Omatjindiro wovakarere
(Deu 15:12-18)1 “Yandja omazikamisiro wousemba nga kOvaisrael. 2 Tji mo randa omukarere Omuheberi, ma sokukuungurira ozombura hamboumwe; nu mombura oitjahambombari ma sokukuturwa, a i nokuhinokusuta otjiṋa. 3 Tje ya erike ma sokukuturwa erike; tja kupa, omukazendu we wina ma sokukuturwa puna ye. 4 Nungwari omuhona we tje mu pe omukazendu, neye e mu pandukire ovazandu poo ovakazona, nu omukazendu ma kara pomuhona we puna ovanatje ve, nu ingwi omurumendu erike ongu ma kuturwa. 5 Nomukarere ngwi tji ma tja: ‘Ami mba suvera omuhona wandje nomukazendu novanatje vandje, hi nokuvanga okukuturwa,’ 6 nu omuhona we me mu eta komurungu wa Ndjambi, ne mu kuramisa pomuvero poo pozongambezero. Nomuhona we me mu topora nondungo mokutwi, nu kombunda omukarere ngwi otji ma karerere pu ye aruhe.
7 “Nomurumendu tja randisa omusuko we okurira omukarere, ingwi omusuko kamaa kuturwa tjimuna ovakarere ovazandu. 8 Omusuko ngwi tje hi nokutjata komuhona we, ngwe mu vanga okurira omukazendu we, nga raere kutja a kuturwe, ama randwa novimariva. Nungwari omuhona we ke nousemba okumurandisa kowozonganda, tjinga e ha ri nouṱakame mu ye. 9 Nungwari omuhona ngwi tji ma vanga okumuyandja komuzandu we, nge mu tjinde otja omusuko we. 10 Omurumendu tja kupu omukazendu warwe, nga yandje komukazendu we ingwi omutenga ovikurya nozombanda, nousemba worukupo otja tje kara. 11 Nu tje hi nokutjita oviṋa mbi vitatu ku ye, nge mu ese a yende nokuhinokukambura otjisuta tje.
Omatwako wozondjito zoutwe
12 “Ngu ma tono omundu nga tja koka, nga ṱe. 13 Nungwari tje ha tjitire wina, nu tje ri Ndjambi ngwe mu yandja momake we, ami otjinga ame mu urikire koṋa ku ma sora okutaurira. 14 Nungwari omundu worive tja zepere omukwao wina, mu isa ko kotjipunguhiro tjandje kutja a ṱe.
15 “Ngu ma tono ihe na ina, nga ṱe.
16 “Ngu ma kambura omundu komasa okukemurandisa poo okukemuisa po omukarere, nga ṱe.
17 “Ngu ma sengi ihe na ina, nga ṱe.
18 “Ovarumendu tji mave pose, nu umwe a vete omukwao newe poo e mu tono nongomi, nu ingwi ngwa tonwa a ha koka, nungwari a kara momara, 19 nu tja kara nawa na piti pendje ama ṱaṱere kokati, nu ingwi ngwe mu tona, nga sute uriri oruveze romukwao ndwa pandjara nu nga kare kehi yondjeverero yaingwi ngwe mu tono nga tja veruke nawa.
20 “Omundu worive tja tono omukarere we omurumendu poo omukazendu nokati, nu omukarere a kokere mbo tjimanga, omuhona ngwi nga pewe omberero ndje mu pwire. 21 Nungwari ingwi omukarere tja hupu eyuva rimwe poo yevari, ingwi omuhona we a pewa omberero, orondu omukarere ngwi eye ouini we.
22 “Novarumendu tji va ru nave keriveta momukazendu otjingundi, a hihamwa nga tja imbirahi ezumo, neye a ha munu otjipo tjarwe, omurumendu ngwe mu hihamisa, nga sute ondjo ndji, ngamwa ovimariva omurumendu womukazendu ngwi mbya ningire, nu nga sutire mousemba wovapangure. 23 Nungwari omukazendu tja munu otjipo korutu, omberero mai rire omuinyo komuinyo, 24 eho keho, eyo keyo, eke keke, ombaze kombaze, 25 otjipiro kotjipiro, otjirwaro kotjirwaro, ezeze kezeze.
26 “Omundu worive tja tono omukarere we omurumendu poo omukazendu meho, noro ari twika, eye nga kuture ingwi omukarere we kutja a yende otja otjisuta tjeho re. 27 Nu eye tja tono eyo romukarere we omurumendu poo omukazendu, noro ari homoka, eye nga kuture ingwi omukarere we kutja a yende otja otjisuta tjeyo re.
Ourizirira womuiniwatjo
28 “Ongombe tji ya twere omurumendu poo omukazendu nga tja koka, ngai ṱe nomawe; nonyama yayo ai riwa, nomuini wongombe ndji ke nakuverwa. 29 Nungwari ongombe tji i rwisa hapo, nomuini wayo tja tjivisiwa ne he i ṱakamisa, noyo ai zepa omurumendu poo omukazendu, ongombe ndji ngai ṱe nomawe, nomuini wayo wina nga ṱe. 30 Nu tji pa tuwa po otjisuta, ma sokusuta pu pe ṱa otja pa ningirwa, okuyama omuinyo we. 31 Ongombe tji ya twere omuzandu poo omukazona mape kara omuhingo tjingewo. 32 Nongombe tji ya twere omukarere omurumendu poo omukazendu, ingwi omuini wayo nga sute komuhona waingwi omukarere ovimariva ovisilveri omirongo vitatu, nu indji ongombe ngai ṱe nomawe.
33 “Omundu worive tja isa ondjombo kamwaha poo tja hupura imwe ne he i yezere, namu wire ongombe poo okasino, 34 nu ingwi omuini wondjombo ma sokuyandja otjisuta: Nga yandje ovimariva ku ingwi omuini wotjinamuinyo. Nu ihi otjinamuinyo tji tja ṱu, ngatji rire otje. 35 Ongombe yomurumendu umwe tji ya zepa ongombe yomukwao, ongombe ndji, ndji nomuinyo, ngai randisiwe, nu ngave haṋasane imbi ovimariva. Nu indji wina ndja koka, ngave haṋasane onyama. 36 Nungwari ongombe tji i iwe kutja i rwisa hapo, nomuini wayo tje he i ṱakamisire ko, otji ma sokusuta, a yandje ongombe onamuinyo mu indji ndja ṱu. Nu indji ndja ṱu mai rire oye.
© Herero Revision Bible © Bible Society in Namibia, 2021.
