Jeremia 39 - Herero Revision Bible (HRR)

Jerusalem matji huurwa

1 Momueze outjamurongo wombura oitjamuvyu youhona wa Sidkija, ombara ya Juda, Nebukadnesar, ombara ya Babilon, otje ya notjimbumba tje atjihe tjovita na rwisa Jerusalem. 2 Meyuva oritjamuvyu komueze outjaine wombura oitjamurongo na imwe youhona wa Sidkija, orumbo rwotjihuro otji mwa taurirwa.

3 Jerusalem tji tja kamburwa, ovahongore avehe oviuru vombara ya Babilon otji va hita motjihuro nave kara pehi pOmuvero womokati puna Nergal-Sareser na Samgar-Nebo na Sar-Sekim na Nergal-Sareser omukwao warwe.

4 Ombara Sidkija novarwe ve wovita avehe tji va munu imbi mbi mavi tjitwa, va kondja okuhena motjihuro ouṱuku. Owo va twara ondjira yotjikunino, ave pitire momuvero wokotjikoro tjorumbo nave taura okuhungama otjana tja Jordan. 5 Nungwari otjimbumba tjOvababilon tjovita tje ve tezera natji kakamburira Sidkija motutjandja popezu na Jeriko. Tjazumba otji ve mu twara kombara Nebukadnesar ngwa ri motjihuro Ribla, mehi ra Hamat, nu mu tjo Nebukadnesar oma pangurira Sidkija. 6 Nebukadnesar wa zepera ovazandu va Sidkija mOribla, Sidkija omuini ngunda ama tarere, nu wina wa zepa ovahongore avehe va Juda. 7 Kombunda yanao Nebukadnesar wa rakiza kutja Sidkija a twiyiwe omeho na pandekwe nouketanga kutja a twarewe kObabilon. 8 Ovababilon tjandje mave nyosa ondjuwo youhona nozondjuwo zovature, nokuhaṋa orumbo rwa Jerusalem. 9 Korusenina Nebusaradan, omuhongore omunene wovatjevere, wa huura ovandu, mba sewa motjihuro, na imba mba konda ku ye, ne ve twara kObabilon. 10 Eye wa sya mo ovandu tjiva ovasyona tjinene mehi ra Juda, mbe ha ri nouini; neye we ve pa ovikunino vyomivite nomahi womakunino.

Jeremia ma isiwa

11 Nungwari ombara Nebukadnesar wa rakiza nai ku Nebusaradan, omuhongore otjiuru: 12 “Twende u kapahe Jeremia nu u kemutjevere nawa. O mu hihamisa, nungwari mu tjitira avihe mbi ma vanga.” 13 Nebusaradan, novahongore ovanene ooNebusasban na Nergal-Sareser, novahongore ovakwao avehe vombara ya Babilon 14 otji ve kendjieta korupanda romatjeverero. Owo ve ndji twa kehi yondjeverero ya Gedalja, omuzandu wa Ahikam nondekurona ya Safan. Gedalja wa sere okupaha omuhingo wokutja mbi yaruke konganda nokuhinatjipo. Ami ookukara mbo mokati kovandu.

Ombuze ku Ebedmelek

15 Ami ngunda ambi ri morupanda romatjeverero, Muhona otje ndji raera 16 kutja mbi tjivise ombuze ya Muhona Omunamasaaehe, Ndjambi wa Israel, kOmukusi Ebedmelek, ndji mai tja nai: “Otja pu mba heya, ami me eta omanyoneno kotjihuro hi, nungwari hi nokueta ouṋingandu. Nu otjiṋa hi tji matji tjitwa, ove mo kara po okutjimuna. 17 Nungwari ami, ngu mbi ri Muhona, me ku yama meyuva ndo, nove ko nokuyandjewa momake wovarumendu mbu u tira. 18 Ami me ku ṱakamisa nokuhinatjipo, nove ko nokuṱa. Ove mo yama omuinyo woye tjinga awe riyameka ku ami. Ami, ngu mbi ri Muhona, owami ngu mba hungire.”