Esekiel 45 - Herero Revision Bible (HRR)

Orukondwa rwehi rwa Muhona

1 Ehi tji ra haṋewa kutja omuhoko auhe u pewe orukondwa rwawo, orukondwa rumwe maru yapurirwa Muhona. Orwo maru kara noure wozokirometa omurongo na mbari nohinga, nouparanga wozokirometa omurongo. Orukondwa aruhe ndwi maru rire oruyapuke. 2 Morukondwa ndwi mamu kara okarukondwa kehi komikuma vine mbi ṱeki pamwe mu mamu tungwa ondjuwo ya Muhona; komukuma auhe mau kara nozometa omasere yevari nomirongo vitano. Nokarukondwa nga make kondorokwa kominda avihe i oruveze ndu ri kamwaha, rwouparanga wozometa omirongo vivari nandano.

3 Morumbembera rumwe rworukondwa ndwi mamu sanekwa okarukondwa koure wozokirometa omurongo na mbari nohinga, nouparanga wozokirometa nandano; mokarukondwa nga mamu kara ondjuwo ya Muhona, ndji ri poṋa opayapuke tjinene. 4 Ma rire orukondwa oruyapuke rwehi ndwa toororerwa ovapristeri mbe karerera Muhona mondjuwo ye. Mu rwo mamu kara ozondjuwo zawo, nokarukondo kehi wina kondjuwo ya Muhona. 5 Orumbembera indwi orukwao maru toororerwa Ovalevi mbe ungura mondjuwo ya Muhona ru rire ouini wawo. Imo mamu kara ovirongo Ovalevi mu mave tura. 6 Meṋe yorukondwa oruyapuke orukondwa orukwao rwoure wozokirometa omurongo na mbari nohinga nouparanga wozokirometa mbari nohinga maru toororerwa otjihuro mu mamu yenene okutura Ovaisrael avehe.

Ehi nda toororerwa omunane ohivirikwa

7 Pe nehi wina ndi mari toororerwa omunane ohivirikwa. Oro mari tandauka okuza komukuro wokongurova worukondwa oruyapuke nga kOmuronga Mediterania; nokuza komukuro wokomuhuka oro mari tandauka nga komukuro wokomuhuka wehi, kokutja oure waro u ṱeke pamwe noure wehi nda yandjewa komihoko vya Israel. 8 Ehi ndi ondi mari rire orukondwa ndu maru kara ouini womunane ohivirikwa mehi ra Israel, kokutja eye a ha uhara ama ṋiṋikiza otjiwaṋa rukwao, nungwari kutja a ise ehi ndi ri rire oromihoko vya Israel.

Omazikamisiro nga tjangerwa omunane ohivirikwa

9 Muhona Ndjambi wa tja nai: “Eṋe mwa tura ondjo orure tjinene, oweṋe vanane va Israel! Iseye okutjita outwe nokuṋiṋikiza ovandu. Tjiteye ouwa nousemba. Ngaamu roro okuramba otjiwaṋa tjandje mehi ratjo rukwao. Ami, ngu mbi ri Muhona Ndjambi, owami ngu me mu raere nai.

10 “Omundu auhe nga ungurise ozondjinda nomasanekero omasemba:

11 “Oefa kokusaneka na yo oviṋa ovikukutu i sokuṱeka pamwe nOmbat kokusaneka na yo oviṋa mbi ovire otja omeva. Oefa nOmbat aviyevari mavi sokusasanekwa nOhomer. Nomasanekero ngu maye kara po ye ri nai:

Ohomer imwe i ṱeki pOzoefa omurongo, nu wina i ṱeki pOzombat omurongo.

12 “Ozondjinda zeṋu maze sokukara nai:

Ozogera omirongo vivari ze ṱeki pOsekela imwe;

Ozosekela omirongo hamboumwe ze ṱeki pOmina imwe.

13-15 “Indji ondji ri ondyero ndji mamu sokupunguha na yo ozombunguhiro zeṋu:

Kovikokotwa na kovirya mamu yandja ko orupa orutjamirongo hamboumwe aruhe peke rwomakondero weṋu.

Komaze womiṋinga mamu yandja ko orupa orutjasere rimwe rwominikora vyomiṋinga vyeṋu.

Sanekeye oviṋa mbi amamu ungurisa otjisanekero tjOmbat: Ozombat omurongo ze ṱeki pOhomer imwe, okutja ze ṱeki pOkora imwe.”

Kozonḓu mamu yandja nai:

Onḓu imwe mozonḓu omasere yevari.

“Mamu sokueta oviyandjewa vi rire ozombunguhiro zovikurya, novinamuinyo wina vi rire ozombunguhiro ozoningiririsiwa, nozokutja okuhepa, kokutja mu isirwe omauvi weṋu. Ami, ngu mbi ri Muhona Ndjambi, owami ngu me rakiza nai.

16 “Ovature avehe vehi mave sokutwara oviyandjewa vyozombunguhiro nḓa komunane ohivirikwa wa Israel. 17 Ma rire otjiungura tje okuyandja ovinamuinyo vyozombunguhiro ozoningiririsiwa, nozovikurya, nozomavinu kotjiwaṋa atjihe tja Israel pOmikandi vyOmatendameno wOmueze, na pOmasabata, na pomikandi vyarwe. Eye ma sokutjita ozombunguhiro zomauvi nozovikurya nozoningiririsiwa nozokutja okuhepa, kokutja otjiwaṋa tja Israel tji isirwe omauvi watjo.”

Omikandi

(Eks 12:1-20Lev 23:33-43)

18 Muhona Ndjambi wa tja: “Meyuva etenga komueze omutenga ove mo sokupunguha ondwiyona yongombe, ndji hi notjipo okukohorora ondjuwo yandje. 19 Omupristeri ma woto ko kombinḓu yombunguhiro yokuisapo ourunde ndji, nu e i hu kozongambezero zomuvero wondjuwo, na kovikoro vine vyotjipunguhiro, na kozongunḓe zopomahitiro worupanda rwomoukoto. 20 Meyuva oritjahambombari komueze ove mo sokutjitira omundu ngamwa auhe ngwa katukiririre poo ngwa tjiti otjiṋa mokuhinokutjiwa, otjiṋa tjingetjo. Komuhingo mbwi otji mamu yapura ondjuwo yandje.

21 “Meyuva oritjamirongo na yane komueze omutenga otji mamu utu okutjita omukandi wOpaska. Oure womayuva hambombari mamu ri omboroto, ndji hi nosurise. 22 Meyuva etenga romukandi omunane ohivirikwa ma sokuyandja ondwezu yongombe i rire ombunguhiro yokuisapo ourunde we omuini na inga wotjiwaṋa atjihe. 23 Eyuva arihe oure womayuva hambombari womukandi wOpaska eye ma sokuetera Muhona ozondwezu hambombari zozongombe na hambombari zozonḓu, azehe nḓe hi novipo, ze rire ombunguhiro oningiririsiwa. Wina ma sokueta ondwezu yongombo eyuva arihe i rire ombunguhiro yokuisapo ourunde. 24 Kondwezu aihe yongombe na ku aihe yonḓu, ndji mai punguhwa, mape etwa otjiyandjewa tjozorita omurongo na hambombari nohinga zovikokotwa, nandatu zomaze womiṋinga.

25 “Omukandi wOviranda vyOmaso, mbu ma utu meyuva oritjamurongo na yetano komueze outjahambombari, omunane ohivirikwa ma punguha meyuva arihe rainga hambombari ozombunguhiro tjingezo, okutja oyomauvi noyozoningiririsiwa noyovikokotwa noyomaze womiṋinga.”