Omerirongerero wokutjindisa Otjipwikiro tjOmerikutiropamwe wa Muhona
1 David wa tunga ozondjuwo ze omuini mokarukondwa ka Jerusalem ku ke isanewa kutja Otjihuro tja David. Eye wina wa ṱuna poṋa pOtjipwikiro tjOmerikutiropamwe wa Ndjambi ne tji tungire ondanda. 2 Neye wa tja nai: “Ovalevi porwe nga rire mbu mave tjindi Otjipwikiro tjOmerikutiropamwe wa Ndjambi, orondu owo omba toororwa i Muhona okutjitoora nokukarera ye nga aruhe.” 3 David otja woronganisira otjiwaṋa atjihe tja Israel mOjerusalem okueta Otjipwikiro tjOmerikutiropamwe poṋa pe tji ṱunina. 4 Tjazumba otja isana ozondekurona za Aron nOvalevi. 5 Monganda ya Kehat mwa za Uriel, omunane wovandu esere rimwe nomirongo vivari vonganda ye. 6 Monganda ya Merari mwa za Asaja, omunane wovandu omasere yevari nomirongo vivari vonganda ye. 7 Monganda ya Gerson mwa za Joel, omunane wovandu esere nomirongo vitatu vonganda ye. 8 Monganda ya Elisafan mwa za Semaja, omunane wovandu omasere yevari vonganda ye. 9 Monganda ya Hebron mwa za Eliel, omunane wovandu omirongo hambondatu vonganda ye. 10 Monganda ya Usiel mwa za Aminadab, omunane wovandu esere nomurongo na vevari vonganda ye.
11 David wa isana imba ovapristeri ooSadok na Abiatar, nOvalevi ooUriel na Asaja na Joel na Semaja na Eliel na Aminadab. 12 Eye wa tja nai kOvalevi mba: “Oweṋe mbu mu ri ovahongore wozonganda zOvalevi. Eṋe nOvalevi ovakweṋu rikohororeye kutja mu ete Otjipwikiro tjOmerikutiropamwe wa Muhona, Ndjambi wa Israel, poṋa pu mba ṱunina tjo. 13 Rutenga eṋe kamwa ri po okutjitoora, nu Muhona, Ndjambi wetu, otje tu vera mena rokutja katu rikotamenene ku ye otja pu twa sokutjita.”
14 Ovapristeri nOvalevi ve rikohorora kutja ve tjindise Otjipwikiro tjOmerikutiropamwe wa Muhona, Ndjambi wa Israel. 15 Ovalevi ve tji tjindira koviti ovitjindiro koviṱuve vyawo otja Muhona pa rakizire ku Moses.
16 David wa rakiza kovahongore vOvalevi kutja ve zike Ovalevi ovakwao motjiungura tjokuimbura notjokunyanda ombosiro yenyando koviharpe na kozongoma zovitenda. 17 Ovalevi otji va toorora Heman, omuzandu wa Joel, nomuzamumwe we Asaf, omuzandu wa Berekja; nu monganda ya Merari, movazamumwe vawo, owo va toorora mo Etan, omuzandu wa Kusaja. 18 Puna imba va toorora mo movazamumwe vawo mba voruteto orutjavari: OoSakaria na Jaasiel na Semiramot na Jehiel na Uni na Eliab na Benaja na Maaseja na Matitja na Elifelehu na Mikneja, na wina ooObed-Edom na Jeiel, mba ri ovatjevere vopomivero vyondjuwo ya Muhona. 19 Imba ovaimbure ooHeman na Asaf na Etan va ri ovatone vozongoma zovitenda, 20 ooSakaria na Jehiel na Semiramot na Asiel na Uni na Eliab na Maaseja na Benaja va ri ovatone voviharpe okutjita ombosiro yokombanda. 21 OoMatitja na Elifelehu na Mikneja na Obed-Edom na Jeiel na Asasia va ri ovatone vovihumba okutjita ombosiro yokehi okuyenda pamwe momiimbo.
22 Kenanja, omunane wOvalevi, wa toororwa okurira omunane wovanyande vovihumba mena rondjiviro ye yovinangoma. 23 Berekja na Elkana va toororwa okurira ovatjevere vOtjipwikiro tjOmerikutiropamwe. 24 Ovapristeri ooSebanja na Josafat na Netanel na Amasai na Sakaria na Benaja na Elieser va toororwa okunyanda ozohiva komurungu wOtjipwikiro tjOmerikutiropamwe wa Ndjambi. OoObed-Edom na Jehija wina va ri ovatjevere vopomuvero wondanda mu mwa ri Otjipwikiro tjOmerikutiropamwe.
Omatjindisiro wOtjipwikiro tjOmerikutiropamwe kOjerusalem
(2Sam 6:12-22)25 David novanane vOvaisrael novahongore wovita otji va ya kondjuwo ya Obed-Edom kutja ve kaete Otjipwikiro tjOmerikutiropamwe wa Muhona; nowo va yoroka tjinene. 26 Owo va punguha ozondwezu zozongombe hambombari, nozozonḓu hambombari okuzeuparisa kutja ondaya ya Ndjambi i kare pOvalevi mbaa ve tjindi Otjipwikiro tjOmerikutiropamwe. 27 David wa zarere orupera ndwa ungurwa perapi eheze, na wina imba ovaimbure, na Kenanja, omuhongore wawo, nOvalevi mbaa ve tjindi Otjipwikiro tjOmerikutiropamwe. David wa zarere ombanda youpristeri wina. 28 Ovaisrael avehe otji va twara Otjipwikiro tjOmerikutiropamwe kOjerusalem, amave ravaere nondjoroka, nombosiro yozohiva noyozohiva zozonya noyozongoma zovitenda noyoviharpe.
29 Otjipwikiro tjOmerikutiropamwe wa Muhona tji tja etwa motjihuro, Mikal, omusuko wa Saul, aa tarere moruiho na munu ombara David tji ma pundu nokutukatuka nondjoroka, nu Mikal we mu nyengwa momutima.
© Herero Revision Bible © Bible Society in Namibia, 2021.
