Sakaria 10 - Herero Revision Bible (HRR)

Muhona ma kwizike ongutukiro

1 Ningireye ombura ku Muhona mokurooro. Muhona ongu hinda ovikamba vyombura ne vi rokisa kutja okuti ku rire oruhapo kovandu na kovinamuinyo. 2 Ovandu ve pura koviserekarera vyovisenginina na kozombetere, nungwari eziriro, ndi ve pewa, ovizeze noviporoporo. Tjiva ve handjaura oturoto, nungwari mokutjita nao ve mu pukisa uriri; omahekuninino ngu ve yandja owo omungandjo. Ovandu otji ve ryanga uriri tjimuna ozonḓu nḓa pandjara. Owo ve ri moumba tjinga ave hi nomunane.

3 Muhona ma tja nai: “Ami mba ṱomazenge novanane mbo mbe hongorera otjiwaṋa tjandje, nami meve vere. Otjiwaṋa tja Juda otjandje, nami, ngu mbi ri Muhona Omunamasaaehe, me rikendere tjo. Otjo matji rire okakambe kandje kovita okanamasa. 4 Motjiwaṋa tja Juda mamu zu ovahongore novanane novatye okuhonaparera otjiwaṋa tjandje. 5 Ovajuda mave rire ozombangaṋe tjimuna ovarwe wovita mbe tombera ovanavita na wo momunoko womomivanda. Owo mave ru, orondu Muhona u ri puna wo, nu mave havere nandarire ovanavita ovakavire.

6 “Ami me zeuparisa otjiwaṋa tja Juda

nu e yama otjiwaṋa tja Israel.

Me ṱotjari na vyo

nu e vi kotora konganda.

Ovyo mavi kara aayo ami

hi na pu mbe vi nakaurire.

Owami Muhona, Ndjambi wavyo;

me vi zuvire ozongumbiro zavyo.

7 Ovaisrael mave rire ozombangaṋe

otja ovarwe wovita,

mave nyanda otja ovarumendu

mba nu omavinu.

Ozondekurona zawo maze kazemburuka

outoṋi mbwi nu aze yoroka

mena raimbi Muhona mbya tjita.

8 “Ami me isana otjiwaṋa tjandje,

u me tji woronganisa kumwe.

Me tji kutura nu e tji takavarisa

otja indu tji tja ri.

9 Nangarire kutja ami mbe tji

rimba mokati koviwaṋa,

nambano movirongo vyokokure

otjo matji ndji zemburuka.

Otjo novanatje vatjo matji hupu,

nu matji kotoka pamwe na wo kozonganda.

10 Ami meve kotora konganda

okuza kOengipte na kOasirie,

nu meve turisa mehi rawo oveni.

Meve turisa mOgilead na

mozondundu za Libanon wina;

ehi arihe mari urisiwa novandu.

11 Owo tji mave kondo omuronga wawo woumba,

ami, ngu mbi ri Muhona,

me tono ozongazona,

nourekoto wa Nil mau kukuta.

Otjiwaṋa tja Asirie tji tji

ritongamisa matji susuparisiwa,

nu ihi otja Engipte otjinamasa

matji pandjarisa omasa watjo.

12 Ami me tjiti kutja otjiwaṋa tjandje

tji hare omasa mu ami

nu otjo matji rikotamene

natji kara nonḓuviro ku ami.”

Muhona ongwa hungire.