Jeremia 40 - Herero Revision Bible (HRR)

Jeremia ma kara puna Gedalja

1 Muhona wa hungira ku ami, indu Nebusaradan, omuhongore otjiuru, tja zire nokundjikutura mOrama. Ami mba twarerwe ngo momapando puna ovakwetu avehe, mba za mOjerusalem na Juda, nu mbaa ve twarewa otja ovahuurwa kObabilon.

2 Omuhongore otjiuru we ndji twara peke na tja: “Muhona, Ndjambi woye wa tanda okueta otjiwonga kehi ndi, 3 nu nambano eye wa yenenisa imbi mbya tja ma tjiti. Oviṋa mbi avihe vya tjitwa, orondu otjiwaṋa tjoye tja tura ondjo komurungu wa Muhona, natji ha kara nonḓuviro ku ye. 4 Nambano ami me isa ko omapando pomaoko woye nu me ku kutura. Tji movanga okuyenda kObabilon puna ami, tjita nao, nami me kemuṱakamisa. Nungwari tji u hi nokuvanga okuyenda, kara. Tara, ehi arihe ri ri kamwaha kove, nu mo i akuhe ku movanga.”

5 Tjazumba Jeremia ngunda e hiya zira, Nebusaradan wa tja nai: “Yaruka ku Gedalja, omuzandu wa Ahikam nondekurona ya Safan, ombara ya Babilon ngu ya zika okurira ongooneya yovihuro vya Juda. Ove mo yenene okutura puna ye mokati kotjiwaṋa poo okuyenda ngamwa akuhe ku movanga.” Eye we ndji pa otjiyandjewa novikurya okutwaerera, ne ndji esa kutja mbi yende. 6 Ami mba kakara puna Gedalja mOmispa, ne katura puna otjiwaṋa tji tja sewa nomuinyo mehi ndo.

Gedalja ma rire omunane omunene wokehi yombara ya Juda

(2Ozo 25:22-24)

7 Ovahongore tjiva vOvajuda novarwe wovita ingee mba ri mokuti kave riyandjere. Owo va zuva kutja ombara ya Babilon ya zika Gedalja okurira ongooneya wokehi yombara mehi, nokutja ye mu zika okurira omutye wa imba avehe mbe ha twarerwe kObabilon, ihi otjiwaṋa otjisyona tjinene nai mehi. 8 OoIsmael, omuzandu wa Netanja, na Johanan, omuzandu wa Kareak, na Seraja, omuzandu wa Tanhumet, novazandu va Efai, Omunetofa, na Jaasanja, Omumaaka, otji va ire puna ovarwe wovita ku Gedalja kOmispa. 9 Gedalja we ve yanena na tja ku wo: “Kahepero eṋe okutira okuriyandja mouvara wombara ya Babilon. Tureye mehi ndi, mu karere ombara ya Babilon, notji mamu kara nawa. 10 Ami omuini me tura mOmispa nu me mu karere po, Ovababilon tji ve ya muno. Nungwari eṋe mamu sora okuworonganisa nokupwika omavinu, novihape, nomaze womiṋinga, nu wina mamu yenene okutura movihuro, mbi mamu kambura okuisapo ouini weṋu.” 11 Nu wina, Ovaisrael avehe mba ri mOmoab na mOamon na mOedom na momahi warwe aehe va zuva kutja ombara ya Babilon ya yandjere Ovaisrael tjiva okutura mOjuda, nokutja oyo ya ziki Gedalja okurira ongooneya yawo. 12 Nowo otji va za movirongo mu va rimbirwe nave yaruka kOjuda. Owo ve ya ku Gedalja mOmispa, nu imo va wonga mo omavinu novihape ovingi.

Gedalja ma ṱu

(2Ozo 25:25-26)

13 Kombunda yanao, Johanan novahongore vovarwe wovita mbe he riyandjere, ve ya ku Gedalja kOmispa 14 nave pura nai ku ye: “Ko nokutjiwa kutja Baalis, ombara ya Amon, wa tuma Ismael okuyekukuzepa are?” Nungwari Gedalja ka kamburire ko. 15 Tjazumba Johanan arire tja hungire ku ye mongumumu na tja: “Ndji esa mbi kazepe Ismael, nu kape na umwe ngu ma tjiwa kutja owaṋi ngwa tjiti nao. Ma sokuyandjererwa tjike okukuzepa? Ihi matji piza Ovajuda avehe mbe ku woronganena, nu matji eta omayandekero kotjiwaṋa atjihe tji tja sewa mOjuda.”

16 Nungwari Gedalja wa zira nai ku Johanan: “O tjiti nao! Imbi mbi mo hungirire Ismael, kauatjiri!”