Jesaja 7 - Herero Revision Bible (HRR)

Ombuze kombara Ahas

1 Ombara Ahas, omuzandu wa Jotam nondekurona ya Usija, tja honapara mOjuda, ovita otji vya uta. Resin, ombara ya Sirie, na Pekah, omuzandu wa Remalja, ombara ya Israel, va rwisa Jerusalem, nungwari kave sorere okutjikambura.

2 Ombuze tji ya zuvaka kombara ya Juda kutja otjimbumba tjOvasirie tjovita tja hiti rukuru mehi ra Israel, ombara ndji notjiwaṋa tjayo otji va tira tjinene, nga tji va zezera tjimuna omiti amavi singwa i ombepo.

3 Muhona wa tja ku Jesaja: “Toora omuzandu woye Sear-Jasub, mu kahakaene nombara Ahas. Mamu kemuvaza mondjira mu mu ungurira ovakonde vozombanda, pomaandero worurora ndu eta omeva okuza kerindi rokombanda. 4 Karaere Ahas kutja a kengeze, nu a ha ivaiva, nu a ha tira, nu a ha kurungisiwa momutima mena romazenge omanene wa Resin, ombara yOvasirie, nowombara Pekah. Owo ve ri otja oviyumbu vivari vyomuriro mbi nomuise uriri. 5 Ovasirie puna Ovaisrael nombara yawo ve rikuta kumwe, 6 okurwisa otjiwaṋa tja Juda, nokutirisa ovandu vatjo kutja ve karere ku wo, tjazumba ve zike omuzandu wa Tabeel mouhona.

7 “Nungwari ami ngu mbi ri Muhona Ndjambi me tye kutja otjiṋa hi kamaatji zikamisiwa nu kamaatji tjitwa. 8 Orondu ehi ra Sirie kari nomasa pOdamaskus, ihi otjihuro tjaro ohongora, nu Damaskus otjo katjinamasa pombara Resin. Notjiwaṋa tja Israel matji haṋewa moure wozombura omirongo hamboumwe nandano, nu kamaatji karira otjiwaṋa rukwao. 9 Ehi ra Israel kari nomasa pOsamaria, ihi otjihuro tjaro ohongora, nu Samaria otjo katjinamasa pombara Pekah, omuzandu wa Remalja.

“Tji mu hi nongamburiro, kamaamu karerere.”

Otjiraisiro tja Imanuel

10 Norukwao Muhona wa hungira ku Ahas, a tja: 11 “Riningirira otjiraisiro ku Muhona, Ndjambi woye, tji matji zu kehi motjovakoke poo kombanda meyuru.”

12 Nungwari Ahas wa zira a tja: “Ami hi nokuningira ko otjiraisiro. Hi nokurora ko Muhona.” 13 Jesaja wa zira a tja: “Nambano puratena, ndekurona ya David! Kapuwo ku eṋe okuurisa omiretima vyovandu; mamu hepa okuurisa omuretima wa Ndjambi wandje wina are? 14 Muhona opu ma zu okumupa otjiraisiro hi: Tareye, omusuko ma rire otjingundi, nu ma panduka omuatje omuzandu; neye me mu ruku ‘Imanuel’. 15 Eye ma nu omaere, nu a ri ouitji wozonyutji, nga koruveze ndwi eye ndu ma katjiwa okunakaura ouvi nokutoorora imbi mbi ri oviwa. 16 Orondu okazandu ngunda ake hiya tjiwa okunakaura ouvi nokutoorora ouwa, ehi rozombara nḓa mbari ove nḓu u tira, tjandje ra rire ongaango.

17 “Muhona ma eta kove na kotjiwaṋa tjoye na konganda aihe yaiho omayuva woviwonga nge hi na ya ri ko okuza keyuva ndi Israel ndi tja haṋika na Juda; oviwonga mbi mavi etwa i ombara ya Asirie.

18 “Meyuva ndo Muhona ma tono orukwi otja otjiraisiro kOvaengipte kutja ve ye otja ozonḓe okuza kokure komaandero wonḓonḓu Nil, na kOvaasirie kutja ve ye okuza kehi rawo tjimuna ozonyutji. 19 Owo mave kawirira momikutu na motupoko na mozondimba zotuuwa, nu mave kavandeka omiti vyomakuiya nomaryo aehe.

20 “Meyuva ndo Muhona ma kayazema omukurure munda mbwina yonḓonḓu Eufrat, okutja ombara ya Asirie. Nu Muhona ma kurura na yo otuyezu tweṋu, nozondjise zeṋu, nomainya motutu tweṋu.

21 “Nu meyuva ndo omurumendu worive ma kara nongombe imwe ondema, nozonḓu mbari; 22 ozo maze mu etere omaihi omengi nai nga tji ma yenene okunwa omaere; tjiri, ovandu ouṱiṱi mba mba hupa mehi mave nu omaere nave ri ouitji wozonyutji.

23 “Nu wina meyuva ndo movikunino oviwa muyamu hapa omivite eyovi rimwe, mbi nonḓengu yovimariva ovisilveri eyovi rimwe, mamu hapa omakuiya nominanyiva. 24 Ovandu mave kayeva mehi ndo nomauta noviku. Tjiri, ehi arihe mari ura nomakuiya nominanyiva. 25 Kozondunda azehe zehi nḓa twerwa nomatemo, owo kave nokuyenda ko mena rokutira omakuiya nominanyiva; ozo maze rire komaryo wozongombe nozonyanda.”