Joahas ma rire ombara mOjuda
(2Ozo 23:30-35)1 Otjiwaṋa tja Juda tja toorora Joahas, omuzandu wa Josija, natji mu twirisa a rire ombara mOjerusalem. 2 Joahas wa ri nozombura omirongo vivari nandatu tja rira ombara mOjuda; neye wa honapara mOjerusalem oure womieze vitatu. 3 Neko, ombara ya Engipte, we mu twara mouhuura, na ṋiṋikiza Ovajuda kutja ve sute osilveri yondjinda yozokirograma 3 400, nongoldo yondjinda yozokirograma omirongo vitatu na ine. 4 Neko wa zika Eljakim, omuangu wa Joahas, a rire ombara mOjuda na mOjerusalem, na rundurura ena re okurira Jojakim. Joahas wa twarewa i Neko kOengipte.
Jojakim ma rire ombara mOjuda
(2Ozo 23:36—24:7)5 Jojakim wa ri notjiwondo tjozombura omirongo vivari nandano tja rira ombara mOjuda; neye wa honapara mOjerusalem oure wozombura omurongo na imwe. Eye wa tjita ouvi komurungu wa Muhona, Ndjambi we. 6 Nebukadnesar, ombara ya Babilon, wa rwisa Juda na kambura Jojakim ne mu twara kObabilon a pandekwa nouketanga. 7 Nebukadnesar wa twaerera ovihuze tjiva vyondjuwo ya Muhona ne kevitwa mondjuwo ye youhona mObabilon. 8 Oviṋa avihe vyarwe Jojakim mbya tjita puna ovitjitwa vye oviyaukise, nouvi mbwa tjita, vya tjangwa mEkuruhungi rOzombara za Israel noza Juda. Omuzandu we Jojakin we mu pingena mouhona.
Jojakin ma rire ombara mOjuda
(2Ozo 24:8-17)9 Jojakin wa ri notjiwondo tjozombura omurongo na hambondatu tja rira ombara mOjuda; neye wa honapara mOjerusalem oure womieze vitatu nomayuva omurongo. Eye wina wa tjita ouvi komurungu wa Muhona. 10 Moruteṋi ombara Nebukadnesar wa twara Jojakin otja omuhuurwa kObabilon, na twaerere ovihuze vyondjuwo ya Muhona. Tjazumba Nebukadnesar wa zika Sidkija, omuangu wa Jojakin, a rire ombara mOjuda na mOjerusalem.
Sidkija ma rire ombara mOjuda
(2Ozo 24:18-20Jer 52:1-3a)11 Sidkija wa ri nozombura omirongo vivari na imwe tja rira ombara mOjuda; eye wa honapara mOjerusalem oure wozombura omurongo na imwe. 12 Eye wa tjita ouvi komurungu wa Muhona, Ndjambi we, nu ka puratenene ko nomerisusuparisiro komuprofete Jeremia, ngwaa zuvarisa mena ra Muhona.
Omawiro wa Jerusalem
(2Ozo 25:1-21Jer 52:3b-11)13 Sidkija wa sekamena ombara Nebukadnesar ngwe mu ṋiṋikizire okuyana mena ra Ndjambi kutja eye ma kara omuṱakame. Eye wa panḓa noukukutu okuritanaura nokukotoka ku Muhona, Ndjambi wa Israel. 14 Ovanane va Juda novapristeri notjiwaṋa wina va horera kotjikaro otjivi tjoviwaṋa mbye ve kondorokere, mokurikotamena koomukuru vovisenginina, notji va yamburura ondjuwo, Muhona omuini ndje riyapurira mOjerusalem. 15 Muhona, Ndjambi wooihe mukururume, wa kara pokuhinda ovatumwa kutja ve ve ronge, orondu eye aa vanga okuyama otjiwaṋa tje nondjuwo ye ondjapuke. 16 Nungwari owo va nyekerera ovahindwa va Ndjambi, ave temangura omambo we, nave yoro ovaprofete ye, nga korusenina omazenge wa Muhona kotjiwaṋa tje tji ya rira omanene, nga tji pe ha ri ondauriro.
17 Muhona otja eta ombara ya Babilon okuverwisa. Eye wa zepa ovarwe wovita omitanda va Juda, nandarire mondjuwo ya Muhona. Eye kena pa ṱirotjari nomundu, nangarire omutanda poo omukurundu, omurumendu poo omukazendu; Ndjambi we ve yandja avehe momake wayo. 18 Nebukadnesar, ombara ya Babilon, wa huura oviungurise vyondjuwo ya Ndjambi, ovinene noviṱiṱi, novihuze vyayo, novihuze vyombara novyovahongore ve na twara oviṋa avihe mbi kObabilon. 19 Eye wa hwika ondjuwo ya Ndjambi, nozondjuwo azehe zouhona motjihuro Jerusalem na haṋa otumbo twatjo na nyono outumbe watjo. 20 Avehe, mba hupa kotjiṱiro, Nebukadnesar we ve twara kObabilon, ku ve kemukarera nozondekurona ze otja ovahuurwa, nga ouhonapare wOvapersie tji wa uta. 21 Ovitjitwa mbi vya yenenisa imbi Muhona mbya zuvarisire notjinyo tjomuprofete Jeremia, indu tja tjere: “Ehi mari kara tjo nokuhinokukunwa oure wozombura omirongo hambombari kutja pe kare omayuva wOkusuva nge hi na ya yenenisirwe.”
Ombara Kirus ma rakiza Ovajuda ve yaruke
(Esra 1:1-4)22 Mombura ondenga youhona wa Kirus, ombara ya Persie, Muhona we mu kondjisa kutja a tjange omarakiza nu e ye hinde, ye resewe neraka enene mehi arihe rouhonapare we. Ihi tja tjitwa, kokutja imbi Muhona mbya hungirire notjinyo tjomuprofete Jeremia vi yenenisiwe, indu tja tjere:
23 “Omarakiza wa Kirus, ombara ya Persie, owo nga: Muhona, Ndjambi weyuru, we ndji zika okuhonaparera omauhona aehe mouye auhe. Eye we ndji rakiza kutja mbi mu tungire ondjuwo mOjerusalem, tji tji ri mehi ra Juda. Nambano, eṋe amuhe mbu mu ri otjiwaṋa tja Ndjambi, twendeye ngo! Nu Muhona nga kare puna eṋe.”
© Herero Revision Bible © Bible Society in Namibia, 2021.
