Muhona erike onguri Ndjambi watjiri
1 A ha rire eṱe, Muhona,
a ha rire eṱe, nungwari ena
roye nga rire nda pewa ondjozikiro,
orondu oove ngu u raisa orusuvero nouṱakame.
2 Oviwaṋa vi sokupurira tjike nai:
“Namba nai Ndjambi wawo u ri pi?”
3 Ndjambi wetu u ri meyuru;
atjihe tji ma vanga eye u tjita.
4 Oomukuru vawo vovisenginina va
ungurwa posilveri nongoldo,
va ungurwa i omake wovandu.
5 Ve novinyo, nungwari kave hungire;
ve nomeho, nungwari kave munu;
6 ve nomatwi, nungwari kave zuu;
ve nomauru, nungwari kave ṋuka;
7 ve nomake, nungwari kave ṋuṋunga;
ve nozombaze, nungwari kave ka wondja;
kave tjiti ombosiro momiriu vyawo.
8 Avehe mba ungura oomukuru mba,
nu mbe riyameka ku wo,
mave sana ku wo.
9 Vaisrael, riyamekeye ku Muhona!
Eye u mu vatera nu u mu yama.
10 Nganda ya Aron, riyameka ku Muhona!
Eye u ku vatera nu u ku yama.
11 Eṋe mbu mu karera Muhona,
riyamekeye ku ye!
Eye u mu vatera nu u mu yama.
12 Muhona u tu zemburuka,
nu me tu sere ondaya;
eye ma sere Ovaisrael ondaya,
ma sere onganda ya Aron ondaya,
13 ma sere imba mbe mu karera ondaya,
ovanene nouṱiṱi.
14 Muhona nge mu pe ovanatje ovengi,
eṋe nozondekurona zeṋu!
15 Muhona nge mu sere ondaya,
eye ngwa utire eyuru nehi!
16 Eyuru oro ora Muhona porwe,
nungwari indi ehi eye wa yandja kovandu.
17 Ovaṱi kamaave tanga Muhona
na imba mbe ri momaendo wina,
18 nungwari oweṱe mbu matu tanga Muhona,
nambano nga ko nga aruhe!
Tangeye Muhona!
© Herero Revision Bible © Bible Society in Namibia, 2021.
