Ongumbiro yomuhinandjo
Epsalme ra David.
1 Ndji pangura otja omuhinandjo, Muhona,
tjinga ambi tjita ousemba;
mbe riyameka kove, nu himee yaraara ko.
2 Ndji rora nu u ndji konḓonone, Muhona;
pangura ozonḓero nomeripura wandje.
3 Orusuvero rwoye orukarerere ru ndji hongorera;
nu ouṱakame woye aruhe u
ndji hongorera kouatjiri woye.
4 Hi nehore novanavineya;
nu ovanatjatjavivi hi ṱunu ko.
5 Mba tonda ombongarero yovanauvi,
nu hi kara pehi pu novanauvi.
6 Muhona, ami mbi koha omake
wandje otja omuhinandjo,
nu mbi kondoroka otjipunguhiro
tjoye ame rikotamene kove.
7 Mbi imbura eimburiro rondangero,
nu mbi serekarera oviungura vyoye avihe ovihimise.
8 Muhona, mba suvera ondjuwo yoye mu u tura,
nokoṋa ku ku kara ongeṋangeṋeno yoye wina.
9 O ndji yandeke puna ovanauvi
na puna ovazepe wina,
10 na imba mbe tjita ouvi oruveze aruhe
nu aruhe mbe rirongerera
okukambura ovimariva vyombopero.
11 Nungwari ami mbi tjita ousemba;
ndji kutura, nu ndji tjariparera!
12 Ami hi munu otjipo momaumba aehe;
nu mombongo yotjiwaṋa tje me tanga Muhona.
© Herero Revision Bible © Bible Society in Namibia, 2021.
