Salomo ma ningire ounongo
(2Eku 1:3-12)1 Salomo wa tjita omakutasaneno nombara ya Engipte mena rokutja wa kupa omusuko wayo. Eye we mu eta motjihuro tja David nga tja mana okutunga ondjuwo ye youhona nondjuwo ya Muhona norumbo ndwa kondoroka otjihuro Jerusalem. 2 Ondjuwo ya Muhona ya ri ai hiya tungwa, novandu opuyave zu okukapunguhiro ozombunguhiro zawo kovipunguhiro pekepeke kozondunda. 3 Salomo wa suverere Muhona, na ṱakamisa omazikamisiro wa ihe David posi yokutja eye aa punguhire ozombunguhiro ze ozoningiririsiwa nozomatwimisiro kovipunguhiro pekepeke kozondunda.
4 Otjikando tjimwe ombara Salomo wa ya kOgibeon okukapunguha ozombunguhiro, orondu ingo oku kwa ri otjipunguhiro otjinanḓengu pu avihe. Eye wa punguhira ko ozombunguhiro ozoningiririsiwa eyovi moruveze ndwa kapita. 5 Ouṱuku mbo Muhona we rimunikisa ku ye morutoto ne mu pura a tja: “Mo vanga kutja mbi ku pe tjike?”
6 Salomo wa zira a tja: “Ove aruhe iyo raisa ondjingonekero onene ku tate David, omukarere woye; neye wa ri omusemba nomuṱakame nomupore mongarero ye puna ove. Nove wa kara pokumuraisira orusuvero rwoye orunene norukarerere mokumupa omuatje omuzandu, ngwa yaruka moruveze rwe ndinondi. 7 Muhona, Ndjambi wandje, ove we ndji tjita kutja mbi pingene tate David okurira ombara, nangarire kutja ingee owami omutanda, nu hi nokutjiwa nawa okuhonapara. 8 Owami ngwi mokati kotjiwaṋa tji we ritoororera omuini, otjiwaṋa otjinene tji tji ha sora okuvarwa. 9 Arikana, ndji pa ounongo mbu me hepa okuhonaparera na wo otjiwaṋa tjoye nousemba nouatjiri. Nu tji pe he ri nao, me yenene vi okuhonaparera otjiwaṋa tjoye otjinene hi?”
10 Muhona wa kara nonyuṋe Salomo tja ningira otjiṋa hi, 11 na tja ku ye: “Mena rokutja wa ningire ounongo okupangura osemba, nungwari ko ningirire okukara nomuinyo orure poo outumbe poo onḓiro yovanavita na ove, 12 Ami otji me tjiti otja punga awa ningire. Ami wina me ku pe ounongo nozondunge ozengi mbi hi na vya karere nomundu warwe komurungu woye, nu mbi hi na maavi kakara nomundu warwe kombunda yoye. 13 Ami wina me ku pe imbi mbi u ha ningirire: Mo kara noutumbe, nu mo yozikwa pozombara zarwe azehe oure womuinyo woye auhe. 14 Nu tji wa kara nonḓuviro ku ami noṱakamisa omazikamisiro nomatwako wandje otja iho David punga a tjita, ami me ku pe omuinyo omure.”
15 Salomo wa yanḓimuka na munu kutja Ndjambi wa hungire na ye moruroto. Tjazumba eye wa ya kOjerusalem na kakurama komurungu wOtjipwikiro tjOmerikutiropamwe wa Muhona ne kemupunguhira ozombunguhiro ozoningiririsiwa nozohange. Tjazumba eye arire tja tjitire ovakarere ve avehe omukandi.
Salomo ma pangura otjiposa otjizeu
16 Moruveze ndo kwe ya ovakazendu vevari ovakorondu nave rieta oveni komurungu wombara Salomo. 17 Umwe wawo wa tja nai: “Muhona ombara, ami nomukazendu ngwi twa tura mondjuwo imwe, nami mba pandukira okanatje okazandu mondjuwo ndji, eye ngunda e ri mo. 18 Kombunda yomayuva yetatu, okanatje kandje tji ka za nokupandukwa, eye wina otja panduka okanatje okazandu. Oweṱe atuyevari porwetu mbu twa ri mondjuwo ndji, nu kapa ri omundu warwe. 19 Nu ouṱuku umwe eye wa havera kokanatje ke moumba ne ke sina, ake koka. 20 Neye otja penduka mouṱuku, a isa po okanatje kandje mekoro randje ngunda amba rara, ne ke twara kotjiraro tje; okuzambo otja toora okanatje ke ku ka koka, ne ke twa motjiraro tjandje. 21 Nu mependukirwa tji mba yanḓimuka okunyamisisa okanatje kandje, otji mba muna kutja ka ṱu. Ami mbe ke tara nawa ne munu kutja okanatje nga ka kandje.”
22 Nungwari omukazendu ngwi omukwao wa zira a tja: “Kako! Okanatje nga ku ke nomuinyo oko nga okandje, nu inga ku ka koka oko nga okoye!”
Nomukazendu ingwi omutenga wa kotora na tja: “Kako! Okanatje inga ku ka koka, oko nga okoye nu inga ku ke nomuinyo oko nga okandje!”
Nowo otji va patasana momurungu wombara.
23 Nombara Salomo we ripura na tja: “Auhe ma tja okanatje nga ku ke nomuinyo oku ke ri oke, nu inga ku ka koka okomukwao.” 24 Nu Salomo wa raya kutja engaruvyo ri etwe. Nu tji ra etwa, 25 eye wa tja nai: “Haṋa okanatje nga ku ke nomuinyo motumbembera, nomukazendu auhe mu pa orumbembera rumwe.”
26 Nu ingwi ngu ri ina yokanatje nga katjotjiri, omutima we tjinga awe ura nozongama, wa tja nai kombara: “Arikana, muhona ombara, o zepa okanatje, ke yandja komukazendu ngwi!”
Nungwari omukazendu ngo wa tja nai: “O ke yandja ku umwe wetu, ke haṋa motumbembera.”
27 Salomo wa tja: “O zepa okanatje, ke yandja komukazendu ngwi omutenga; eye onguri ina katjotjiri.”
28 Ovaisrael avehe tji va zuva ondyero yombanguriro ya Salomo otji ve mu yozika tjinene, owo tjinga ava tjiwa kutja Ndjambi we mu pa ounongo okupangura osemba.
© Herero Revision Bible © Bible Society in Namibia, 2021.
