja ovarumendu novakazendu novanatje novanyame, nozongombe nousino nozonḓu wina.
20 Nungwari Abiatar, umwe wovazandu va Ahimelek, wa taura ne kerikuta kuna David. 21 Neye wa raera David kutja Saul wa zepa ovapristeri va Muhona. 22 Nu David wa tja ku ye: “Ami tji mba muna Doeg eyuva ndo, mba tjiwa kutja eye, tjiri, ma kakora ku Saul. Komuhingo mbwi owami ngu mbi ri omunandjo konḓiro yonganda yoye. 23 Kara puna ami, nu o tira. Saul wa vanga okutuzepa atuyevari; nungwari tji u ri puna ami mo yamwa.”
© Herero Revision Bible © Bible Society in Namibia, 2021.
